Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Bıyl saılanǵan aýyl ákimderi biliktiligin arttyrý kýrsynan ótedi

2021 jyldyń 25 tamyz 2021 22:07

NUR-SULTAN. QazAqparat – Bıyl shildede Qazaqstanda alǵash ret aýyl ákimderiniń saılaýy ótti. Elimizdiń túkpir-túkpirinen 730 aýyl ákimi saılandy. Jyl sońyna jańa saılanǵan ákimder óz biliktilikterin arttyratyn bolady.

Bul týraly QR Ulttyq ekonomıka mınıstrligi Óńirlerdi taldaý jáne jergilikti ózin-ózi basqarýdy damytý departamenti dırektorynyń orynbasary Mırjan Imanbaev málim etti, dep habarlaıdy QazAqparat tilshisi.

«Bıyl shildede elimizde alǵash ret aýyl ákimderiniń saılaýy ótti. Nátıjesinde barlyq óńir boıynsha 730 aýyl ákimi saılandy. Búginde olar óz qyzmetine kirisip te ketti. Olardyń arasynda memlekettik qyzmette burynnan eńbek etip kele jatqandarmen qatar, tájirıbesi az mamandar da bar. Osy oraıda jańa saılanǵan aýyl ákimderi 3 aptalyq biliktiligin arttyrý kýrsynan ótedi. Ony QR Prezıdenti janyndaǵy Memlekettik basqarý akademııasy uıymdastyrady. Onda jańa ákimderdi memlekettik satyp alý, bıýdjet, kiris pen shyǵysty durys esepteýge úıretedi. Odan bólek, halyqpen qarym-qatynas ıaǵnı kópshilikpen jumys isteı bilýdi úırenedi. Sondaı-aq, memlekettik qyzmetker bilýi tıis zańdardy tyńdap shyǵady», - dedi Mırjan Imanbaev.

Mınıstrlik ókiliniń málimetinshe, aýyl ákimderiniń kýrsy jyldyń sońyna deıin ótedi. Jáne ol onlaın túrde, ákimderdiń ýaqyty bos kezde uıymdastyrylady.

Buǵan deıin M. Imanbaev elimizde aýyl, aýdan jáne qala mártebesin berý standarty ázirlenetinin aıtty.

Sondaı-aq, Ulttyq ekonomıka mınıstrligi ókiliniń málimdeýinshe, elimizde aýyl ákimdigi apparatynyń qyzmetin uıymdastyrý qaıta qaralady.

Odan bólek, Qazaqstanda jergilikti ózin-ózi basqarýdyń 2021-2025 jyldarǵa arnalǵan tujyrymdamasy qabyldandy.

Atalǵan tujyrymdama aıasynda 2024 jyldan bastap elimizdiń aýyldyq eldi mekenderinde arnaıy keńes qurylmaq.



Joǵary qaraı