Aýa raıy
Astana -22 °S
Almaty -7 °S
valıýta baǵamy
USD 421.58
EUR 496.83
RUB 5.53
CNY 62.20

Baký men Erevan atysty ýaqytsha toqtatý jóninde kelisimge keldi

2020 jyldyń 18 qazan 2020 09:56

BAKÝ. QazAqparat - Ázerbaıjan Respýblıkasynyń syrtqy saıası vedomstvosynyń málimetinshe, Ázerbaıjan men Armenııa 18 qazan jergilikti ýaqytpen saǵat 00:00 bastap atysty gýmanıtarlyq maqsatta toqtatý jóninde kelisimge keldi, dep habarlaıdy QazAqparat tilshisi.

Bul sheshim EQYU Mınsk tobynyń qosalqy tóraǵalary - Frantsııa, Reseı jáne Amerıka Qurama Shtattary prezıdentteriniń 1 qazandaǵy málimdemesinen keıin, sonymen qatar 5 qazandaǵy EQYU Mınsk tobynyń jáne 10 qazandaǵy Máskeý málimdemesinen keıin qabyldandy.

Ázerbaıjannyń syrtqy ister mınıstrligi baspasóz qyzmetiniń basshysy Leıla Abdýllaeva jergilikti telearnaǵa bergen suhbatynda atysty gýmanıtarlyq toqtatýdaǵy maqsat - marqum bolǵan ázerbaıjan áskerıleriniń jáne qarsy tarap adamdarynyń denesin maıdan alańynan alyp ketý, sondaı-aq tutqyndarmen almasý ekenin aıtty. Onyń sózinshe, bul kelisimniń qaı ýaqytqa deıin sozylatyny belgisiz.

17 qazanda Ázerbaıjan syrtqy saıası vedomstvosynyń basshysy D. Baıramov reseılik jáne túrik áriptesterimen telefon arqyly sóılesti. Áńgime barysynda ol atysty toqtatý rejıminen keıin de Gıanja qalasynyń ekinshi márte zymyranmen atqylanǵanyn jetkizdi. Ol aımaqtaǵy jaǵdaı boıynsha áriptesterimen pikir almasty.

Armenpress agenttiginiń habarlaýynsha, Armenııa syrtqy ister mınıstrliginiń baspasóz hatshysy Anna Nagdalıan da atalǵan gýmanıtarlyq kelisim jaıynda sóz qozǵaǵan.

«Biz osy kelisim arqyly 10 qazan kúni Máskeýde qabyldanǵan birlesken málimdemeni júzege asyryp otyrmyz. Ol málimdemede atysty doǵarý jáne ony toqtatýdyń parametrlerin engizý qajettigi kórsetilgen. Ol turaqty jáne anyq bolýy tıis» deıdi ol.

Aıta keteıik, Taýly Qarabaq oqıǵasy 27 qyrkúıekte qaıta shıelenisip ketti. Aýqymy keń áskerı qaqtyǵys júrip jatyr. Ázerbaıjan men Armenııada soǵys jaǵdaıy jarııalandy.

Reseı tarapynyń bastamasymen Máskeýde ótken keńes nátıjesinde Baký men Erevan tutqyndar men qaza tapqandardyń denesimen almasý úshin gýmanıtarlyq maqsatta 10 qazanda jergilikti ýaqyt boıynsha 12.00-den bastap atysty toqtatý týraly kelisken bolatyn.


Perevod Janat Qapalbaeva
Basty sózder: Armenııa, Álem, Ázerbaıjan, Oqıǵa,
Joǵary qaraı