Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Búgin jyr alyby Jambyldyń týǵanyna 175 jyl toldy

2021 jyldyń 28 aqpan 2021 07:25

NUR-SULTAN. QazAqparat - Búgin jyr alyby Jambyldyń (1846-1945) týǵanyna 175 jyl toldy. Osy oraıda Qazaqstanda aqynnyń mereıtoıyn jappaı merekeleý júrip jatyr, dep habarlaıdy QazAqparat.

Atap aıtqanda, Qazaqstan Prezıdenti mereıtoılyq is-sharalardyń joǵary uıymdastyrýshylyq jáne mazmundyq deńgeıin qamtamasyz etý úshin «Jambyl Jabaevtyń 175 jyldyq mereıtoıyn daıyndaý jáne ótkizý jónindegi memlekettik komıssııa qurý týraly» arnaıy Jarlyq qabyldaǵany belgili.

Jaqynda Qazaqstan Respýblıkasynyń Memlekettik hatshysy Qyrymbek Kósherbaevtyń tóraǵalyǵymen Jambyl Jabaevtyń 175 jyldyq mereıtoıyn daıyndaý jáne ótkizý jónindegi memlekettik komıssııanyń alǵashqy otyrysy ótti.

Talqylaý qorytyndysy boıynsha memlekettik komıssııa mereıtoılyq is-sharalardyń jalpyrespýblıkalyq josparyn maquldady jáne bekitti. Mereıtoılyq jyl ishinde respýblıka boıynsha 500-ge jýyq áleýmettik, ımıdjdik, ǵylymı, tanymdyq is-sharalar ótkiziledi. Budan bólek, aqyn ómirinen derekti fılm túsirý, óleńderiniń jańa jınaqtaryn shyǵarý, aıtystar men ádebı konkýrstardy, kitap kórmelerin uıymdastyrý, mereıtoılyq moneta, poshta markasyn ázirleý jáne basqa da sharalar ótkizý kózdelip otyr.

Memlekettik hatshy Úkimetke jalpyrespýblıkalyq jospardyń sapaly oryndalýyn jáne mereıtoılyq is-sharalardyń aqparattyq turǵydan jan-jaqty súıemeldenýin qamtamasyz etýdi tapsyrdy. Oblystardyń, Nur-Sultan, Almaty, Shymkent qalalarynyń ákimderine Jambyl Jabaevtyń mereıtoıyn merekeleý jónindegi óńirlik josparlardy ázirlep, bekitýdi jáne olardyń oryndalýyn qadaǵalaýdy mindettedi.

Birneshe kúnnen beri elimizdegi jáne shet elderdegi qalalar men eldi mekenderde Jambyl Jabaevtyń eskertkishteri men bıýstterine gúl shoqtary qoıyldy, árqıly mádenı sharalar ótkizildi.

Aıta keteıik, osy aptada Ýkraına astanasy Kıevte qazaq aqyny Jambyl Jabaevtyń 175 jyldyq mereıtoıy qarsańynda poezııa oqýlary ótti.

Іs-sharaǵa qatysýshylar J.Jabaevtyń qazaq, ýkraın jáne orys tilderindegi óleńderin jatqa oqyp, ómirbaıanyn aıtyp berdi.

26 aqpan kúni elordada J. Táshenov jáne Amman kósheleriniń qıylysynda Jambyl Jabaevtyń eskertkishine gúl shoǵyn qoıý rásimi ótti.

Sonymen qatar Taraz qalasyndaǵy «Balasaǵun» kontsert zalynda ótken jyr alyby Jambyl Jabaevtyń 175 jyldyq mereıtoıyna arnalǵan «Jambyl – meniń jaı atym, halyq – meniń shyn atym» atty respýblıkalyq aıtys máresine jetti.

Ǵasyr jasaǵan Jambyl babamyz ben elimizdiń birqatar tulǵalaryn, Táýelsizdigimizdiń 30 jyldyǵyn jyryna arqaý etken aqyndar jaqsy aıtys jasaı bildi.

Osy aptada elordada aqynnyń 175 jyldyq mereıtoıyna arnalǵan is-sharalar uıymdastyryldy.

Q.Qýanyshbaev atyndaǵy Memlekettik akademııalyq qazaq mýzykalyq drama teatryndaǵy mereıtoılyq jyldyń saltanatty ashylýyna Memlekettik hatshy Qyrymbek Kósherbaev, mádenıet jáne ǵylym qaıratkerleri, Almaty jáne Jambyl oblystarynyń delegatsııalary keldi.

«Jambyldyń bıylǵy mereıtoıynda aıtýly aqynnyń ómiri men shyǵarmashylyǵyn jalpy ult maqtanyshy retinde ǵana qarastyrmaı, jas urpaqtyń tarıhı tanymyn keńeıtip, otansúıgishtikke tárıbeleýdiń yqpaldy quralyna aınaldyrý mejelenip otyr», - dedi QR Mádenıet jáne sport mınıstri Aqtoty Raıymqulova.

Merekelik kontsertte Q.Qýanyshbaev atyndaǵy Memlekettik akademııalyq qazaq mýzykalyq drama teatry men «Astana Opera» memlekettik opera jáne balet teatrynyń sımfonııalyq orkestriniń artısteri kórermenderge «Jyr alyby - Jambyl» atty teatrlandyrylǵan qoıylymyn usyndy. Uly aqynnyń baǵa jetpes murasyn, ózindik ereksheligi men darynyn ashyp kórsetetin ádebı-mýzykalyq kompozıtsııada onyń ataqty aıtystary men áıgili «Keń baıtaq Qazaqstanym», «Aqyndarǵa arnaý», «Kúláshqa», «Lenıngradtyq órenim!» jáne t.b. shyǵarmalary oqyldy.

Jabaev Jambyl jasynan óleń-jyrǵa qanyp ósken, óz anasy Uldannyń aqyndyq talantyn boıyna sińirgen, «Meniń pirim - Súıinbaı...» dep Jambyldyń ózi jyrǵa qosqandaı, Súıinbaı Aronuly sııaqty jyr dańǵylynan tálim-tárbıe alǵan.

Uly jyraý qazaq halqyn, onyń poezııasyn búkil álemge jarııa etti. 1938 jyly Jambyldyń shyǵarmashylyq óneriniń 75 jyldyǵyn toılaǵanda, oǵan álemniń ár túkpirinen quttyqtaýlar keldi. Romen Rollan, Martın Andersen, Nekse, Katarına Sýsanna Prıchard sııaqty ataqty sýretkerler Jambyl poezııasyna óte joǵary baǵa berdi. Jambyl týraly júzdegen óleń-jyrlar jazyldy. 20-ǵasyrdaǵy halyq aqyndaryna Jambyldyń áseri óte zor boldy.

Jambyldyń esimi Qazaqstannyń bir oblysyna, birneshe aýdandarǵa, birqatar eldi mekenderge, mekemeler men oqý oryndaryna, óner ordalaryna, mektepterge, kóshelerge berilgen. Qazaq halqy Jambyldyń 100 jyldyq, 125 jyldyq, 150 jyldyq, 160 jyldyq toılaryn halyqaralyq deńgeıde saltanatty túrde atap ótti. Jalpy, aqynnyń shyǵarmalary dúnıejúzinde qyryqtan astam tilge aýdarylǵan. Elimizde Jambyl aqynnyń 170 jyldyǵyna arnalǵan túrli sharalar uıymdastyryldy.


Joǵary qaraı