Australian Open: Anna Danılına juptyq synda fınalǵa shyqty

NUR-SULTAN. QazAqparat – Qazaqstannyń juptyq syndaǵy birinshi raketkasy Anna Danılına Aýstralııa ashyq chempıonatynyń fınalyna shyqty, dep habarlaıdy QazAqparat tilshisi.

A.Danılına brazılııalyq Beatrıs Haddad Maııamen birge jartylaı fınalda jarystyń 2-raketkalary, japonııalyqtar Sıýko Aoıama – Ena Shıbaharamen sheberlik baıqasty.

Jýyrda Sıdneı WTA týrnırinde Anna men Beatrıs qarsylastaryn tize búktirgen bolatyn.

Bul joly birinshi partııada qazaqstandyq-brazılııalyq jup basym tústi – 6:4. Ekinshisinde japonııalyqtar ese qaıyrdy – 7:5.

Úshinshi, sheshýshi sette Anna men Beatrıs qaıtadan tarazy basyn ózderine aýdardy – 6:4.

Qazaqstandyq-brazılııalyq jup 2 saǵat 20 mınýtqa sozylǵan tartysty básekede 2 eıs jasap, 9 breık-poınttyń tórteýin paıdalandy. Qarsylastary 1 eıs, 3 breıkpen (11 breık-poınt) shekteldi.

Osylaısha Anna Danılına óz sporttyq jolynda alǵash ret «Úlken dýlyǵa» týrnıriniń fınalyna shyqty.

Anna men Beatrıs fınalda dodanyń 1-raketkalary, chehııalyqtar Barbora Kreıchıkova – Katerına Sınıakova nemese reseılik Veronıka Kýdermetova – belgııalyq Elıza Mertens juptarynyń qaı jeńgenimen bas júldeni sarapqa salady.

Eske sala keteıik, budan buryn Aýstralııa ashyq chempıonatynda Anna Danılınanyń juptyq synda jartylaı fınalǵa shyqqanyn jazǵan bolatynbyz.

Sondaı-aq Arýjan Saǵyndyqova úshinshi aınalymǵa shyqqanymen, jartylaı fınalǵa óte almady.

Al Zańǵar Nurlanuly Masters chempıondyq reıtıngisinde bir aı boıy kósh basynda keledi.