Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

BQO-da para alǵan polıtsııa qyzmetkerine 4 mln teńge aıyppul salyndy

2021 jyldyń 1 qazan 2021 20:32

ORAL. QazAqparat – Shyńǵyrlaý aýdandyq sotynda burynǵy polıtsııa qyzmetkeri Mırlan Aqnurovqa qatysty úkim shyqty, dep habarlaıdy QazAqparat tilshisi.

BQO sotynyń baspasóz qyzmetinen túsken málimetke qaraǵanda, M.Aqnurov QR QK 366-baby 2-bóligine sáıkes aıypty dep tanylyp, paranyń 50 eselengen mólsherinde 3 mln 950 myń teńge aıyppul salyndy.

Aıyppul sot úkimi kúshine engennen keıin bir aı ishinde tólenýi kerek.

Ol sondaı-aq memlekettik qyzmette jáne basqa organdarda qyzmet atqarý quqyǵynan ómir boıyna aıyrylyp, polıtsııa kapıtany shenimen de qoshtasty.

Sot talqysynda málim bolǵanyndaı, Shyńǵyrlaý aýdany polıtsııa bóliminde aǵa memlekettik avtoınspektor qyzmetin atqaryp júrgen M.Aqnurov bıylǵy mamyr aıynda Shyńǵyrlaý aýylynda úsh qabatty kóppáterlik úıdiń salyna bastaǵanyn, oǵan qurylys materıaldary jetkizilip jatqanyn biledi.

Sodan keıin qyzmet babyn paıdalana otyryp, óz úıin turǵyzý úshin merdiger uıym ókilderinen qurylys materıaldaryn para retinde almaq bolyp, jospar qurady. Sol maqsatta atalǵan nysanǵa ketip bara jatqan arnaıy kólikterdi toqtatyp, hattama toltyrady. Sóıtip kásipkerlik ókilderine qysym jasap, ózine kómekke júginýge májbúrleıdi.

M.Aqnurov 18 mamyr kúni Aqsaı qalasynan 16 tonna katok ákele jatqan júrgizýshige hattama toltyryp, ony túske deıin ustaıdy. Sol kúni ol júrgizýshige kómekke kelgen «Oral qurylys» JShS ókili E.Sharıpovpen tanysady.

23 mamyr kúni Sharıpovpen kezdesý barysynda qıyrshyq tas-qum qospasy jáne basqa qurylys materıaldary tıelgen árbir altynshy reıstiń óz úıi salynyp jatqan jer telimine jetkizilýi kerektigin aıtady. Kelesi kúni Sharıpov onyń talabyn oryndap, quny 6 myń teńge 20 tonna qıyrshyq tas-qum qospasyn polıtsııa qyzmetkeriniń aýlasyna túsiredi.

E.Sharıpov M.Aqnurovtyń talaptarynyń zańsyz ekendigin túsinip, BQO boıynsha sybaılas jemqorlyqqa qarsy qyzmetke júgingen.

Sodan keıin M.Aqnurov quny 73 myń teńge turatyn 2 tonna tsementti jetkizýdi talap etip, ony da alady. Osylaısha ol jalpy quny 79 myń teńge turatyn qurylys materıaldaryna qol jetkizgen.

Sot úkimi kúshine engen joq.

Eske sala keteıik, budan buryn BQO-da azǵyndyqpen aıyptalǵan turǵynnyń tergeýshige para bermek bolǵanyn jazǵan edik.


Joǵary qaraı