Aýa raıy
Astana 5 °S
Almaty 10 °S
valıýta baǵamy
USD 421.58
EUR 496.83
RUB 5.53
CNY 62.20

Beıbit jınalystar zań jobasynda usynystarymyz eskerildi – ǵylym kandıdaty

2020 jyldyń 21 mamyr 2020 21:50

PETROPAVL. QazAqparat – Azamattyq qoǵamda ár adam óz kózqarasyn bildirý úshin beıbit mıtıngke shyǵyp, túrli sherýlerdi uıymdastyrýǵa quqyly. Mundaı pikirdi zań ǵylymdarynyń kandıdaty, M.Qozybaev atyndaǵy Soltústik Qazaqstan Memlekettik ýnıversıtetiniń quqyqtyq pánder kafedrasynyń dotsenti Gúlbaqsha Musabaeva bildirdi, dep habarlaıdy «QazAqparat» tilshisi.

G.Musabaeva zań jobasy órkenıetti quqyqtyq mádenıetti qalyptastyratyn zańnama bolatyndyǵyna senimi mol ekenin atap ótti.

«Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» zań jobasy aqpan aıynan beri qyzý talqylanyp keledi. Soltústik Qazaqstan oblysynda da úkimettik emes uıymdardyń ókilderi, qoǵamdyq birlestikterdiń jetekshileri, qoǵam qaıratkerleri men ǵalymdar jınalyp, bul qujat jaıynda óz oılaryn aıtyp, usynystaryn bildirdi.

«Jıyn barysynda otyzdan astam usynys aıtyldy. Búginde sol usynystarymyz nazarǵa alynǵanyna qýanyp otyrmyz. Sonyń biri –jýrnalısterge qatysty. Buǵan deıin zań jobasynda «Jýrnalıst» degen 8-10 tarmaqtan turatyn bólek bap boldy. Onda mıtıng kezinde BAQ ókilderiniń áreketin qadaǵalaıtyn, saldarynan olardyń jumysyn shekteýi múmkin birneshe talaptar qarastyryldy. Qazirgi zań jobasyna ol bap «Jýrnalıst qyzmeti» dep ózgertilip, tarmaqtar sany jýrnalıstiń naqty quqyǵy men mindetin kórsetetin eki tarmaqqa deıin qysqartyldy. BAQ ókili endi beıbit sherý barysynda qyzmettik kýáligin kórsetýge mindetti emes. Meniń pikirimshe, mundaı erejeler zańda qaralmaýy tıis, zańǵa táýeldi bólek akt bolýy qajet», - deıdi Gúlbaqsha Musabaeva.

Ǵalymnyń pikirinshe, zań jobasynyń kóptiń talqysyna túsýi, Parlamenttiń qoǵam ókilderiniń aıtqan tolyqtyrýlaryn eskerip, ony engizýi lıberaldy jumys úlgisiniń qalyptasa bastaǵanyn ańǵartady.

«Zań jobasynda beıbit pıket, mıtıng jáne jıyndardy ótkizý úshin habarlandyrý tártibi engizilmek. Eger de jergilikti atqarýshy organ beıbit jınalysty ótkizý týraly jaýap bermese, bul únsiz kelisim bolyp esepteledi. Desek te mundaı jıyndardy ótkizý úshin jergilikti atqarýshy organnyń kelisimin alý kerek. Sondaı-aq jekelegen qatysýshylardyń zańsyz áreketi úshin beıbit jınalysty toqtatýdyń qajeti joqtyǵy da aıtyldy, ol da eskerildi», - deıdi Gúlbaqsha Musabaeva.

Beıbit jınalystardy ótkizý arqyly azamattar ózderin tolǵandyrǵan máseleler boıynsha kózqarastaryn bildire alady. Gúlbaqsha Musabaevanyń pikirinshe, bul zańdy ekonomıkalyq daǵdarys jaǵdaıynda talqylap, qabyldaý durys sheshim bolmaq.


Joǵary qaraı