Aýa raıy
Astana -9 °S
Almaty -12 °S
valıýta baǵamy
USD 421.58
EUR 496.83
RUB 5.53
CNY 62.20

Aıagózdegi 4 balanyń ólimi: Úsh tárbıelenýshiniń denesinde jaraqat bar

2020 jyldyń 27 qarasha 2020 13:43

ÓSKEMEN. QazAqparat – Shyǵys Qazaqstan oblysynyń Aıagóz qalasyndaǵy Balalar arnaıy áleýmettik kómek kórsetý ortalyǵynda 4 balanyń ólimine qatysty tergeý amaldary aıaqtaldy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetinshe, vedomstvoaralyq jedel-tergeý toby oblystyq prokýratýranyń basshylyq etýimen Aıagóz qalasynda ornalasqan Balalar arnaıy áleýmettik kómek kórsetý ortalyǵynda tárbıelenýshiler ólimi boıynsha sotqa deıingi tergeý júrgizgen.

Tergeý barysynda eksgýmatsııa jasalyp, eki komıssııalyq sot-medıtsına saraptamasy júrgizildi. Komıssııa quramyna balalar ınfektsıonısi, kardıolog, anestezıolog-reanımatolog, neırohırýrg, pedıatr, Nur-Sultan qalasynan gıstolog-sarapshylar jáne sanıtarııalyq-epıdemıologııalyq baqylaý komıtetiniń mamandary qatysqan.

«Saraptama qorytyndysyna sáıkes, balalardyń ólimi ókpe fıbrozy, ekijaqty irińdi bronh pnevmonııasy sııaqty janama aýrýlardyń saldarynan bolǵan. Sondaı-aq máıitterdi tekserý barysynda úsh balada dene jaraqaty anyqtaldy. Alaıda bul jaraqattardyń tárbıelenýshiler ólimine qatysy joq. Osyǵan baılanysty aýyr dene jaraqatyn alý faktisi boıynsha qylmystyq is bólek óndiriske shyǵarylyp, ary qaraı tergeý amaldary júrgizilmek», - dedi ShQO PD bastyǵynyń orynbasary Eldos Zakımov.

Onyń aıtýynsha, áleýmettik kómek kórsetý ortalyǵynda tárbıelenýshilerge tıisti medıtsınalyq kómek kórsetpeý faktisi boıynsha qylmystyq is sotqa joldanǵan.

Esterińizge sala ketsek, Aıagózdegi áleýmettik kómek ortalyǵynda 4 bala kóz jumǵan bolatyn.


Joǵary qaraı