Aýa raıy
Astana -9 °S
Almaty -12 °S
valıýta baǵamy
USD 421.58
EUR 496.83
RUB 5.53
CNY 62.20

BJZQ jasy jetkenderdi zeınetaqy tólemin rásimdeýge shaqyrdy

2020 jyldyń 26 qarasha 2020 12:23

NUR-SULTAN. QazAqparat - «BJZQ» AQ zeınetkerlik jasqa (erler – 63 jas jáne odan joǵary, áıelder – 2020 jyly 59,5 jas jáne odan joǵary) jetkenderge, zeınetaqy jınaǵy bar jáne zeınetaqy tólemin alýǵa ótinish bildirmegenderge qordan zeınetaqy tólemin alýǵa quqyly ekendigin málim etti, dep habarlaıdy QazAqparat.

Qordyń málimetinshe, ásirese 2020 jyly 59,5 jasqa tolǵan áıelder zeınetaqy taǵaıyndaýǵa jyl sońyna deıin ótinish bermese muny kelesi jyly tek 60 jasqa tolǵannan keıin ǵana rásimdeı alady.

QR «Qazaqstan Respýblıkasynda zeınetaqymen qamsyzdandyrý týraly» Zańyna sáıkes áıelderdiń zeınetke shyǵý jasy jyl saıyn jarty jylǵa ulǵaıyp, 2027 jyly erlermen teńesetini belgili.

Esterińizge sala keteıik, BJZQ-dan zeınetaqy tólemin alýshy ótinish bergen kúnnen bastap belgilenedi jáne zeınetaqy jınaǵy taýsylǵanǵa deıin júzege asyrylady. Zeınetkerlik jasqa tolýyna baılanysty biryńǵaı ótinish berý úshin Memlekettik korporatsııanyń jumys kestesine sáıkes «Azamattarǵa arnalǵan úkimet» memlekettik korporatsııasy» KEAQ-qa ózińizge yńǵaıly ýaqytta júginý qajet. Zeınetaqy tólemin taǵaıyndaý týraly ótinishti zeınetkerlik jasqa tolǵanǵa deıingi 10 kún ishinde berýge bolady.

Biryńǵaı ótinish negizinde alýshyǵa memlekettik kepildik (ınflıatsııa deńgeıin eskere otyryp, naqty engizilgen mindetti zeınetaqy jarnalarynyń, mindetti kásiptik zeınetaqy jarnalarynyń somasy men zeınetaqy jınaqtarynyń somasy arasyndaǵy aıyrma) tóleý boıynsha belsendi qyzmet te kórsetiledi.

BJZQ alýshylardyń Qazaqstan Respýblıkasy zańnamasynyń erejelerine sáıkes eseptelgen zeınetaqy tólemderiniń somasyn memlekettik korporatsııaǵa aýdarady.

Aı saıynǵy zeınetaqy tóleminiń mólsheri Qazaqstan Respýblıkasy Úkimetiniń 2013 jylǵy № 1042 qaýlysymen bekitilgen Zeınetaqy tólemderiniń mólsherin esepteýdi júzege asyrý ádistemesine sáıkes eseptelgen zeınetaqy tólemderiniń jyldyq somasynyń on ekiden bir bóligi retinde aıqyndalady.

Bul rette aı saıynǵy zeınetaqy tóleminiń eseptelgen mólsheriniń tólemi respýblıkalyq bıýdjet týraly zańda tıisti qarjy jylyna belgilengen eń tómen kúnkóris deńgeıiniń 54 paıyzynan kem emes mólsherde júzege asyrylady (01.04.2020 j. bastap – 17 640,72 teńge = 54% * 32 668).

Eger ótinish berilgen kúngi zeınetaqy jınaǵynyń somasy tıisti qarjy jylyna arnalǵan respýblıkalyq bıýdjet týraly zańda belgilengen eń tómen zeınetaqynyń on eki eselengen mólsherinen aspaıtyn bolsa, bul soma alýshyǵa BJZQ-dan bir ret birjola tólenedi (01.04.2020 j. bastap bul soma 485 292 teńgege teń = 12 * 40 441).

Eger kezekti aı saıynǵy tólem júzege asyrylǵannan keıin alýshynyń JZSh-ǵy zeınetaqy jınaqtarynyń qaldyǵy tıisti qarjy jylyna arnalǵan respýblıkalyq bıýdjet týraly zańda belgilengen eń tómen kúnkóris deńgeıiniń 54 paıyzynan kem somany qurasa, bul qaldyq kezekti tólemniń somasymen birge tólenedi.

Memlekettik korporatsııa BJZQ-dan bıýdjet qarajaty jáne zeınetaqy jınaǵy esebinen tólemderdi alýshynyń ótinishte kórsetilgen bank shotynyń birine bir kún ishinde júzege asyrady.

BJZQ-dan zeınetaqy jınaqtarynyń tólemi qazir mynadaı jaǵdaıda:

Qazaqstan Respýblıkasynan tys jerlerge turaqty turýǵa ketkende;

merzimsiz ýaqytqa I nemese II toptaǵy múgedektik belgilengende;

jerleý jáne muragerlik;

erikti zeınetaqy jarnasy esebinen – elý jasqa tolǵanda, sondaı-aq, múgedektik belgilengende júzege asyrylady.


Basty sózder: Zeınetaqy júıesi,
Joǵary qaraı