Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Baspana boıynsha áleýmettik baǵdarlamalar mańǵystaýlyqtardyń qyzyǵýshylyǵyn týǵyzdy

2021 jyldyń 26 qazan 2021 11:54

AQTAÝ. QazAqparat - Baspana alý boıynsha áleýmettik baǵdarlamalar Mańǵystaý oblysyndaǵy aýyl turǵyndarynyń úlken qyzyǵýshylyǵyn týǵyzdy, dep habarlaıdy QazAqparat.

Aımaqty áleýmettik damytý boıynsha agenttik osyndaı baılamǵa kelip otyr. Búgingi tańda uıym «Demeý» jobasy sheńberinde 250-ge tarta keńes bergen.

Mańǵystaý oblysynyń aımaqty áleýmettik damytý boıynsha agenttiginiń dáriger-terapevteri, zańgerleri men psıhologtary Tuyqudyq jáne Aqshymyraý aýyldarynyń 240 turǵynyna konsýltatsııa uıymdastyrdy.




Atap aıtqanda, dárigerler saqtandyrý, alǵashqy medıtsınalyq kómek, naýqastarǵa kvota jáne vaktsınatsııa týraly keńes berdi. Zańgerler bala quqyqtary, sondaı-aq nesıeleýdiń qyr-syry, múgedek adamdardy ońaltý boıynsha memlekettik baǵdarlamalar týraly aıtyp berdi. Al psıhologtar qyzmet alýshylarǵa áleýmettik jelilerdiń balalarǵa áseri jáne jalpy olardyń tárbıesi týraly sóz qozǵady.




Bul rette ásirise turǵyn úılerdi nesıeleý boıynsha memlekettik baǵdarlamalardyń sharttaryn túsindirgen «Otbasy bank» konsýltanttarynyń aqparatyna qyzyǵýshylar kóp boldy. Aýyl turǵyndaryna depozıtti ashý jáne depozıt boıynsha memlekettik syıaqylar alý erejeleri túsindirildi.

Turǵyndardy sonymen qatar Azamattyq bastamalardy qoldaý ortalyǵy arqyly ÚEU-ny granttyq qarjylandyrý boıynsha máseleler qyzyqtyrdy.




Eske sala keteıik, qazan aıynyń basynda bastalǵan «Demeý» áleýmettik jobasy densaýlyq saqtaý, quqyqtyq jáne psıhologııalyq kómek salasynda halyqty qoldaýǵa baǵyttalǵan. Ony iske asyrý barysynda psıhologtardan, terapevt-dárigerlerden jáne zańgerlerden turatyn 60 bastamashyl top aýyl turǵyndaryn memlekettik baǵdarlamalar týraly habardar etedi. Grant sharttaryna sáıkes, árbir bastamashyl top úsh jáne odan da kóp aýylda 300 konsýltatsııa ótkizýi tıis. Jobany qoǵamdyq mańyzy bar bastamalardy damytý qory Azamattyq bastamalardy qoldaý ortalyǵynyń qoldaýymen júzege asyrady.




Tapsyrys berýshi – Aqparat jáne qoǵamdyq damý mınıstrligi.


Joǵary qaraı