Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Atyraýda Jaıyq ózenindegi sý deńgeıi nege tómendedi

2021 jyldyń 22 qyrkúıek 2021 02:52

ATYRAÝ. QazAqparat – Atyraýda Jaıyq ózenindegi sý deńgeıiniń tómendeýine baılanysty túsinik berildi, dep habarlaıdy QazAqparat.

Jaqynda jergilikti BAQ-ta Atyraý qalasynan 25 shaqyrym qashyqta Jaıyq ózeni arnasynyń qurǵaýyna baılanysty sýretter jarııalanǵan. Osyǵan baılanysty Sý resýrstary komıteti Jaıyq-Kaspıı basseındik ınspektsııasynyń ókilderi Atyraý oblysynyń ákimdigimen birge BAQ-ta kórsetilgen oryndy tekserdi.

«Bul jer shoǵyrlaný-qýǵyndaý qubylystarynyń áser etý aımaǵynda ekeni anyqtaldy. 19-20 qyrkúıekte ózenniń osy ýchaskesinde soltústik-batys baǵyttan jel soqqan. Bul Kaspıı teńizi deńgeıiniń aýytqýyna áser etti. Sonyń saldarynan Jaıyq ózeniniń arnasynda sý tartylyp, araldardyń paıda boldy. Qazir ózenniń osy ýchaskesindegi jel ońtústik-batys baǵyttan soǵýda. Demek, sý keri qaıtyp, paıda bolǵan araldar sý astynda qaldy», - dep habarlady komıtettiń baspasóz qyzmeti.

Komıtettiń aqparatyna súıensek, sońǵy jyldary Jaıyq ózeni basseıninde sýdyń azdyǵy birneshe jyldan beri jalǵasyp keledi. Máselen, ıAnvartsevo gıdrobeketiniń shekaralyq tusyndaǵy aǵyn 3,5-5,5 tekshe shaqyrym deńgeıinde baıqalǵan. Al, ortasha kópjyldyq aǵyn kezinde 8,14 tekshe shaqyrym. Bul aǵynnyń ortasha kópjyldyq deregimen salystyrǵanda 2 ese azaıǵanyn kórsetken.

«Jaıyq ózeniniń negizgi aǵysynyń 80%-y Reseı Federatsııasynyń aýmaǵynda qalyptasady. Qazir Qazaqstan shekarasyna jaqyn ornalasqan Irıklın sý qoımasynyń (RF aýmaǵynda) kólemi 2681 mln tekshe metrdi quraıdy. Sý aǵyzý sekýndyna 15 tekshe metr shyǵynmen bekitilgen kestege sáıkes júzege asyrylady. Byltyrǵy jyldyń sáıkes kezeńinde sý qoımasynyń kólemi 2808 mln metr. Al, sý aǵyzý sekýndyna 14,3 tekshe metr shyǵynmen júzege asyryldy», - dep málim etti baspasóz qyzmetinen.

Eske sala ketelik, budan buryn Jaıyq ózeniniń Kaspıı teńizine quıar saǵasynyń tereńdigi ólshengenin jazǵan bolatynbyz.

Avtor Bek Mustafa
Basty sózder: Ekologııa, Atyraý oblysy,
Joǵary qaraı