Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Bıyl Jambyl oblysynda 11 turǵyn brýtsellezge shaldyqqan

2021 jyldyń 14 mamyr 2021 14:56

TARAZ. QazAqparat – Jambyl oblysynyń ákimi Berdibek Saparbaevtyń tóraǵalyǵymen ótken kezekti basqosýda aımaqtaǵy epızootııalyq jaǵdaı talqylandy, dep habarlaıdy QazAqparat tilshisi.

Oblystyq veterınarııa basqarmasynyń basshysy Erbol Jıenqulovtyń habarlaýynsha, óńirlerde mal aýrýlary boıynsha ahýal turaqty.

Jospar boıynsha barlyq aýdanda epızootııaǵa qarsy sharalar júrgizilýde.

«Brýtsellezben kúres júıeli túrde júrgizilip jatyr. Eger ınfektsııa zerthanada rastalatyn bolsa, onda ol aýmaqqa shuǵyl tekserý júrgizilip, epızootııalyq oshaqtyń shekaralary aıqyndalady. Osylaısha, aýrýdyń taralýyna jol berilmeıdi. Aýrý janýarlar sanıtarlyq soıýǵa jiberiledi», - deıdi spıker.

QR Aýyl sharýashylyǵy mınıstrligi veterınarııalyq baqylaý jáne qadaǵalaý komıtetiniń óńirlik ınspektsııasynyń basshysy Jandar Kókeev oblys boıynsha 234391 bas iri qara jáne 1154816 bas usaq mal tekserilgenin aıtty.

Aǵymdaǵy jyldyń tórt aıynda 11 jambyldyq turǵyn brýtsellez juqtyrsa, bul ótken jylmen salystyrǵanda bes adamǵa az.

Oblys ákimi mal ósirýshilerge ýaqytyly veterınarııalyq kómek kórsetýdi, mal aýrýlarynyń aldyn alý jáne dıagnostıkalaý jumystaryn der kezinde júrgizýdi talap etti.

Erbol Jıenqulov taǵy bir máselege toqtalyp ótti.

Jambyl oblystyq máslıhatynyń sheshimimen ótken jyldyń jeltoqsan aıynda ıtter men mysyqtardy asyraý jáne serýendetý, qańǵybas ıtter men mysyqtardy aýlaý qaǵıdalary qabyldanǵan bolatyn.

Taraz qalasynda úsh brıgada jáne 10 aýdandyq brıgada qańǵybas ıtter men mysyqtardy aýlaýmen aınalysady.

«Áleýmettik jelilerde turǵyndar qańǵybas janýarlardy ustaý máselesi sheshilmeı otyrǵanyna jıi shaǵymdanýda. Nege ol boıynsha tıisti vedomstvo shara qoldanbaı otyr?» - dep surady oblys ákimi.

Erbol Jıenqulov qańǵybas ıt-mysyqtardy ustaýǵa arnalǵan úı-jaı salýǵa qarjy qarastyrylmaǵandyqtan birqatar qıyndyqtar týyndap otyrǵanyn tilge tıek etti.

Ol bul oraıda osy máselege beıjaı qaramaıtyn turǵyndardyń kómegi kerektigin alǵa tartty.

Salalyq basqarma basshysy basqa da máselelerge, naqtyraq aıtqanda materıaldyq-tehnıkalyq bazanyń álsizdigin, qural-jabdyqtardyń eskirgenin, aýyldyq okrýgterdiń barlyǵy birdeı veterınarııalyq pýnkttermen qamtylmaǵanyna nazar aýdartty.

Berdibek Saparbaev aýdan ákimderinen bul máselelerdi sheshýdi talap etti.

Aımaq basshysy sondaı-aq, keıbir aýyldarda mal soıý alańdarynyń jaǵdaıy nashar ekenin atap ótti.

«Maǵan «kemshilikterdi joıamyz» degen syrǵytpa jaýap qajet emes. Talqylanǵan búkil másele mindetti túrde sheshimin tabýy tıis. Veterınarlyq qyzmet – jergilikti atqarýshy organdar jumysynyń asa mańyzdy baǵyttarynyń biri ekenin esten shyǵarmańyzdar. Onyń adam densaýlyǵy, aýyldardyń ekonomıkalyq ál-aýqatyna áserin eskerý mańyzdy», - dep túıindedi Berdibek Saparbaev.


Joǵary qaraı