Aýa raıy
Astana 10 °S
Almaty 10 °S
valıýta baǵamy
USD 421.58
EUR 496.83
RUB 5.53
CNY 62.20

Bıyl Qordaı halqynyń 95 paıyzy gazben qamtylady

2020 jyldyń 29 qyrkúıek 2020 06:33

QORDAI. QazAqparat – Buǵan deıin Jambyl oblysy Qordaı aýdany halqynyń 30 paıyzy ǵana tabıǵı gaz tutynyp kelse, bıylǵy gazdandyrý jobasy aıaqtalǵan kezde qordaılyqtardyń 95 paıyzy kógildir otynǵa qol jetkizedi, dep habarlaıdy QazAqparat tilshisi.

Bıyl 150 myńǵa jýyq turǵyny bar Qordaı aýdanynyń áleýmettik-ekonomıkalyq áleýetin ilgeriletýge bıýdjet qarajatynan qosymsha 31 mıllıardtan astam teńge bólinip, ıgerilip jatyr.

Oblys ákimi Berdibek Saparbaev Qordaı aýdanyndaǵy jumys saparyn Otar aýyldyq okrýgi janyndaǵy avtomattandyrylǵan gaz taratý stansasynyń qurylysymen tanysýdan bastady. Bul jobanyń quny 1 mıllıard 50 mıllıonnan teńgeden asady.

Merdiger kompanııa – «Tarazstroı-2004» JShS. Bıylǵy 10 tamyzda bastalǵan qurylys aldaǵy jeltoqsan aıynyń basynda aıaqtalýy tıis. Bul stansaǵa kógildir «Qazaqstan – Qytaı» jerasty gaz qubyrynan «kógildir otyn» alynyp, Qordaı aýdanynyń 12 aýylyn gazdandyrý kózdelip otyr. Qazir munda 10 maman, 20 jumysshy turaqty eńbek etýde. Jalaqy 90-95 myń teńgeden kem emes.

Oblys basshysyna mundaǵy jumystar týraly «Tarazstroı-2004» JShS-nyń basshysy Sembek Turdalıev baıandady. Oblystyq energetıka jáne kommýnaldyq sharýashylyq basqarmasynyń basshysy Qudaıbergen Qorǵanbaev kestege sáıkes Batys munaı jabdyqtaý kompanııalarymen kelisim bar ekenin, endi úsh qondyrǵy jáne daıyn bloktar keletinin atap ótti.

Qordaıdyń kúnshyǵys jaǵy boıynsha (Otar aımaǵy) 12 aýylǵa gaz tartýdy, qubyr tartýdy «Baısyn-A» JShS júzege asyrady. Jobanyń jalpy quny 4 mıllıard 37 mıllıon teńgege jýyq. Tamyzdyń alǵashqy kúnderinde bastalǵan bul qurylystyń da aıaqtalýy tórt aı merzimge belgilengen.

Jumysqa 60 adam, 28 tehnıka jumyldyrylypty. 21 brıgada tynymsyz jumys júrgizip jatyr. Qazir jumystyń 25 paıyzy bitipti.

Qordaı aýdany ákiminiń orynbasary Erlan Orynbaevtyń aıtýynsha, aǵymdaǵy jyly qurylys jumystaryna qosymsha 31 mıllıard teńge bólingen.

«Aýdannyń 22 eldi mekeni gazben qamtylady. Atap aıtqanda búgingi kúni 10 eldi mekenge magıstraldyq gaz qubyry tartylyp, on eldi mekenge ishki qubyrlar júrgizilýde. Aǵymdaǵy jyly 100 myń adamdy kógildir otynmen qamtý josparlanyp otyr. 6 eldi mekende taza aýyzsý qubyry tartylyp, 4 aýylda sporttyq-saýyqtyrý keshenderi salynyp, Budan bólek 4 kópqabatty turǵyn úı (230 páterli), el ıgiligine berilgeli otyr», - dep atap ótti E.Orynbaev.

Kelesi sátte Berdibek Saparbaev Otar aýylynda qurylysy júrip jatqan aýyldyq Mádenıet úıi jáne sporttyq-saýyqtyrý kesheniniń qurylysymen tanysty, qurylys jumystaryn «Taraz – Іsmer» kompanııasy qolǵa alǵan. Joba quny – 323 mıllıon teńge.

Aımaq basshysynyń buǵan deıingi issaparynda turǵyndar aýylda Mádenıet úıi boı kóterip, «kógildir otyn» kelse degen tilekterin aıtqan edi. Bul baǵyttaǵy jumystar bastalyp ta ketti.

Oblys basshysy atalǵan aýyl aqsaqaldarymen jáne aq jaýlyqty analarmen amandasyp, áńgimelesýdi de umytpady. Olardy Otar aýylyna «kógildir otyn» bıylǵy jyldyń aıaǵyna deıin keletinin aıtyp qýantty.

«Joba boıynsha gaz qubyry ár kóshege tartylady. Ony úıge kirgizý quny bir otbasy úshin – 350 myń teńge. Bul qarajat ózderińizden shyǵady. Biraq barynsha jeńildikter qarastyrylady. Mysaly, bıyl 100 myń teńge tólep, qalǵanyn kelesi jyly óteýge bolady», – dep túsindirdi aýdan ákimi Rústem Dáýlet.

Oblys ákimi Aýqatty aýylynyń turǵyndarymen kezdesip, ár úıge «kógildir otynnyń» tartylýyna baılanysty máselelerge mán berdi.

Budan keıingi sapar Sortóbe aýylynda jalǵasty. Sortóbe aýyldyq okrýginiń ákimi Іlııas Bularovtyń aıtýynsha, aýyldaǵy 1646 aýlanyń 1200 aýlasynda kógildir otyn kirgizý máselesi sheshilgeli otyr.

Oblys ákimi Masanshy aýylynda da boldy. Munda da turǵyndardyń 90 paıyzy «kógildir otyndy» úılerine kirgizýge kelisim berip, jaqsy jańalyqqa qýanyp otyr. Sondaı-aq munda Qordaı «InteLLec « kópsalaly kolledji salynyp jatyr. Kolledj 2022 jyly iske qosylady.

Qarakemer aýylynda da kógildir otynnyń kelýine qýanyp jatqan turǵyndar kóp. Aýyldyq okrýg ákimi Juldyzbek Bahaevtyń aıtýynsha, 9 kósheniń 7-eýinde gazdandyrý aldyndaǵy jumystar qarqyndy júrýde.


Joǵary qaraı