Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Bankrot dep tanylǵan Petropavl halyqaralyq áýejaıynyń qazirgi jaǵdaıy qandaı

2021 jyldyń 25 qyrkúıek 2021 16:22

PETROPAVL. QazAqparat – Petropavl halyqaralyq áýejaıyn ne kútip, tur, qordalanǵan másele qashan jáne qalaı sheshimin tappaq? QazAqparat tilshisine Soltústik Qazaqstan oblysy ákimdiginiń jolaýshylar kóligi jáne avtomobıl joldary basqarmasy basshysynyń orynbasary Mırhat Ábilmájinov suqbat berdi.

- Maýsym aıynda Petropavl halyqaralyq áýejaıynyń bankrot dep tanylyp, 109 jumysshynyń eńbekaqy boıynsha qaryzy shamamen 30 mln teńgege jetkenin aıtqan edik. Jumysshylardyń eńbekaqy boıynsha qaryzy jabyldy ma?

- Iá, «Petropavl halyqaralyq áýejaıy» AQ jumysshylaryna eńbekaqy boıynsha qaryzy bankrottyq basqarýshymen shilde-tamyz aıynda tolyq jabyldy. Qazir qaryz joq.

- Petropavl áýejaıynyń daǵdarysqa ushyrap, keıin bankrot bolýyna ne sebep boldy?

- SQO mamandandyrylǵan aýdanaralyq ekonomıkalyq sotynyń 8 qazan 2013 jylǵy sheshimine sáıkes Petropavl áýejaıyna saýyqtyrý rásimi qoldanyldy. Nysan shyǵynsyz jumys isteýi úshin aıyna 80-85 reıs jasaýy tıis. Sondyqtan aı saıyn kredıtorlyq bereshegi, sonyń ishinde eńbekaqy qaryzy men mindetti tólemder óse berdi. Koronavırýs indeti jaǵdaıdy tipti ýshyqtyryp jiberdi. 2020 jyldyń 28 jeloqsany kúni SQO mamandandyrylǵan aýdanaralyq ekonomıkalyq soty áýejaıdy bankrot dep taýyp, taratylýy tıis dep sheshim shyǵardy.

- Qazirgi ýaqytta másele qalaı sheshilip jatyr?

- Búginde áýejaıdyń barlyq dúıemúlki, onyń ishinde ushý-qoný jolaǵy, rýlej joldary, áýe kemeleriniń turaǵy, jolaýshylar termınaly men barlyq arnaıy tehnıka respýblıkalyq menshikten SQO ákimdiginiń kommýnaldyq menshigine ótip, jolaýshylar kóligi jáne avtomobılder joldary basqarmasynyń balansyna alyndy.

Osylaısha, áýejaı jabylǵan joq. Avıatsııalyq apattyq-qutqarý qyzmetterine, sanıtarlyq avıatsııaǵa, sondaı-aq Nur-Sultan, Almaty, Túrkistan qalalaryna demeýqarjy arqyly ushý múmkindikteri qarastyrylǵan. Áýejaı jumysyn jandandyrý úshin qazirgi ýaqytta qyzyǵýshylyq tanytýy múmkin ınvestorlarmen kelissózder júrgizilip jatyr.

- Áýejaıdyń ushý-qoný jolaǵyn jóndeýge jáne jolaýshylar termınalyn qalypqa keltirýge qansha qarajat jumsaldy?

- 2015-2016 jyly respýblıkalyq bıýdjetten 7,1 mlrd teńge bólinip, bul qarajatqa áýejaıdyń ushý-qoný jolaǵy jóndeldi, sonyń ishinde jolaq 2800 metrge uzartyldy, eni 60 metrge deıin jetkizildi, jaryq, radıonavıgatsııalyq belgiler jáne meteoqondyrǵylar ornatyldy. Buǵan qosymsha jolaýshylar termınaly jónge keltirildi.

Qazastan men Reseı arasyndaǵy HV aımaqaralyq yntymaqtastyq forýmy qarsańynda áýe kemeleri turaǵy ekeýden segizge deıin ulǵaıtyldy. Bul maqsatqa 1,2 mlrd teńge jumsaldy. Áýejaı jolaýshylardy jáne olardyń júgin tekserý úshin tıisti qondyrǵylarmen qamtamasyz etildi. Qazirgi ýaqytta munda 39 beınekamera jumys isteıdi.

- Áýejaıdyń jumysyn qalypqa keltirý úshin qandaı is-sharalar qabyldandy?

- Qazirgi ýaqytta bizdiń basqarma quqyq belgileýshi qujattardy jónge keltirip jatyr. Óıtkeni áýejaıdyń aýmaǵy jáne keıbir sıpattamalary boıynsha sáıkessizdikter bar. Kelesi kezeńde senimgerlik basqarýǵa berý úshin konkýrs uıymdastyrylady. Qatysýshylarǵa qoıylatyn tenderlik sharttardyń biri - jyl saıyn áýejaıǵa ınvestıtsııa quıý. Sondaı-aq senimgerlik basqarýǵa alýshy júk tasymalyn uıymdastyrý úshin tez turǵyzylatyn metall angar salýy tıis. Júk tasymalyn uıymdastyrýǵa ushý-qoný jolaǵynyń beriktigi de qýaty da múmkindik beredi. Óıtkeni áýejaılardyń negizgi kirisi júk tasymaly arqyly túsetinin tájirıbe kórsetip otyr.

Budan basqa 2021-2025 jyldarǵa arnalǵan SQO-ny áleýmettik-ekonomıkalyq keshendi damytý josparyna sáıkes demeýqarjy bólý arqyly áýe baǵyttarynyń sany kóbeıtilmek. Jospar boıynsha ushaqtar Almaty qalasyna aptasyna 3 ret, Nur-Sultanǵa kúndelikti, al Túrkistanǵa aptasyna eki ret ushatyn bolady. Qazirdiń ózinde Nur-Sultan men Túrkistan qalalaryna reıster bar.

- Rahmet!


Joǵary qaraı