Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

«Barlyǵyna qarsy» baǵany saılaý protsesiniń ashyqtyǵyna yqpal etti - sarapshy

2021 jyldyń 2 tamyz 2021 00:23

NUR-SULTAN. QazAqparat – QR Ádilet mınıstrligi zańnama departamenti dırektorynyń orynbasary Alma Muqanova aýdandyq deńgeıdegi ákim saılaýyn ótkizý týraly pikir bildirdi, dep habarlaıdy QazAqparat.

25 shildeden bastap, Qazaqstanda aýdandyq mańyzy bar qalalardyń, aýyldardyń, kentterdiń, aýyldyq okrýgter ákimderin tikeleı saılaý ótti. Jańa ereje boıynsha qazaqstandyqtar tikeleı daýys berý arqyly óz eldimekeniniń ákimin saılaı alady.

«Talaptarǵa sáıkes, aýdandyq mańyzy bar qalalardyń, aýyldardyń, kentterdiń, aýyldyq okrýgterdiń ákimi qyzmetine joǵary bilimi bar jáne osy eldimekenniń aýmaǵynda turatyn 25 jastan asqan QR azamattary úmitker bola alady. Sondaı-aq olardyń belsendi saılaý quqyǵy bolýy kerek jáne «Qazaqstan Respýblıkasyndaǵy memlekettik qyzmet týraly» Zańdaǵy barlyq talaptarǵa saı bolýǵa tıis», - dep atap ótti sarapshy.

Kandıdattardy saıası partııalar óz músheleriniń arasynan nemese ekiden kem kandıdat usynylsa, odan joǵary turǵan ákim usynady. Sonymen birge, úmitkerler ákim laýazymyna ózin-ózi usyna alady. Negizgi shart – saılaýshylardyń jalpy sanynyń keminde 1%-ynyń qolyn jınaý.

«Ortalyq saılaý komıssııasynyń resmı derekteri boıynsha, «Nur Otan», «Aýyl», «Aq Jol», «ADAL», «QHP» partııalarynan tikeleı saılaýǵa 878 kandıdat usynylǵan. Bul rette partııalarda da shekteý bolady – olar ár okrýgte bir kandıdatty ǵana usyna alady. Saılaý qorytyndysy boıynsha «Nur Otan» partııasynan basqa «Aýyl», «Aq Jol», «ADAL» partııalarynan da kandıdattar saılanǵan», - deıdi A. Muqanova.

Onyń aıtýynsha, Parlament Májilisi men máslıhattar saılaýy kezinde saıası partııalardyń ótý shegin 7%-dan 5%- ǵa deıin tómendetý jáne saıası partııalardyń jandanýy partııalarǵa máslıhattar men Parlament Májilisine óz tizimderin usynýda oń serpin bere alady.

«Saılaýdyń taǵy bir ereksheligi – saılaý bıýlletenderinde «barlyǵyna qarsy» baǵanynyń engizilýi boldy. Ákimderdi tikeleı saılaýdy taldaý da «barlyǵyna qarsy» baǵanyn qosý týraly túzetýler saılaýshylardyń quqyqtaryn keńeıtkenin jáne saılaý protsesiniń ashyqtyǵyna yqpal etkenin kórsetedi. Mysaly, aqparat kózderine sáıkes (kazpravda.kz, regtv.kz, kt.kz), Qaraǵandy oblysy boıynsha «barlyǵyna qarsy» baǵany Aqtoǵaı aýdanynyń Shashýbaı kentinde (116) eń kóp belgilengen – bul daýys bergenderdiń 7 paıyzy», - deıdi A. Muqanova.


Avtor Aıjan Serikjanqyzy
Basty sózder: Zań, Ákim saılaýy,
Joǵary qaraı