Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Balalarymyz qazaq tilinde sóılesin desek, ekrandy túzeýimiz kerek - Balaeva

2021 jyldyń 21 qazan 2021 15:55

NUR-SULTAN. QazAqparat – QR Aqparat jáne qoǵamdyq damý mınıstri Aıda Balaeva TiJi, Nickelodeon kanaldarynyń nelikten qazaqshaǵa aýdarylyp jatqanyn túsindirdi, dep habarlaıdy QazAqparat tilshisi.

«Sheteldegi tanymal mýltfılm kanaldardyń ónimderin qazaq tiline aýdarý jobasyn jyldyń basynan bastap kettik. Olar: TiJi, Nickelodeon mýltfılm kanaldary. Olarmen kelissóz ótkizilip, qazir «Qazaqfılm» bazasynda aýdarýǵa kiristik. Jyldyń sońynda bul jumys bitedi. Bul degenimiz Nickelodeon men TiJi mýltfılmderi qazaqsha sóıleıdi degen sóz. Bul óte mańyzdy. Ne úshin? Qazaq tili otbasynan bastalady. Búginde taza qazaq tildi otbasylardaǵy balalardyń, kishkentaı búldirshinderdiń tili oryssha shyǵyp jatqany eshkimge de jasyryn emes. Bul - sol mýltfılmderdiń saldary. Ókinishke oraı, tildi tek ata-ana ǵana emes, ekranda qalyptastyratyn zaman boldy. Tili taza qazaqsha shyqqan balanyń sol mýltfılmniń yqpalymen ary qaraı oryssha shúldirlep jatqany ras. Sondyqtan osy telearnalardy kelissózge shaqyryp, 800 saǵat ónimin qazaq tiline aýdaryp jatyrmyz. Salystyrmaly túrde aıtar bolsaq, barlyq búldirshin súıip qaraıtyn «Masha ı medved» mýlfılmniń 1 maýsymyn túsirýge 2 mlrd teńge jumsalady eken. Ol ne bári 2-aq saǵattyq ónim. Al biz tanymal mýltfılm kanaldardyń 800 saǵattyq ónimin 4 ese arzanǵa jasap jatyrmyz. Ózimiz sapaly ónimder jasaıtyn bolsaq, onda ol úlken qarajatty talap etedi. Uzaq ýaqyt ótedi. Qazir ár ýaqytta tıimdi paıdalanýymyz kerek. Sol sebepti qazir búldirshinderimiz kórip jatqan kanaldardyń bárin qazaq tiline aýdarsaq, balalarymyz qazaq tilinde kórse, onda olardyń qazaq tilinde sóıletindigi anyq. Balalarymyz qazaq tilinde sóılesin desek, ekrandy túzetýimiz kerek. Ekran qazaqsha bolýy kerek», - dedi Aıda Balaeva Ortalyq kommýnıkatsııalar qyzmetindegi baspasóz máslıhatynda.

Mınıstr balalardyń birneshe tildi bilgeni de durys ekendigin basa atap ótti.

«Búgin Prezıdent: «Kóp tildi bilý bala úshin, balanyń bolashaǵy úshin úlken múmkindikter, dep jaqsy aıtty. Sondyqtan balalarymyzdyń tili qazaqsha shyqsa, orys jáne basqa da tilderdi ońaı úırenip alady», - dedi ol.


Joǵary qaraı