Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Batys Qazaqstanda jyl sońyna deıin úsh mektep qurylysy aıaqtalmaq

2021 jyldyń 24 tamyz 2021 14:32

ORAL. QazAqparat – Batys Qazaqstan oblysynda jyl sońyna deıin úsh mektep qurylysyn aıaqtaý kózdelip otyr, dep habarlaıdy QazAqparat tilshisi.

BQO bilim basqarmasynyń basshysy Aıgúl Myńbaevanyń aıtýynsha, Oral qalasynda №33, Qaztalov aýdanynda Saryqudyq aýylynda 60 oryndyq jáne Qaztalovtyń ózinde 600 oryndyq A.Orazbaeva atyndaǵy mektep qurylysy márege jetpekshi.

Jalpy, oblysta 7 apattyq jaǵdaıdaǵy mektep bolsa, sonyń úsheýi jyl aıaǵynda joıylatyn bolady. Sonymen qatar Aqjaıyq aýdany Atameken aýylynda M.Ótemisov atyndaǵy jáne Qaztalov aýdany Qonys aýylyndaǵy apattyq jaǵdaıdaǵy mektepter ornyna modýldik úlgidegi ǵımarattar salý 2022 jylǵa josparlanǵan. Qazirgi kezde joba-smeta qujattamalar jasalyp jatyr.

Basqarma basshysynyń sózine qaraǵanda, oblysta sondaı-aq úsh aýysymda oqytatyn bes mektep bar. Olar – oblys ortalyǵyndaǵy №20, №30, №18, Terekti aýdany Podstepnyı aýylynda qazaq mektebi jáne Aqsaı qalasyndaǵy №7 mektep.

Qazirgi tańda Zachagan kentindegi №20 jáne №30 mekteptiń bastaýysh synyptaryn bıyl jabylǵan M.Ótemisov atyndaǵy oblystyq saýyqtyrý mektebi ǵımaratyna kóshirý júrgizilip jatyr. Oǵan qosa kentte jańadan mektepter boı kóteredi. Al №18 mektepte qosymsha ǵımarat qurylysy aldaǵy jyldyń birinshi jartyjyldyǵynda bitpekshi. Podstepnyı aýylynda 600 oryndyq mekteptiń joba-smeta qujattamasy daıyn. Aqsaıdaǵy №7 mektep máselesin jeke ınvestor esebinen sheshilmek.

«Oblys boıynsha oqýshylar sanynyń azaıýyna jáne talapqa saı kelmeýine baılanysty bıyl 7 mektep jabyldy, sonyń bireýi – Oral qalasyndaǵy M.Ótemisov atyndaǵy saýyqtyrý mektebi. Munda jumys istegen 59 pedagogtyń 55-i jumysqa ornalastyryldy. 86 qosymsha jáne kishi qyzmetkerler negizinen №20 mektepke aýysady. Qalǵan altaýy – aýdandardaǵy bastaýysh mektepter», - dedi QazAqparat tilshisine A.Myńbaeva.

Eske sala keteıik, budan buryn Batys Qazaqstanda pedagogtardyń 95,1 paıyzy ekpe saldyrǵanyn jazǵan bolatynbyz.


Joǵary qaraı