Aýa raıy
Astana 30 °S
Almaty 30 °S
valıýta baǵamy
USD 412.55
EUR 468.66
RUB 5.79
CNY 58.80

Bas dárigerler kabınette tyǵylyp otyrmaı,  adamdarǵa  jaǵdaıdy túsindirýi kerek – Berdibek Saparbaev

2020 jyldyń 4 shilde 2020 10:31

TARAZ. QazAqparat – Berdibek Saparbaev jambyldyqtardyń dárigerler men dári-dármek tapshylyǵyna qatysty shaǵymdary boıynsha keńes ótkizdi, dep habarlaıdy QazAqparat tilshisi.

Jambyldyqtar jedel járdem men medıtsınalyq mekemelerdiń jumysynyń nasharlyǵyna, aýrýhanalardaǵy tósek-oryndar men dárihanalardaǵy dári-dármekterdiń jetispeýshiligine qatysty jıi shaǵymdanýda.

Osy oraıda Jambyl oblysynyń ákimi Berdibek Saparbaev bas dárigerlermen, dárihana jelileriniń ókilderimen jáne dıstrıbıýtorlarmen kezdesý ótkizdi. Onda qalyptasyp otyrǵan jaǵdaıdyń sebebi men qordalanǵan máselelerdiń sheshý joldary saralandy.

Oblystyq densaýlyq saqtaý basqarmasynyń basshysy Marat Jumanqulovtyń aıtýynsha, provızorlyq statsıonarlardaǵy tósek qorynyń toltyrylýy shamamen 50 paıyzdy quraıdy. Ol dárigerler az bolǵandyqtan, naýqastardy qabyldaýǵa ýaqyttary jetpeı otyrǵandyǵyn alǵa tartty.

Berdibek Saparbaev qabyldaý bólimindegi dárigerler sanyn kóbeıtýdi tapsyrdy.

«Adamdar aýrýhanaǵa kelip, qabyldaý bóliminde birneshe saǵat kezek kútip otyrady. Naýqastarǵa barlyq qolaıly jaǵdaı jasaýdyń ornyna aýrýhanalar odan ári nasharlatady. Jaǵdaıdy tez arada túzetý qajet», - dedi Berdibek Saparbaev.

Turǵyndar aýrýhanaǵa jatqyzylǵannan keıin de qajetinshe emdeý sharalaryn ala almaıtyndyqtaryna, dári-dármekterdiń jetispeýshiligine shaǵymdanýda.

«SK-Farmatsııa» JShS ókildiginiń basshysy Aıjan Tortaevanyń aıtýynsha, pnevmonııamen aýyratyn naýqastardyń kóbeıýine baılanysty jýyrda 25,3 mıllıon teńgege shuǵyl dári-dármekter jetkizildi. Ol medıtsınalyq uıymdardyń ótinishi boıynsha dári-dármekterdi jetkizýdi jalǵastyra beretinin aıtty. Bul máseleni baqylaýda ustaý Marat Jumanqulovqa tapsyryldy.

Dárigerler naýqastarmen ǵana emes, sonymen birge olardyń týystarymen de baılanys ornata almaýda. Týystary dárigerlerden naýqastardyń jaǵdaıy týraly aqparat almaıtynyn aıtady. Bul turǵydaǵy shaǵym ýaqytsha provızorlyq statsıonar bolyp jabdyqtalǵan oblystyq kópsalaly balalar aýrýhanasy dárigerleriniń ústinen túsken. Aýrýhananyń bas dárigeri Azat Sátjanov bul kemshilikter boıynsha jumystar atqarylǵanyn, dárigerlermen túsindirýler júrgizilgenin jetkizdi. Qazirgi ýaqytta aýrýhanada jedel ortalyq jumys isteıdi.

«Bas dárigerler kabınette tyǵylyp otyrmaı, shyǵyp, adamdarǵa qazirgi jaǵdaıdy túsindirýi kerek. Sonymen qatar, qıyn jaǵdaılardaǵy azamattardyń densaýlyǵyn saqtaý úshin shuǵyl naqty sharalar qabyldaýy tıis», - dedi aımaq basshysy.

Jıynda taǵy bir ózekti másele retinde jedel járdemniń kelý ýaqytynyń birneshe saǵatqa sozylatyndyǵy aıtyldy. Oblystyq medıtsınalyq jedel járdem stantsııasynyń bas dárigeriniń m.a. Ulpan Pyhybaevanyń aıtýynsha, dıspetcherlik qyzmettiń júktemesi eki esege artqan.

«Naýqas jedel járdem qyzmetin birneshe saǵat kútetin bolsa, onda kedergisiz medıtsınalyq kómek týraly sóz aıtýdyń ózi artyq shyǵar. Jedel járdem brıgadalarynyń sanyn kóbeıtý jáne olardyń jumysyn júıeleý qajet», - dep tapsyrma berdi Berdibek Saparbaev.

Sondaı-aq, oblys aýmaǵyndaǵy dárihanalarda vırýsqa qarsy jáne qyzý túsiretin dárilerdiń jetispeýshiligi baıqalady. Dárihanalar jelisiniń ókilderi turǵyndardyń ózderi mundaı ahýaldy qoldan jasap otyrǵandyǵyn tilge tıek etti. Dári-dármekti negizinen saý adamdar satyp alýda. Qazir olar dıstrıbıýtorlarmen jetkizýdiń jańa máselelerin talqylap jatqandyqtaryn aıtady.

Berdibek Saparbaev densaýlyq saqtaý basqarmasy men taýarlar men qyzmetterdiń sapasy men qaýipsizdigin baqylaý departamentine halyq arasynda aqparattyq-túsindirý jumystary tıisti deńgeıde júrgizilmegeı otyrǵandyǵyn eskertti. Aımaq basshysy sondaı-aq dárihana jelileriniń ókilderine baǵany shekti baǵadan joǵary kóterýge bolmaıtynyn basa aıtty.

Otyrysty qorytyndylaı kele, Berdibek Saparbaev koronavırýs pandemııasymen kúres júrip jatqan qazirgideı qıyn ýaqytta mundaı olqylyqtarǵa jol berýge bolmaıtyndyǵyn atap ótti.

«Azamattarymyzdyń ómiri men densaýlyǵy – bárinen baǵaly. Biz olardy qorǵaý úshin bar kúsh-jigerimiz ben múmkindikterimizdi baǵyttaýymyz kerek», - dep túıindedi aımaq basshysy.


Joǵary qaraı