Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

BQO-da qańǵybas ıt-mysyqty bıozararsyzdandyrýǵa 65,5 mln teńge bólindi

2022 jyldyń 12 mamyr 2022 14:57

ORAL. QazAqparat – Batys Qazaqstan oblysynda 65,576 mln teńgege 5 067 ıt-mysyqty bıozararsyzdandyrýdan ótkizý josparlanyp otyr, dep habarlaıdy QazAqparat tilshisi.

BQO veterınarııa basqarmasynyń basshysy Serik Nurmaǵanbetovtiń Óńirlik kommýnıkatsııalar qyzmeti alańynda ótken brıfıngide málim etkenindeı, jyl basynan beri 1 155 qańǵybas ıt pen mysyq bıozararsyzdandyrýdan ótkizilip, mekendeý ortasyna keri jiberildi.

Onyń aıtýynsha, qańǵybas ıt-mysyqty joıýdyń gýmandyq ádisine kóshý maqsatynda 2019 jyldyń tamyz aıynda Batys Qazaqstan oblysy maslıhatynyń №28-3 sheshimimen «Batys Qazaqstan oblysynyń eldi mekenderiniń aýmaǵynda qańǵybas ıtter men mysyqtardy aýlaý jáne joıý qaǵıdasy» bekitilgen bolatyn.

Soǵan sáıkes aýlanǵan janýarlar veterınarııalyq klınıkaǵa jetkizilip, degelmıntızatsııa, qutyrýǵa qarsy ekpe, chıp engizilip, bıozararsyzdandyrýdan ótkizilgennen keıin 3-7 kún baqylaýda ustalady. Keıin mekendeý ortasyna keri jiberiledi.

S.Nurmaǵanbetovtiń sózine qaraǵanda, bıozararsyzdandyrýdan ótken ıt-mysyqtyń kóbeıýi 6-8 jyldan keıin olardy aýlaýǵa bólinetin qarjynyń azaıýyna, adamdardy aýrýdan qorǵaýǵa jáne epızootııalyq ahýaldy jaqsartýǵa septesedi.

Sonymen qatar oblys aýmaǵynda barlyq ıtter men mysyqtardyń biryńǵaı derekter bazasy jasaqtaldy. Derekter qorynyń kómegimen barlyq janýarlar (jasy, jynysy, ıesi, mekenjaıy) týraly málimetter men sanynyń esebi júrgizilip otyr. Bul aldyn alý sharalaryn durys josparlaýǵa járdemdesedi.

Kúni búgin ıtter men mysyqtardy tirkeýge arnalǵan biryńǵaı derekqorda oblys boıynsha 12 359 ıt pen mysyq tirkelse, sonyń ishinde 4 063-iniń ıesi bar.

Úı janýarlaryn chıpteýdiń mindettelgenin túsindirý maqsatynda 61 myńnan astam aýlaǵa jadynamalar taratylyp, bul baǵyttaǵy jumystar jalǵasýda.

Bıylǵy tórt aıda Batys Qazaqstan oblysy aýmaǵynda ıtter men mysyqtardy asyraý jáne serýendetý qaǵıdalaryn buzǵany úshin 46 adamǵa 735 586 teńge kóleminde aıyppul salyndy.

«Kúni búgin Bórli, Syrym aýdandary barlyq ıtteri men mysyqtary chıptelgen, buralqy janýarlary joq úlgili aýmaq retinde belgilendi, sondaı-aq Oral qalasy men basqa aýdandarda bir aýyldan belgilenip, bul baǵytta jumystar júrgizilýde», dedi S.Nurmaǵanbetov.

Eske sala keteıik, budan buryn BQO-da buralqy ıtter bir aýladan 60 qoıdy qyryp ketkenin, Batys Qazaqstanda tórt adamǵa qasqyr shapqanyn jazǵan bolatynbyz.


Joǵary qaraı