Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Bir top qazaqstandyq Sırııadan otanyna oraldy

2021 jyldyń 4 aqpan 2021 12:45

NUR-SULTAN. QazAqparat - 4 aqpan kúni Qazaqstan Respýblıkasynyń Ulttyq qaýipsizdik komıteti men QR Syrtqy ister mınıstrligi birlese otyryp AQSh jáne ózge de halyqaralyq seriktesterdiń qoldaýymen qazaqstandyq bir top azamatty Sırııadan elge qaıtarý operatsııasyn ótkizdi, dep habarlaıdy QazAqparat.

QR SІM-nen málim etkendeı, top quramynda 4 er adam, 1 áıel jáne 7 bala (2-eýi – jetim) boldy.

«Ulttyq zańnamaǵa jáne halyqaralyq mindettemelerge sáıkes, terrorıstik is-áreketke qatysqan adamdar qylmystyq jaýapkershilikke tartylady. Jetim balalar jaqyn týystarynyń qamqorlyǵyna beriledi jáne memleket tarapynan olarǵa barlyq qajetti kómek kórsetiledi.

Áıelder men balalar ońaltý jáne qaıta áleýmettendirý baǵdarlamalarymen qamtamasyz etiledi», - dedi mınıstrlikten.

Terrorıstik áreketter belsendi júrgizilip jatqan aımaqtardan azamattarymyzdy qaıtarý operatsııasyn Qazaqstan Prezıdenti Qasym-Jomart Toqaev sanktsııalaǵan jáne ol Tuńǵysh Prezıdent - Elbasy Nursultan Nazarbaev bastaǵan «Jýsan» operatsııasynyń jalǵasy bolyp tabylady.

Eske salaıyq, «Jýsan» gýmanıtarlyq operatsııasynyń tórt kezeńi byltyrǵy aqpan aıynda qorytyndylanǵan bolatyn.

«2019 jyly QR Ulttyq qaýipsizdik komıtetiniń úılestirýimen Sırııadan 595 Qazaqstan azamaty qaıtaryldy. Operatsııanyń birinshi kezeńinde 47 adam, onyń ishinde 6 er adam, 11 áıel jáne 30 bala, ekinshi kezeńinde 231 adam, onyń ishinde 16 er adam, 59 áıel jáne 156 bala (18 jetim), úshinshi kezeńinde 246 adam, onyń ishinde 8 er adam, 67 áıel jáne 171 bala (9 jetim), tórtinshi kezeńinde 71 adam, onyń ishinde 3 er adam, 19 áıel jáne 49 bala (5 jetim) elge jetkizildi. Osylaısha, jalpy Sırııadan qaıtarylǵandar sany – 595 azamat (33 er adam, 156 áıel, 406 bala (32 jetim)», - degen bolatyn QR Ulttyq qaýipsizdik komıtetinen.

Keıin, qaqtyǵys aımaqtarynan Qazaqstan azamattaryn Otanyna qaıtarý boıynsha sharalar jalǵasyn tapty. 7 jáne 9 mamyr kúnderi Sırııadan 231 Qazaqstan azamaty elge jetkizildi, onyń 156-sy – balalar. Osy oraıda, Prezıdent Qasym-Jomart Toqaev málimdeme jasaǵan bolatyn.





Joǵary qaraı