Aýa raıy
Astana 24 °S
Almaty 23 °S
valıýta baǵamy
USD 412.55
EUR 468.66
RUB 5.79
CNY 58.80

Brazılııadan altyn júldemen oralǵan oqýshy jýrnalıst bolýdy armandaıdy

2019 jyldyń 11 qarasha 2019 07:48

ÓSKEMEN. QazAqparat – Brazılııaǵa baryp, bıologııa páni boıynsha joba qorǵap, olımpıadanyń altyn júldesin alyp qaıtqan óskemendik Áıgerim Turǵanbaeva bolashaqta jýrnalıst bolýdy armandaıdy, dep habarlaıdy QazAqparat tilshisi.

Jýyqta Óskemendegi «Nurorda» mektep-lıtseıiniń oqýshylary Brazılııada ótken halyqaralyq olımpıadada baq synaǵan edi. Altynnan alqa taǵyp qaıtqan alǵyr oqýshylardyń biri – Áıgerim.

– Kún demeı, tún demeı eńbektendik, izdendik. Sebebi ǵylym tabandylyqty talap etedi. Álbette talabymdy ushtaǵan – ustazdarym, alǵysym sheksiz. Eń bastysy qazaq eliniń namysyn qorǵaý qurmetine ıe bolǵanymyz úshin qýanyshtymyz, – deıdi oqýshynyń ózi.

Áıgerim bıologııa páni boıynsha joba qorǵady. Halyqaralyq qazylardyń joǵary baǵasyn aldy. Ǵylymǵa alǵashqy ári sátti qadamyn jasady. Alaıda ozat oqýshy jýrnalıstıka salasyn tańdap otyr. Sondaı-aq ózge de qabiletteri joq emes.




Bıolog emes, bıshi bolýdy armandaǵan

Áıgerim 2010 jyldan beri «Aqqý-úmit» ansambliniń múshesi. Horeografııamen segiz jasynan bastap aınalysyp keledi. Bul kúnde kásibı bıshi deýge bolady. Eýropanyń 16 memleketin aralady. Talaı dodada top jaryp, «Úmit» atty úlken janusynyń úmitin aqtap keledi.

– Bala kúnimnen bıge áýespin. On jyldyń ishinde kóptegen jetistikke jettim. Árıne úlken anamyz Maıra Baımuqanovanyń úlesi zor. Árdaıym qoldaý bildirdi. Bı óneri meniń ajyramas bólshegim, odan alystap ketpeımin. Biraq belgili bir maman ıesi atanyp, jumys isteýim kerek qoı. Men janyma jaqyn jýrnalıstıkany tańdadym. Shyǵarmashylyqtyń aınalasynda júrsem, ózimdi jaqsy sezinemin, – deıdi keıipkerimiz.

«Sheteldikterge «Qazaqstan» shokolady qatty unady»

Bastapqyda aıtqanymyzdaı, oqýshylar Brazılııaǵa saparlap qaıtty. Keıipkerimiz saıahat barysyndaǵy qyzyqtarymen bólisken edi. Onyń aıtýynsha, sheteldikterdi otandyq táttiler tánti etken.

– Sheteldik dostar bizdi jyly qarsy aldy. Áńgimemiz jarasyp ketti, ásirese meksıkalyqtarmen. Sondaı-aq portýgalııalyq oqýshylarmen tez til tabystyq. Olar bizge sývenır tartý etti. Biz «Qazaqstan» shokaladyn usyndyq. Qatty súısinip, «bizdiń shokaladtardan dámi múldem ózgeshe» dep tańdanys bildirip jatty, – deıdi Áıgerim.

«Ulttyq kıim upaıymyzdy túgendedi»

– Biz ulttyq naqyshtaǵy oıýly kıimderdi kıip bardyq. El nazary birden bizge aýdy. Jalma-jan «Where are you from?» desip jatty, – deıdi Áıgerim.

Onyń aıtýynsha, ulttyq kıim qazylardyń da kóńilinen shyqqan:

«Joba qorǵaýǵa shyqqanda, qatty tolqyp tur edik. Qorqynysh ta joq emes. Alaıda qazylar kıimimizge zer salyp, jyly júzben qaıdan kelgenimizdi suraǵanda, kóńilimiz ornyna túsip, batyl sóıleýge kóshtik. Keýdemizge maqtanysh sezimi uıalaǵandaı boldy. Osy sáttiń jetistikke jetýimizge zor yqpal etkeni sózsiz».

Aıta keteıik, Áıgerim olımpıada altynyn ala otyryp, elimizdegi kez-kelgen ýnıversıtette tegin bilim alý múmkindigine ıe boldy.




Joǵary qaraı