Aýa raıy
Astana -14 °S
Almaty -3 °S
valıýta baǵamy
USD 421.58
EUR 496.83
RUB 5.53
CNY 62.20

Bıyl qatań shekteý sharalaryn engizý qajettigin boldyrmaýymyz kerek - Toqaev

2020 jyldyń 7 qazan 2020 15:54

NUR-SULTAN. QazAqparat - Qasym-Jomart Toqaev koronavırýs indetiniń ekinshi kezeńine daıyndyq jóninde keńes ótkizdi, dep habarlaıdy QazAqparat.

Aqordanyń baspasóz qyzmetiniń málimetinshe , Qazaqstan Prezıdenti óz sózinde kóptegen elde epıdemıologııalyq ahýaldyń nasharlaǵanyn atap ótip, osyǵan baılanysty ahýal ýshyqqan jaǵdaıda oǵan memlekettik organdardyń daıyn bolýy qajet ekenin aıtty. Qasym-Jomart Toqaev túıtkildi máselelerdi aıta kele, test synamalaryn alý kóleminiń azaıǵanyna nazar aýdardy.

– Búkil álemde zerthanalar jelisiniń keńeıgenine jáne testileý baǵasynyń tómendegenine qaramastan, elimizde onyń quny joǵary bolyp otyr: 10 myńnan 18 myń teńgege deıin. Turǵyndardyń basym bóligi úshin bul baǵa qymbat dep oılaımyn. Úkimet pen ákimdikter test synamasyn alýdyń qarjylaı qoljetimdiligi máselesin sheshýi kerek. Sonymen qatar basqa eldermen, sonyń ishinde, Reseımen salystyrǵanda betperdelerdiń baǵasy áli de sharyqtap tur. Onyń da baǵasyn tómendetý qajet. Úkimet betperdelerdiń bólshek saýdadaǵy shekti baǵasyn 60 teńge kóleminde bekitýdi josparlap otyr. Maǵan habarlaǵan málimet boıynsha, Reseıde bul baǵa 20-30 teńge shamasynda. Básekelestikti qorǵaý jáne damytý agenttigine mundaı baǵalardyń sáıkestigine taldaý jasap, zerthanalyq qyzmetter men jeke qorǵanysh quraldarynyń baǵalaryna monıtorıng júrgizýdi tapsyramyn, — dedi Memleket basshysy.

Prezıdent el turǵyndarynyń jaz maýsymynda dári-dármek tapshylyǵyn kórgenin jıynǵa qatysýshylardyń esine saldy. Qasym-Jomart Toqaevtyń tapsyrmasynan keıin ǵana tıisti sharalar qabyldandy. Atap aıtqanda: dári-dármekterdiń eki aılyq qory jasaqtalyp, qajetti preparattardyń tizimi keńeıtildi, sondaı-aq, olardy shetelden ákelý jáne tirkeý tártibi jeńildetildi.

Memleket basshysy pandemııanyń ekinshi tolqyny bolǵan jaǵdaıda negizgi salmaq taǵy da medıtsına qyzmetkerlerine túsetinin atap ótti. Prezıdenttiń tapsyrmasy boıynsha ekinshi jartyjyldyqta tólemaqy úshin 150 mıllıard teńgeden astam qarjy bólingen. Biraq ústemaqy jáne saqtandyrý tólemderin alýda áli kúnge deıin bıýrokratııalyq kedergiler bar.

– Jergilikti jerlerde ústemaqyǵa qatysty «tsıfrmen oınaý» máselesi jalǵasýda. Bul qarjy bólý isinde osy ýaqytqa deıin ashyqtyq joq. Mundaı jaǵdaıdy boldyrmaý qajet. Bas dárigerler jumys ýaqytynyń esebin túzetýdi medıtsına qyzmetkerleriniń paıdasyna emes, kerisinshe jasaýǵa tyrysyp júr. Dárigerler ózderine tıesili aqshany surap almaýy tıis. 30 qyrkúıektegi málimet boıynsha pandemııa kezinde bul indetten 182 medıtsına qyzmetkeri kóz jumdy. Qazirgi kezde bul jaǵdaılardy túrli komıssııalar qarastyrýda. 37 otbasyna ǵana járdemaqy tólendi. Mundaı jaǵdaıǵa múlde jol bermeý kerek. Ólim sebepterin adam qaıtys bolǵannan keıin anyqtaý kóptegen qıyndyqtar, sonyń ishinde, etıkalyq sıpattaǵy túıtkilderdi týyndatady. Osy oraıda Úkimetke qaıtys bolǵan medıtsına qyzmetkerleriniń otbasylaryna egjeı-tegjeıli tergeý júrgizbeı, tıisti barlyq járdemaqyny tóleýdi tapsyramyn. Medıtsına qyzmetkerleriniń qyzmet barysynda naýqasqa shaldyǵýy rastalǵan jaǵdaıda olardyń tólemaqylary qysqa merzim ishinde sózsiz tólenýi tıis, – dedi Prezıdent.

Prezıdent óz sózinde basqa da aýrý túrleri boıynsha tıisti medıtsınalyq kómek kórsetýdiń mańyzdylyǵyn atap ótti. Memleket basshysy ana men bala densaýlyǵyn qorǵaý boıynsha jaǵdaıdyń nasharlaǵanyna arnaıy toqtaldy.

– Byltyrǵy 8 aıda – 36 áıel qaıtys bolsa, bıylǵy 8 aıda – 131 áıel qaıtys boldy. Mysaly, Aqtóbe oblysynda bul kórsetkish shamamen 13 ese, Qyzylorda oblysynda 9 ese, Shymkent qalasynda 7 ese artty. Nege bul adamdarǵa kómek kórsetilmedi? Qandaı sharalar qabyldanyp jatyr? Úkimetke óńirlermen birlesip, atalǵan faktilerdiń árqaısysyn tekserip, nátıjesin baıandaýdy tapsyramyn. Ana men balany qorǵaý, onkologııalyq, kardıologııalyq, pýlmonologııalyq jáne medıtsınalyq kómektiń basqa da túrlerin kórsetý – el aldyndaǵy mindetimiz. Ákimderdi, jalpy Úkimetti bul mindetten eshkim bosatqan joq, – dedi Qasym-Jomart Toqaev.

Sonymen qatar keńeste basqa da máseleler qarastyryldy. Prezıdent halyqtyń tynys-tirshiligin qamtamasyz etetin qyzmetterdiń úzdiksiz jumys isteýiniń mańyzdylyǵyn atap ótti. Memleket basshysynyń pikirinshe, azyq-túlik qaýipsizdigi men áleýmettik mańyzy bar taýarlardyń baǵalaryna qatysty máseleler erekshe nazar aýdarýdy qajet etedi.

Qasym-Jomart Toqaev Qazaqstandy eldegi ekonomıkalyq belsendiliktiń kúrt tómendeýinen shyǵa aldy dep esepteıdi. Bıznesti yntalandyrý jóninde sharalar qabyldanyp, turǵyndardyń az qamtylǵan toptaryna kómek kórsetildi. Dúnıejúzilik bank elimizdiń áleýmettik-ekonomıkalyq damýynyń negizgi kórsetkishteriniń qarqynyn joǵary baǵalady. Bul rette, búkil álem boıynsha pandemııanyń jaqyndap kele jatqan ekinshi tolqyny jańa mindetter júkteıdi.

Prezıdent sóziniń sońynda halyqpen qarym-qatynas jasaýdyń jáne keri baılanys ornatýdyń asa mańyzdy ekenine nazar aýdardy.

– Pandemııaǵa qarsy kúrestegi tabys, negizinen, halyqtyń qabyldanǵan sharalar men sheshimderge degen seniminiń deńgeıine baılanysty. Muny tájirıbe kórsetti. Al, senim azamattardyń bılik tarapynan atqarylyp jatqan is-qımyldarǵa túsinistik tanytyp, qoldaý kórsetýine baılanysty. Halyqpen turaqty dıalog jasap otyrý kerek jáne turǵyndarǵa týyndaǵan máseleler men qaterdi shynaıy ári ashyq aıtyp, ony sheshýdiń joldaryn usyný qajet. Jaǵdaıdyń ýshyǵýy sanıtarlyq jáne aldyn alý sharalaryn qatań saqtaýǵa baılanysty ekenin bıznes ókilderi men azamattarymyz túsinýge tıis. Shynaıy jáne optımıstik jaǵdaılar boıynsha bıyl qatań shekteý sharalaryn engizý qajettigin boldyrmaýymyz kerek jáne oǵan múmkindigimiz bar, – dedi Memleket basshysy.

Jıynda Premer-Mınıstr Asqar Mamın, Densaýlyq saqtaý mınıstri Alekseı Tsoı, Nur-Sultan qalasynyń ákimi Altaı Kólginov, Almaty qalasynyń ákimi Baqytjan Saǵyntaev, Shymkent qalasynyń ákimi Murat Áıtenov, sondaı-aq, Atyraý oblysynyń ákimi Mahambet Dosmuhambetov sóz sóıledi.

Prezıdent Qasym-Jomart Toqaevtyń jıynda sóılegen sóziniń tolyq mátinimen siltemeden tanysa alasyzdar.


Joǵary qaraı