Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Berdibek Saparbaev – Naýqastardyń 99 paıyzy ekpe almaǵandar

2021 jyldyń 1 tamyz 2021 13:16

TARAZ. QazAqparat – Jambyl oblysynyń ákimi Berdibek Saparbaev koronavırýsqa baılanysty ahýaldyń kúrdelene túsýine baılanysty óńir turǵyndaryna úndeý joldady, - dep habarlaıdy QazAqparat tilshisi.

Ákimniń aıtýynsha, oblystaǵy dertti juqtyrǵan naýqastardyń 99 paıyzy vaktsına salmaǵandar.

Aımaq basshysynyń úndeýiniń mátini Facebook, Instagram áleýmettik jelidegi óziniń jeke paraqshalarynda jarııalandy.

«Ókinishke qaraı, bizdiń aımaqta epıdemıologııalyq jaǵdaı tez nasharlaýda, koronavırýs ınfektsııasyn juqtyrǵandar sany kún saıyn artyp keledi. Bul jaǵdaı jambyldyqtardyń betperde kııýdi doǵaryp, qashyqtyqty saqtaýdy toqtatýyna baılanysty órship tur. Keı jerlesterimiz úılený toılaryn, mereıtoılardy jáne basqa da is-sharalardy adamdar kóp jınalatyn jerlerde ótkizip jatyr. Shekteý sharalaryna qaramastan, oqý oryndarynyń túlekterine saltanatty is-sharalar uıymdastyrý faktileri jıi kezdesedi.

Vırýstyń odan ári taralýyn boldyrmaý úshin biz azamattarymyzdyń densaýlyǵyn barynsha qorǵaýymyz kerek. Osy maqsatta Jambyl oblysynda jańa shekteý sharalary engiziledi. Bul barlyq egjeı-tegjeıli aqparat buqaralyq aqparat quraldary arqyly jurtshylyqqa jetkiziledi»,-delingen oblys ákiminiń úndeýinde.




Sondaı-aq, Berdibek Saparbaev aldaǵy ýaqytta oıyn-saýyq mekemeleri, sport jáne mádenıet obektileri, bazarlar men qoǵamdyq kólik qosymsha shekteýlermen jumys isteıtindigin eskertken.

«Osy aıtylǵan barlyq qaýipsizdik sharalary, eń aldymen, sizdi jáne sizdiń jaqyndaryńyzdyń densaýlyǵyn, ómirin saqtaýǵa baǵyttalǵan.

Jergilikti atqarýshy organdar Jambyl oblysy boıynsha Polıtsııa departamentimen birlesip, oıyn-saýyq oryndarynda, qoǵamdyq oryndarda karantın shekteýleriniń saqtalýyn baqylaýy tıis. Tártip pen tabandylyqtyń arqasynda ýaqytsha qıyndyqtardy jeńetinimizge kúmánim joq»,-dedi aımaq basshysy.

Oblys ákimi, azamattardy karantın rejımin, sanıtarlyq talaptardy qatań saqtaýǵa shaqyryp, ujymdyq ımmýnıtetti qalyptastyrý úshin koronovırýs ınfektsııasyna qarsy vaktsınatsııanyń mańyzdylyǵy týraly taǵy da eske salyp ótti.

«Memleket basshysy Qasym-Jomart Toqaev atap ótkendeı, jalpyǵa birdeı vaktsınatsııa – bul qalypty ómirdi qalpyna keltirýdiń jáne adamdardyń densaýlyǵyn saqtaýdyń jalǵyz joly»,-dep túıindelgen B. Saparbaevtyń jambyldyqtarǵa jasaǵan úndeýi.


Joǵary qaraı