Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Biz bılikke jetý úshin emes, Táýelsiz Qazaqstannyń múddesi úshin jumys isteımiz – Ashat Oralov

2022 jyldyń 19 naýryz 2022 14:37

ALMATY. QazAqparat - Biz bılikke jetý úshin emes, Táýelsiz Qazaqstannyń múddesi úshin jumys isteımiz. Almatyda Prezıdenti Qasym-Jomart Toqaevtyń Joldaýynda jarııalanǵan saıası reformalar baǵdarlamasyn qoldaý maqsatynda ótken mıtıngte «AMANAT» partııasynyń Atqarýshy hatshysy Ashat Oralov osylaı dedi, dep habarlaıdy QazAqparat.

«Bizdiń baǵytymyz – aıqyn, maqsatymyz – ortaq. Biz – kózi ashyq, kókiregi oıaý azamattardy birlesip jumys isteýge shaqyramyz! Basqa partııalar bılikke jetýdi kózdese, biz eń áýeli Táýelsiz Qazaqstannyń múddesi úshin jumys isteımiz! Ardaqty aǵaıyn, Abaı atamyzdan qalǵan amanat sóz bar: «Birińdi qazaq, biriń dos, Kórmeseń istiń bári bos». Sondyqtan, kúshimizdiń birlikte ekenin kórsetip, Jańa Qazaqstandy birge quraıyq! Biz birgemiz!»,-dedi Ashat Oralov.

Jıynda sondaı-aq QR Ulttyq ǵylym akademııasynyń akademıgi Hankeldi Ábjanov sóz sóıledi.

«Prezıdentimiz Qasym-Jomart Toqaev júzege asyryp jatqan bastamalar men reformalar QR Konstıtýtsııasynda pash etilgen quqyqtyq memleket qurýǵa jol ashatynyna senim mol. Biz saıası modernızatsııalaýdyń jańa kezeńine aıaq bastyq. «AMANAT» partııasynyń dúnıege kelgeni osynyń kórinisi. Táýelsizdik – babalarymyzdyń armany ári amanaty. Al jahandaný tusynda arman men amanat aqıqatqa aınalý úshin eldegi yntymaqtan, kelisimnen, kemel únqatysýdan artyq dúnıe joq»,-dedi ǵalym.

Al ánshi, kásipqoı boksshy Ibragım Eskendir: «Egemendi el qurý kez-kelgen halyqqa buıyrmaǵan baq! Osy baılyǵymyzdy qadirleı bileıik, aǵaıyn. Táýelsiz elde ómir súrýden asqan baqyt joq»,-dedi.

Aıta keteıik, «Jańa Qazaqstandy birge quramyz» atty ruqsat etilgen mıtıngke 2-3 myńǵa jýyq adam jınaldy.



Joǵary qaraı