Aýa raıy
Astana -3 °S
Almaty -7 °S
valıýta baǵamy
USD 421.58
EUR 496.83
RUB 5.53
CNY 62.20

Atyraýda «Saraıshyq» jýrnaly jaryqqa shyqty

2020 jyldyń 20 qarasha 2020 12:43

ATYRAÝ. QazAqparat –Atyraýda «Saraıshyq» ataýymen ádebı-mádenı, tarıhı-tanymdyq jýrnal jaryqqa shyqty, dep habarlaıdy QazAqparat.

«Atyraý-Aqparat» JShS dırektory Ysqaq Egemberdıevtiń aıtýynsha, jańa basylym oblys ákimi Mahambet Dosmuhambetovtiń qoldaýymen jaryq kórdi. «Saraıshyq» –Atyraýdaǵy ádebı-mádenı, tarıhı-tanymdyq baǵyttaǵy tuńǵysh basylym. «Atyraý-Aqparat» medıaholdıngi janynan aıyna bir ret shyǵady. Alǵashqy nómiri 500 danamen shyqty. Kelesi jyldan bastap 2000 danamen tarala bastaıdy.





«Jýrnaldyń «Saraıshyq» atalýynyń ózindik sımvolıkalyq maǵynasy bar. Kezinde órkenıettiń bastaýy bolǵan bul shahar Uly Jibek joly boıyndaǵy ulttyq tarıhymyz ben mádenıetimizdiń máıegine, rýhanııatymyzdyń ǵajaıyp oshaǵyna aınalǵan. Sol sebepten, shejireli shahar ataýymen ulttyq sanany jańǵyrtatyn ádebı-mádenı, tarıhı-tanymdyq basylymdy shyǵarýdy jón kórdik» -deıdi Ysqaq Egemberdıev.

Onyń aıtýynsha, basylymnyń aqyldastar alqasynda aqyn, Qazaqstan Jazýshylar Odaǵynyń tóraǵasy Ulyqbek Esdáýlet, jazýshy, Memlekettik syılyqtyń ıegeri Dýlat Isabekov, aqyn, halyqaralyq «Alash» ádebı syılyǵynyń laýreaty Ǵalym Jaılybaı, kompozıtor, jazýshy, óner zertteýshisi Ilıa Jaqanov, ǵalym, fılologııa ǵylymdarynyń doktory Ǵarıfolla Ánes sekildi qazaqtyń kórnekti qalamgerleri men ǵalymdary bar.

«Jýrnaldyń betashary Tuńǵysh Prezıdent – Elbasy N.Nazarbaevtyń, Memleket basshysy Q.Toqaevtyń ult rýhanııaty týraly oramdy oılarymen ashyldy. Atyraý oblysynyń ákimi M.Dosmuhambetov jańa basylymǵa aqjoltaı tilegin arnady. Aqyn Ǵ.Jaılybaıdyń álemdi dúr silkindirgen pandemııa týraly shyǵarmashylyq izdenisten týǵan «?» (Suraq belgisi) óleńder toptamasy, jazýshy Z.Jumanovanyń ómir shyndyǵyn shynaıy sýrettegen prozalyq shyǵarmalary, Abaıdyń 175 jyldyǵyna oraı jarııalanǵan jazýshy, abaıtanýshy M.Myrzahmetulynyń «Abaıdyń Ál-Farabıdi tanýy», jazýshy Q.Júsiptiń «Jumeken balladalary» degen taqyryptaǵy zertteý maqalalary, jazýshy S.Dúısenbıevtiń «Japyraqtar da jylaıdy» áńgimesi, ádebıet synshysy A.Keńshilikulynyń «Taǵdyrmen betpe-bet» taqyrybyndaǵy zertteý maqalasy, sýretker R.Seısenbaevtyń shetel klassıkteriniń shyǵarmalaryna taldaý jasaǵan «Qudaı táýbesine túsken kún» atty zertteý maqalasy, túrkistandyq ǵalym, sazger B.Serdáliniń «Túrkistan men Saraıshyq» tarıhy taǵdyrlas, tamyrlas» dep atalatyn qos qalanyń qazaq órkenıetinde alar orny týraly tarıhı tolǵanysy jarııalandy. Sondaı-aq, jazýshylar S.Latıeva men M.Táj-Murat shyǵarmashylaryna oryn berildi» - deıdi «Atyraý-Aqparat» JShS dırektory Ysqaq Egemberdıev.

Jýrnaldyń alǵashqy nómirin tanystyrý rásimine oblys basshylyǵy, jergilikti jýrnalıster men ǵalymdar, sondaı-aq, KSRO jáne Qazaqstan Respýblıkasy Memlekettik syılyqtarynyń laýreaty, Qazaqstannyń Eńbek Eri, teatr jáne kıno akteri Asanáli Áshimov, Memlekettik syılyqtyń laýreaty, Qazaqstannyń halyq artısi, ánshi-kompozıtor Altynbek Qorazbaev, respýblıkalyq aıtyskerler jáne jyrshy-termeshiler Odaǵynyń basshysy, Qazaqstannyń eńbek sińirgen qaıratkeri, aqyn Júrsin Erman, halyqaralyq «Alash» ádebı syılyǵynyń laýreaty, «Juldyz» jýrnalynyń bas redaktory, aqyn Ǵalym Jaılybaı, aqyn Svetqalı Nurjanov, halyqaralyq «Alash» ádebı syılyǵynyń laýreaty, «Ana tili» gazetiniń redaktory, aqyn Janarbek Áshimjan, Batys Qazaqstandaǵy Qadyr Myrza-Álı atyndaǵy óner ortalyǵynyń dırektory, aqyn Baýyrjan Halıolla, Qazaqstan Jazýshylar Odaǵy Nur-Sultan fılıaly dırektory, aqyn Dáýletkereı Kápuly sekildi ult zııalylary qatysty.








Avtor Bek Mustafa
Basty sózder: Atyraý oblysy, BAQ,
Joǵary qaraı