Aýa raıy
Astana -16 °S
Almaty -3 °S
valıýta baǵamy
USD 421.58
EUR 496.83
RUB 5.53
CNY 62.20

Beıbit Atamqulov Koreıanyń Qazaqstandaǵy Elshisimen kezdesti

2020 jyldyń 15 qazan 2020 11:26

NUR-SULTAN. QazAqparat - QR Indýstrııa jáne ınfraqurylymdyq damý mınıstri Beıbit Atamqulov Koreıa Respýblıkasynyń Qazaqstandaǵy Tótenshe jáne Ókiletti Elshisi Ký Hong-sokpen kezdesti, dep habarlaıdy QazAqparat atalmysh vedomostvonyń baspasóz qyzmetine silteme jasap.

Taraptar Koreıa Prezıdenti Mýn Chje Innniń Qazaqstanǵa ótken jylǵy sapary elderimiz arasyndaǵy ekijaqty yntymaqtastyqqa qosymsha serpin bergenin atap ótti.

Kezdesýde ınfraqurylym, ónerkásip, kólik, ınvestıtsııalar, aýyl sharýashylyǵy jáne densaýlyq saqtaý salalaryndaǵy ekijaqty yntymaqtastyqty tereńdetý perspektıvalary qaraldy.

Qazaqstan - Koreıanyń Ortalyq Azııadaǵy iri saýda seriktesi. 2019 jyly eki eldiń taýar aınalymy 6,5 mlrd AQSh dollaryn qurady. Koronavırýs pandemııasyna qaramastan Koreıa 2020 jyldyń basynan Qazaqstanmen taýar aınalymynyń (4,3 mlrd doll.) oń dınamıkasyn kórsetken tórt eldiń biri bolyp otyr.




Taraptar bul túrli salalardaǵy yntymaqtastyqtyń 58 baǵytyn qamtıtyn «Samal jel» birlesken ekonomıkalyq baǵdarlamasyn iske asyrýdyń nátıjesi ekenin atap ótti.

Koreıa birlesken kásiporyndar sany boıynsha alys shet elderdiń ondyǵyna kirdi. Qazaqstanda koreı kapıtalynyń qatysýymen 20 joba iske qosyldy (Lotte, Hyundai, Dongil Construction (Highvill) jáne basqalar sııaqty), sondaı-aq 30-ǵa jýyq joba iske asyrylyp, pysyqtalyp jatyr. Jalpy, Qazaqstanda mashına jasaý, qurylys, densaýlyq saqtaý jáne t. b. salalarda Koreıanyń qatysýymen 500-den astam kásiporyn jumys isteıdi.




Eki el arasyndaǵy ózara is-qımyldyń jarqyn úlgileriniń biri Almaty qalasynda ashylǵan «Hyundai Trans Kazakhstan» JShS zaýyty ekenin atap ótken jón. Sondaı-aq, koreı-túrik konsortsıýmynyń qatysýymen Úlken Almaty aınalma avtojolyn (ÚAAAJ) salý Almaty aglomeratsııasy úshin óte mańyzdy.




Sonymen qatar, taraptar qazaqstan-koreı Úkimetaralyq komıssııasynyń aldaǵy 9-shy otyrysyn uıymdastyrý máselelerin talqylady. Mınıstr atalǵan is-sharany tabysty ótkizý eki el yntymaqtastyǵyn odan ári damytýǵa jáne nyǵaıtýǵa eleýli úles qosatynyn atap ótti.

Kezdesý sońynda taraptar Qazaqstan men Ońtústik Koreıa arasyndaǵy ekijaqty saýda-ekonomıkalyq qatynastardy qarqyndy damytý úshin bar kúsh-jigerdi jumsaýǵa daıyn ekendikterin bildirdi.








Joǵary qaraı