Aýa raıy
Astana 5 °S
Almaty 11 °S
valıýta baǵamy
USD 421.58
EUR 496.83
RUB 5.53
CNY 62.20

BQO-da provızorlyq statsıonarlar jabylyp jatyr

2020 jyldyń 7 tamyz 2020 16:46

ORAL. QazAqparat – Batys Qazaqstan oblysynda provızorlyq statsıonarlar jabylyp jatyr, dep habarlaıdy QazAqparat tilshisi.

BQO densaýlyq saqtaý basqarmasy málim etkenindeı, óńirde koronavırýsqa baılanysty jaǵdaı 4 tamyzdan ońala bastady.

Qazirgi tańda naýqastar bolmaǵandyqtan, «Kýmyska» sanatorııindegi provızorlyq statsıonar jabyldy. Oblystyq týberkýlezge qarsy dıspanser quramyna kiretin bólimshe 19 naýryzdan 100 oryndyq statsıonar retinde ashylǵan edi. Keıin derttiń dendeýine baılanysty 85 oryndyq juqpaly aýrýlar aýrýhanasyna aınaldy.

Munda barlyǵy 802 emdelýshi em alsa, sonyń 687-si statsıonarda jatty. 115-i – klınıkalyq belgisi joqtar. 431 emdelýshiniń koronavırýsqa synamasy oń nátıje kórsetti.

Statsıonarda 66 qyzmetker eńbek etse, sonyń 14-i – dárigerler, 28-i medıtsına qyzmetkerleri edi.

Oblystyq kópbeıindi aýrýhanada sáýirdiń aıaǵynda 1-inshi jáne 8-korpýstar provızorlyq gospıtalǵa berildi. Al aýyr naýqastar jansaqtaý bólimine qabyldandy. Keıin jóndeýden soń 2-korpýsta 248 tósek-oryn daıyndaldy. Qazirgi tańda munda 22 adam jatsa, sonyń 12-sinen synama teris nátıje kórsetti. Aýrýy asqynǵan bir adam jansaqtaý bóliminde jatyr. Oblystyq aýrýhanadan barlyǵy 1500 emdelýshi ótti.

Oblystyq juqpaly aýrýlar aýrýhanasynda orta jáne aýyr haldegi 98 naýqas emdelýde.

Kúni búgin medıtsına mekemelerinde COVID-19 anyqtalǵan naýqastarǵa arnalǵan 1622 tósek-oryn bolsa, sonyń 35 paıyzynda ǵana emdelýshi bar.

Al jazylyp shyqqan naýqastarǵa arnalǵan №1 qalalyq emhana janynan ashylǵan birinshi ońaltý ortalyǵy qajet bolyp shyqty. Sondyqtan oblystyq densaýlyq saqtaý basqarmasy táýlik boıy jumys isteıtin ońaltý statsıonaryn ashýdy oılastyrýda. Tájirıbe kórsetkenindeı, indetten emdelip shyqqandarǵa medıtsınalyq qana emes, psıhologııalyq qoldaý da qajet.





Eger jaǵdaı jaqsara tússe, aldaǵy aptadan bastap medıtsınalyq mekemeler óz emdelýshilerin josparly túrde jatqyzýǵa kóshedi. Bul birinshi kezekte oblystyq onkologııalyq dıspanserge qatysty.

Eske sala keteıik, budan buryn Batys Qazaqstanda 11 mln teńgeniń dári-dármegi tárkilengenin jazǵan bolatynbyz.



Joǵary qaraı