Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

BQO-da jol qaýipsizdigin qamtamasyz etpegen aýdan ákimine sógis jarııalandy

2021 jyldyń 3 naýryz 2021 16:21

ORAL. QazAqparat – BQO ákimi Ǵalı Esqalıevtiń tóraǵalyq etýimen jol qaýipsizdigin qamtamasyz etý máseleleri boıynsha keńes ótip, onda óz qyzmettik mindetin oryndamaǵan laýazym ıelerine syn-eskertpe aıtyldy, dep habarlaıdy QazAqparat tilshisi.

Keńeste óńir basshysy bárinen buryn turǵyndar qaýipsizdigin saqtaý asa mańyzdy ekendigin, sondyqtan jol-kólik oqıǵalaryn boldyrmaý baǵytynda barlyq sharalardy alý qajettigin atap kórsetti.

Jıynda ótken jylǵy jáne bıylǵy jol-kólik oqıǵalaryna taldaý jasaldy.

BQO polıtsııa departamenti bastyǵynyń mindetin atqarýshy, polıtsııa polkovnıgi Janbolat Janshınniń málim etkenindeı, bıylǵy eki aıda avtokólik rýline mas kúıinde otyrǵan 300-den astam júrgizýshi, sonyń ishinde 46-sy qaıtalap jasaǵany úshin ákimshilik jaýapkershilikke tartyldy.

Mas kúıinde kólik júrgizgen júrgizýshilerdiń kinási saldarynan 3 jol apaty tirkelip, sonyń saldarynan 1 adam qaza taýyp, 11-i jaraqat aldy.

Óńirde maldyń qatysýymen jol-kólik oqıǵalaryn boldyrmaý maqsatynda barlyq aýdanda betimen júrgen mal qamalatyn 64 oryn belgilendi.

Mal jaıý erejesin buzǵany úshin ótken jyly 1600-den astam mal ıesi ákimshilik jaýapkershilikke tartyldy.

«Eger ótken jyly maldyń qatysýymen bolǵan jol-kólik oqıǵasy saldarynan adam ólimi tirkelmese, bıyl qaıǵyly jaıt oryn aldy. Jýyrda ǵana, 28 aqpan kúni Syrym aýdany aýmaǵynda VAZ-21011 avtokóligi jylqyǵa soǵylyp, sonyń saldarynan jolaýshy oqıǵa ornynda kóz jumdy», dedi J.Janshın.

Mal ıesi anyqtaldy, ol ákimshilik jaýapkershilikke tartylatyn bolady.

J.Janshınniń sózine qaraǵanda, oblysta betimen júrgen maldy qamaıtyn 64 oryn belgilengenimen, bolǵan oqıǵa olardyń qaǵaz júzinde ekendigin kórsetti.

Syrym aýdanynda osyndaı 15 oryn shyn mánisinde jumys jasamaıdy. Aýyldyq okrýg ákimderi bul máseleni túpkilikti sheshpegen, jaýapty adamdar belgilenbegen.

Sonyń saldarynan mal jol boıynda emin-erkin júredi.

Osyǵan oraı óńir basshysy Syrym aýdanynyń ákimi Tólegen Tóreǵalıevke sógis jarııalady.

Keńeste sondaı-aq jol-kólik oqıǵalary jıi bolatyn respýblıkalyq mańyzy bar Oral-Atyraý jolyn qaıta qurý jaıy da aıtyldy.

Qazirgi kezde bul joldy ortasyn bóle otyryp, 3 tehnıkalyq sanattan 1-sanatqa aýystyrý úshin jobalyq-smetalyq qujattamasyn jasaqtaý kózdelýde.

«Ótken aptada Oral-Atyraý jolynda 4 jol apatynan 12 adam qaza taýyp, 8-i túrli jaraqat aldy. Taldaý kórsetkenindeı, olardyń bári joldyń nashar kórinýi jaǵdaıynda júrgizýshilerdiń qaýipsizdikke kóz jetkizbesten, alda ketip bara jatqan kólikti basyp ozamyn dep, qarsy betke shyǵyp ketýinen bolǵan. Eger joldyń eki ortasy bólinse, avtokólikter betpe-bet túıispes edi», dedi J.Janshın.

Eske sala keteıik, budan buryn BQO-daǵy jol apatynan alty adamnyń qaza tapqanyn, keıin 4 adam mert bolyp, altaýy aýrýhanaǵa jetkizilgenin jazǵan bolatynbyz.

Joǵary qaraı