Azamattarǵa kúsh qoldanýdyń árbir faktisi muqııat zertteledi – ІІM
NUR-SULTAN. QazAqparat – Іshki ister mınıstrligi azamattarǵa qarsy kúsh qoldanýdyń árbir faktisin muqııat tekseredi. Bul týraly vedomstvonyń resmı ókili Nurdildá Oraz málimdedi, dep habarlaıdy QazAqparat tilshisi.
«ІІM azamattarǵa qatysty kúsh qoldaný faktilerine basa den qoıady. Árbir fakt polıtsııa ǵımarattarynda jáne qoǵamdyq oryndarda ornatylǵan beınekameralardy taldaý arqyly muqııat zertteledi», - dedi ol mınıstrliktiń aqparat alańynda ótken brıfıngide.
Buǵan deıin tártipsizdikter kezinde jaraqat alǵan 23 adam kúzetiletin palatalarda em alyp jatqany aıtylǵan edi.
«Qańtar aıynda bolǵan jappaı tártipsizdikter kezinde polıtsııa kúshteri men áskerı qyzmetshiler elde quqyqtyq tártipti ornatý boıynsha aýqymdy operatsııalar júrgizdi. Tergeý ızolıatorynyń ishki tártip qaǵıdalaryna sáıkes, ýaqytsha ustaý ızolıatoryna túsken barlyq adamdar COVID-19 vırýsyna PTR-testeriniń teris nátıjesimen qabyldanady jáne mindetti túrde medıtsınalyq tekserýden ótedi. Dene jaraqattary nemese aýrýlary anyqtalǵan kezde olarǵa dereý medıtsınalyq kómek kórsetilýde. Árbir osyndaı fakt týraly prokýratýra organdaryna habarlanady. Mekemede bilikti medıtsınalyq kómek kórsetý bolmaǵan jaǵdaıda olar azamattyq densaýlyq saqtaý uıymdaryna jetkizilip, kúzetiletin palatalarda emdeledi. Búginde osyndaı tártippen 23 adam em alýda», - degen bolatyn Nurdildá Oraz.
