Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Búgin - memlekettik rámizder kúni

2021 jyldyń 4 maýsym 2021 07:08

NUR-SULTAN. QazAqparat - Búgin Táýelsiz Qazaqstannyń memlekettik rámizderi - Memlekettik tý, Memlekettik eltańba jáne Memlekettik gımn kúni.

Osydan týra 29 jyl buryn, naqty aıtqanda 1992 jyldyń 4 maýsymynda QR Tuńǵysh Prezıdenti - Elbasy Nursultan Nazarbaev «Qazaqstan Respýblıkasynyń Memlekettik týy týraly», «Qazaqstan Respýblıkasynyń Memlekettik eltańbasy týraly» jáne «Qazaqstan Respýblıkasy Memlekettik ánuranynyń mýzykalyq redaktsııasy týraly» Zańdarǵa qol qoıǵan edi. Al «Qazaqstan Respýblıkasynyń Memlekettik rámizderi týraly» Konstıtýtsııalyq Zań 2007 jyly 4 maýsymda qabyldandy.

Osy Zańǵa sáıkes jyl saıyn 4 maýsym Qazaqstan Respýblıkasynda Memlekettik rámizder kúni retinde merekelenedi. Memlekettik rámizder – bul kez kelgen memlekettiń egemendigi men birtutastyǵyn beıneleıtin, onyń ajyraǵysyz atrıbýttarynyń biri.

Qazaqstan Respýblıkasynda Memlekettik tý, Memlekettik eltańba jáne Memlekettik gımn memlekettik rámizder bolyp sanalady. Osynaý memlekettik úsh nyshandy tańdaý úshin 1992 jyldyń basynda Joǵarǵy Keńes prezıdıýmy jumys tobyn quryp, arnaıy shyǵarmashylyq komıssııa taǵaıyndady. Onyń quramyna Salyq Zımanov, Erbol Sháımerdenov, Serikbolsyn Ábdildın, Serik Ábdrahmanov syndy qaıratkerler kirdi. Osydan keıin búkil Qazaqstan kóleminde Eltańba, Tý, Ánuran nusqalaryna konkýrs jarııalandy. Bir ǵana týdyń ózine 600 adamnan 1 200 nusqa tússe, Eltańbanyń 245 jobasy, ánurannyń 750 úlgisi baıqaýǵa qatysty. Estetıkalyq sıpatymen de, tarıhı, saıası, ekonomıkalyq sımvolızmge sáıkes kelýi boıynsha da úzdik týyndy usynǵan baıqaý jeńimpazdaryn qazir halyq memlekettik nyshan avtorlary retinde tanıdy.

Atap aıtqanda, Qazaqstan Respýblıkasynyń Memlekettik týy. Týdyń avtory - Qazaqstannyń eńbek sińirgen óner qaıratkeri Sháken Nııazbekov.

Elimizdiń memlekettik týy – ortasynda shuǵylaly kún, onyń astynda qalyqtap ushqan qyran beınelengen tik buryshty kógildir tústi mata. Týdyń sabynyń tusynda ulttyq órnek tik jolaq túrinde naqyshtalǵan. Kún, onyń shuǵylasy, qyran jáne ulttyq órnek beınesi altyn tústes. Týdyń eni men uzyndyǵynyń araqatynasy - 1:2.

Qazaqstan Respýblıkasy Memlekettik eltańbasynyń avtorlary – belgili sáýletshiler Jandarbek Málibekov pen Shot-Aman Ýálıhanov. Qazaqstan Respýblıkasynyń Memlekettik eltańbasy – dóńgelek nysandy jáne kógildir tús aıasyndaǵy shańyraq túrinde beınelengen, shańyraqty aınala kún sáýlesindeı tarap ýyqtar shanshylǵan. Shańyraqtyń oń jaǵy men sol jaǵynda ańyzdardaǵy qanatty pyraqtar beınesi ornalastyrylǵan.

Joǵarǵy bóliginde – bes buryshty kólemdi juldyz, al tómengi bóliginde «QAZAQSTAN» degen jazý bar. Juldyzdyń, shańyraqtyń, ýyqtardyń, ańyzdardaǵy qanatty pyraqtardyń beınesi, sondaı-aq «QAZAQSTAN» degen jazý – altyn tústes. Qazaqstan Respýblıkasynyń Memlekettik Týy men Memlekettik Eltańbasynyń etalondary Qazaqstan Respýblıkasy Prezıdentiniń Rezıdentsııasynda saqtalady. Táýelsiz Qazaqstannyń tuńǵysh Ánurannyń avtorlary retinde - áýenin jazǵan Muqan Tólebaev, Evgenıı Brýsılovskıı men Latıf Hamıdıdiń esimi tarıhta qaldy.

Úzdik mátinge jarııalanǵan baıqaýdy Muzafar Álimbaev, Qadyr Myrzalıev, Tumanbaı Moldaǵalıev jáne Jadyra Dáribaeva jeńip shyqty. 2006 jyly «Meniń Qazaqstanym» áni retinde tanymal bolǵan Qazaqstannyń gımni Prezıdent Nursultan Nazarbaevtyń bastamasymen 2006 jyly 6 qańtarda elimizdiń Parlamentinde bekitildi.

Birinshi ret ol 2006 jyly 11 qańtarda Tuńǵysh Prezıdent, Elbasynyń saltanatty ulyqtaý rásiminde oryndaldy. Ánniń avtory Shámshi Qaldaıaqov, sózin jazǵandar: Jumeken Nájimedenov, Nursultan Nazarbaev.


Basty sózder: Qoǵam, QR Memlekettik rámizderi,
Joǵary qaraı