Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Búgin – Qurban aıt merekesiniń birinshi kúni

2021 jyldyń 20 shilde 2021 06:31

NUR-SULTAN. QazAqparat – Búgin barsha musylman úshin ulyq sanalatyn Qurbaı aıt merekesi bastaldy, dep habarlaıdy QazAqparat.

Bıylǵy Qurban aıt ta koronavırýs pandemııasyna baılanysty karantın shekteýlerimen tuspa-tus keldi. Aıt kúni 20 shildede bastalyp, 3 kúnge sozylady. Respýblıka aýmaǵynda «sary», «jasyl» aımaqtarda tańǵy saǵat 7.00-de qatań sanıtarlyq norma talaptaryn saqtaı otyryp, 10 mınýttyq Qurban aıt namazy oqylady.

Al «qyzyl» aımaqta Qurban aıt namazyn oqý jergilikti sanıtarlyq memlekettik bas dárigerdiń qaýlysyna sáıkes júzege asyrylady. Máselen, Nur-Sultan qalasyndaǵy meshitterde dástúrli aıt namazy ótkizilmeıdi. Adamdardyń kóp mólsherde jınalmaýyn qamtamasyz etý maqsatynda jylda qurbandyq shalý rásimderi ótetin bazarlar men sharýa qojalyqtarynyń jumysy Qurban aıt merekesi kezinde toqtatylady.

Almatyda da epıdemııalogııalyq jaǵdaıdyń kúrt nasharlaýyna baılanysty, Qurban Aıt namazy qala meshitterinde oqylmaıdy. Sondaı-aq Qurban aıt kúnderi eldiń bazardan mal tańdap alyp, ony óz qolymen soıýyna jáne kópshilik is-sharalardy ótkizýine tyıym salynady.

2021 jyly qurban shalý rásimin ótkizý eki jolmen júzege asyrylady. Birinshi joly: memlekettik sanıtarlyq-epıdemıologııalyq qadaǵalaý organdary tarapynan ruqsat berilgen jergilikti qasaphanalarda sanıtarııa erejelerin qatań saqtaı otyryp «sary» jáne «jasyl» aımaqtarda onlaın jáne oflaın formatta ótkizý. Ekinshi joly: elimizdiń «qyzyl» aımaqtarynda pandemııa jaǵdaıynda ótken jyldyń tájirıbesin qoldanyp, qurban shalý rásimin sharıǵattaǵy «ókildik» qaǵıdasyna sáıkes qurban2021.kz saıty arqyly tek onlaın rejımde júzege asyrý.

qurban2021.kz saıty Qurban aıttyń úshinshi kúni ıaǵnı 22-shi shildege deıin jumys isteıdi. Qurban shalýǵa nıet etken azamattar osy aralyqta tapsyrystaryn bere alady jáne respýblıka boıynsha muqtaj otbasylar qurbandyq etin alý úshin 17 shildeden bastap ótinish bildire alady. Muqtaj otbasylardyń ótinishterin qabyldaý, saraptaý jáne qurbandyq etterin jetkizip berý jumystarymen QMDB-nyń jergilikti ókildikteri jáne eriktiler aınalysady. Aýyldyq jerde jeke turǵyn úıde turatyn ár adamnyń musylmandyq mindetin atqarýyna QMDB tarapynan esh shekteý joq.

Hanafı mázhabynda Qurban aıt kúnderi baı adamǵa qurban shalý – ýájip ıaǵnı mindet. Sharıǵat boıynsha «baı» dep mal-dúnıesi nysap mólsherine jetken adamǵa aıtylady. Nysap mólsheri – 40 qoı nemes 40 eshki, ıakı 30 iri qara nemese 5 túıe. Ol da bolmasa qajettiliginen artyq 85 gramm altyn ıaǵnı 1 230 000 teńge qarajat – nysap mólsheri. Mal-dúnıesi nysap mólsherine jetpegen, ıaǵnı jaǵdaıy tómen musylmanǵa qurban shalý mindet emes. Aıt kúnderi az da bolsa sadaqa berip, qaraýsyz qalǵan qarttarǵa, jetimder men kópbalaly otbasylarǵa kóńil bólý – saýapty is.

«Sary» jáne «jasyl» aımaqtaǵy qurbandyq shalatyn arnaıy oryndarda Ashyq mobıldi qosymshasy iske qosylady. Atap aıtqanda, «qyzyl» jáne «sary» mártebesi bar azamattar qurbandyq shalý oryndaryna jiberilmeıdi, «kók», «jasyl» mártebesi bar azamattar ǵana jiberiledi.

Qurbandyq shalatyn oryndarǵa barý úshin aldyn ala jazylý qajet. 20 shilde kúni saǵat 7:20 dan bastap «sary», «jasyl» aımaqtaǵy óńirlerde aldyn ala jazylǵan tulǵalar belgilengen ýaqytta arnaıy qasaphanada qurban shalady, árbir adamǵa 1 saǵat ýaqyttan beriledi. Qasaphanaǵa keletin adamdardyń dene qyzýyn ólshenedi, antıseptık pen maska qoıylady.

«Qasaphanaǵa mindetti túrde betperde taǵyp kirip, antıseptık zattaryn barynsha paıdalaný kerek. Araqashyqtyqty qatań saqtaý, bir-birimen qol alyspaý, dene qyzýy 37 gradýstan joǵary, tumaý jáne basqa da aýrý belgileri bar adamdarǵa kelmeý jáne jasy 65-ten asqan qarııalardyń, áıelder men balalardyń qurban malyn shalatyn oryndarǵa barmaýy suralady», - dep túsindirdi QMDB ókilderi.

Sonymen birge, Memleket basshysy Qasym-Jomart Toqaev epıdemıologııalyq ahýal jónindegi keńeste Qurban aıtta ınfektsııalyq qaýipsizdikti barynsha qamtamasyz etýdi tapsyrdy.

«Erteń búkil musylman qaýymy úshin qasıetti Qurban aıt merekesi bastalady. Elde kúrdeli ahýal qalyptasyp otyr. Sondyqtan biz jurttyń qurbandyq shalatyn jerlerde jappaı jınalýyn boldyrmaýymyz kerek. Jaǵdaıdy odan beter ýshyqtyryp alýymyz múmkin. Úkimet pen ákimder osy máseleni erekshe baqylaýda ustaýǵa tıis. Qurban aıtta ınfektsııalyq qaýipsizdikti barynsha qamtamasyz etý qajet», - dedi Qasym-Jomart Toqaev.

Avtor Aıjan Serikjanqyzy
Basty sózder: Karantın, Din, Qurban aıt,
Joǵary qaraı