Aýa raıy
Astana -10 °S
Almaty -5 °S
valıýta baǵamy
USD 421.58
EUR 496.83
RUB 5.53
CNY 62.20

Berdibek Saparbaev dala órtiniń aldyn alýdy kúsheıtýdi tapsyrdy

2020 jyldyń 29 shilde 2020 04:31

TARAZ. QazAqparat – Jambyl oblysynyń ákimi Berdibek Saparbaevtyń tóraǵalyǵymen orman jáne dala órtteriniń aldyn alý, olardy joıý máseleleri boıynsha apparattyq keńes ótti, dep habarlaıdy QazAqparat tilshisi.

Jýyrda Moıynqum aýdanynda bolǵan tabıǵı órttiń birneshe táýlik boıy sóndirilmeýine ózara árekettesetin qurylymdardyń jumysynyń álsiz bolýynan jol berilgen. Bul týraly aımaq basshysy atalǵan jıynda basa aıtty.

«Moıynqum orman jáne janýarlar dúnıesin qorǵaý jónindegi mekemesi» KMM aýmaǵyndaǵy qumdy jerdegi qýraǵan shóp pen sekseýil órtin sóndirý tórt kún boıy jalǵasqan. Órt Aqkól, Jambyl, Merki, Ulanbel jáne Qosqudyq orman sharýashylyqtarynyń aýmaǵyna deıin taraldy. Eldi mekenderge qaýip tóngen joq. Órtti sóndirýge 291 adam, 61 tehnıka jáne 1 tikushaq jumyldyryldy.

Tabıǵı resýrstar jáne tabıǵat paıdalanýdy retteý basqarmasynyń basshysy Aslan Orazbekovtiń aıtýynsha, shóldi jerdegi órtti sóndirý óte qıynǵa soqqan, oǵan qosa qatty jel keri kedergi keltirgen. Degenmen ol tıisti qyzmetterdiń ózara áreketiniń álsizdigin moıyndady. Bul oraıdaǵy máselelerdi sheshý úshin baıandamashy jergilikti bıýdjetten bólingen qarajat esebinen jedel toptardy ratsııamen qamtamasyz etýdi usyndy. Orman qorynyń jaı-kúıi týraly barlyq jedel aqparat kórsetiletin mobıldi qosymsha ázirlep, arnaıy kıim satyp alý qajettigi de aıtyldy.

Basqosýǵa selektorlyq rejımde qatysqan aýdan ákimderine A.Orazbekov erikti órt sóndirý brıgadalarymen tyǵyz yntymaqtastyq ornatýdy usyndy.

«Osyndaı ózekti máselelerdiń bári erterek kóterilýi kerek edi. Jaýapty adamdardyń jumysyna nemquraıly qaraýy adam shyǵynyna ákelýi múmkin. Baqytymyzǵa oraı, bul joly órt myńdaǵan gektar aýmaqty sharpyǵanmen, eshkim zardap shekpedi. Bul barlyǵyna sabaq bolýy tıis. Mundaı jaǵdaılarda ózara úılesken áreketter men birlesip kúresýdiń mańyzdylyǵy zor», - dedi Berdibek Saparbaev.

TJD basshysynyń mindetin atqarýshy Maqsat Qosybaevtyń málimetinshe, jyl basynan beri oblys aýmaǵynda 241,5 ga aýmaqta 31 órt, 44 632 ga alqapta 14 orman órti, sondaı-aq, 14 ga alqapta úsh dala órti tirkelgen.

«Orman órtteri ekologııamyzǵa úlken zııan keltiredi. Mundaı jaǵdaılar der kezinde anyqtalsa olarmen kúresý ońaıyraq bolady», - dedi Berdibek Saparbaev.

Bul úshin tabıǵat qorǵaý vedomstvosynda barlyq múmkindik jetkilikti. Orman qorynyń jerlerinde 30-dan astam órtke qarsy munara men 61 beket ornatylǵan. Basqarmanyń arsenalynda 20 shaqty avtokólik, 66 soqaly traktor, 10-nan astam úsh tonnalyq ámbebap tsısterna bar. Ǵarysh monıtorıngi órttiń paıda bolý oshaǵyn esepteýge múmkindik beredi. Órt sóndirý jasaqtarynda 557 adam jumys isteıdi.

Jıyndy qorytyndylaı kele, Berdibek Saparbaev Tótenshe jaǵdaılar departamentine Tabıǵı resýrstar jáne tabıǵatty paıdalanýdy retteý basqarmasyna men orman sharýashylyǵy kásiporyndaryna ákimdiktermen birlesip jumys isteýdi, ormandy dala aımaǵynda órttiń aldyn alý sharalaryn kúsheıtýdi tapsyrdy. Aýdan ákimderine órtti sóndirýge kómektesetin eriktilerdi qoldaýdy usyndy.


Joǵary qaraı