Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Bilim mekemesi bir dápterdi 95 myń teńgege satyp almaqshy bolǵan - Aqmola oblysy

2021 jyldyń 15 qazan 2021 14:49

KÓKShETAÝ. QazAqparat – Aqmola oblysynda memlekettik satyp alý arqyly bir dápterdi 95 myń teńgege satyp almaqshy bolǵan. Bul týraly Aqmola oblysy boıynsha sybaılas jemqorlyqqa qarsy is-qımyl departamentiniń basshysy Arman Rahımovtyń qatysýymen ótken baǵany kóterý jáne bıýdjet qarajatyn maqsatsyz paıdalanýdy boldyrmaý faktilerin anyqtaý maqsatynda memlekettik satyp alý monıtorınginiń nátıjeleri týraly onlaın-brıfıngte aıtyldy, dep habarlaıdy QazAqparat tilshisi.

«Memlekettik satyp alý salasy sybaılas jemqorlyq is-áreketterin jasaý úshin qolaıly orta bolyp tabylatyny eshkimge qupııa emes, jyl saıyn osy salada myńdaǵan zań buzýshylyqtar anyqtalady. Osyǵan oraı, Sybaılas jemqorlyq táýekelderiniń aldyn alý úshin Departament «satyp alýdyń biryńǵaı terezesi» portaly arqyly memlekettik satyp alýlarǵa monıtorıng júrgizedi, onyń qorytyndysy boıynsha memlekettik organdar men uıymdarǵa tıisti usynymdar joldanady», - dedi Arman Rahımov.

Osylaısha, jyl basynan beri monıtorıng sheńberinde Departament engizgen usynymdardan keıin satyp alýǵa josparlanǵan taýarlarǵa, jumystarǵa jáne qyzmetterge joǵary baǵalardy tómendetý arqyly 1 mıllıard teńgeden astam qarajat únemdeldi.

Mysaly, Aqmola oblysy aýdandarynyń birindegi bilim mekemesi 14 250 000 teńgege nemese bir danasyn 95 myń teńgege dápter satyp alýdy josparlaǵan. Al 1 dápterdiń ortasha naryqtyq baǵasy - 60 teńge. Departamenttiń ýaqtyly aralasýynyń arqasynda satyp alý toqtatyldy jáne bıýdjet qarajaty únemdeldi. Mekemeniń túsindirýi boıynsha, dápterdiń baǵasynyń belgilengen baǵadan joǵary bolýyna memlekettik satyp alý portaly ákimshisiniń jibergen qateligi sebep bolǵan.

Sondaı-aq, «Eńbek – Kókshetaý» ShJQ RMK fılıaly memlekettik satyp alý arqyly jalpy somasy 6 mıllıon teńgege nemese 1 kg úshin 200 teńgege suly satyp almaqshy bolǵan. Al sulynyń naryqtyq baǵasy-90 teńgeni quraıdy. Osylaısha Departamenttiń ýaqtyly aralasýynyń arqasynda memlekettik satyp alýda usynylǵan baǵa tómendetilip, 3 mıllıon teńgeden astam qarjy únemdeldi.

Osy rette, Sybaılas jemqorlyqqa qarsy óńirlik qyzmettiń basshysy aqmolalyqtardy bıýdjet qarajatynyń jumsalýyn qoǵamdyq baqylaý aıasynda belsendi azamattyq ustanym tanytýǵa shaqyrady.



Joǵary qaraı