Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

BQO-da tumaýǵa qarsy 68 myń doza vaktsına satyp alyndy

2021 jyldyń 15 qyrkúıek 2021 14:01

ORAL. QazAqparat – Batys Qazaqstan oblysynda turǵyndardy tumaýǵa qarsy egý úshin Reseıde óndirilgen 68 myń doza «Grıppol +» vaktsınasy satyp alyndy, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngide málim etkenindeı, 57 myń doza vaktsına oblysqa tamyzda jetkizilse, qalǵan 11 myńy osy aıdyń aıaǵyna deıin ákelinbek.

Osy maqsatqa bıýdjetten 68 mln 731,8 myń teńge bólindi.

Nurlybek Ermekulynyń sózine qaraǵanda, tumaýdyń aldyn alýdyń eń tıimdi ádisi – vaktsınatsııa. Jyl saıyn óńirde turǵyndardyń 10 paıyzdan astamy ekpe alady.

Bıyl tumaýǵa qarsy josparly ekpe 15 qyrkúıekten bastaldy. Bul jedel respıratorlyq aýrýlar kezinde tumaýǵa qarsy turaqty ımmýnıtetti qalyptastyrý úshin jasalady.

Tumaýǵa qarsy aqysyz negizde medıtsına qyzmetkerleri, alty aıdan asqan jıi aýyratyn balalar, jetimder jáne ata-ana qamqorlyǵynsyz qalǵan balalarǵa arnalǵan bilim berý uıymdarynda, balalar úılerinde tárbıelenýshiler, ekinshi jáne úshinshi trımestrdegi júkti áıelder, júrek-qan tamyrlary men tynys alý organdarynyń sozylmaly aýrýy barlar jáne epıdemıologııalyq kórsetkishter boıynsha, qarttar úıleriniń turǵyndary ekpe alady.

«Sonymen qatar ekpeden basqa saqtyq sharalaryn umytpaý qajet. Atap aıtqanda, adam kóp jınalatyn jerlerge barýdy shekteý, maska kııý, túshkirý nemese jótel sııaqty aýrý belgileri bar adamdarmen qarym-qatynas jasamaý, sanıtarlyq talaptardy saqtap, durys tamaqtanyp, salaýatty ómir saltyn ustanyp, únemi jattyǵýlar jasaý kerek. Aldaǵy epıdemıologııalyq maýsym 2021 jyldyń qazanynan 2022 jyldyń mamyryna deıin sozylady», dedi N.Mustaev.

Brıfıngte sondaı-aq oblystyq densaýlyq saqtaý basqarmasy basshysynyń orynbasary Gúlnár Ábdirahmanova tumaýǵa qarsy ekpe jumystaryna medıtsına uıymdarynyń ázir ekendigin jetkizdi.

«Vaktsınany saqtaýǵa jáne tasymaldaýǵa arnalǵan salqyndatý jabdyqtary tekserildi. Tumaýǵa qarsy egýge jatatyn adamdardyń tizimi jasaldy. Egý kabınetteri men brıgadalary ımmýndaýdan keıin qolaısyz kórinister tirkelgen jaǵdaıda shuǵyl kómek kórsetýge de daıyn», dedi Gúlnár Maqsotqyzy.

Eske sala keteıik, budan buryn Batys Qazaqstanda sońǵy aptada koronavırýstan 18 adamnyń kóz jumǵanyn jazǵan bolatynbyz.


Joǵary qaraı