Aýa raıy
Astana 9 °S
Almaty 19 °S
valıýta baǵamy
USD 421.58
EUR 496.83
RUB 5.53
CNY 62.20

Chempıondar Lıgasy: «Barselona» men «Bavarııa» jarysty jalǵastyrady

2020 jyldyń 9 tamyz 2020 03:14

NUR-SULTAN. QazAqparat - Búgin UEFA Chempıondar lıgasynda shırek fınalǵa joldama alǵan barlyq komandalar anyqtaldy, dep habarlaıdy QazAqparat tilshisi.

Búgin Ispanııada «Barselona» óz alańynda Italııanyń «Napolı» komandasyn qabyldady. Olar alǵashqy kezdesýde 1:1 esebimen teń tarqasqan bolatyn. Sondyqtan búgin «Barselona» baryn saldy. Birinshi kezeńniń ózinde qarsylastar qaqpasyna úsh gol soqty. Ony Kleman Langle 10, Lıonel Messı 23, Lýıs Sýares (penaltıden) 46-mınýtta óziniń enshisine jazdy. Oǵan birinshi kezeń biter sátte «Napolı» oıynshysy Lorentso Insıne penaltıden jaýap qaıyrdy. Oıynda «Barselona» 3:1 esebimen jeńiske jetti.

Taǵy bir kezdesý Germanııada «Bavarııa» (Mıýnhen) men Anglııanyń «Chelsı» (London) komandalary arasynda ótti. Aıta keterligi, nemis fýtbolshylary Londonda ótkizilgen oıynda alań ıeleri qaqpasyna jaýapsyz úsh gol soqqan edi. Sol sebepti jankúıerler jarysty qaı komandanyń jalǵastyratynyn aldyn-ala sheship qoıdy. Qarymta kezdesýde de «Chelsı» laıyqty qarsylyq kórsete alǵan joq. Oıynnyń 10-mınýtynda «Bavarııa» shabýylshysy Robert Levandovskı penaltıden esep ashsa, onyń komandalasy Ivan Perıshıch 24-mınýtta esepti ústemeleı tústi. «Chelsı» oıynshysy Temmı Abraham 44-mınýtta bir gol soǵyp esep aıyrmasyn qysqarta tústi. Oıynnyń ekinshi kezeńinde «Bavarııa» sapynan Korentın Tolısso 76, Robert Levandovskı 83-mınýtta qos gol soqty. Esep 4:1. «Bavarııa» shırek fınalǵa joldama aldy.

Esterińizge sala ketelik, dop dodasy 11 naýryzdan keıin koronavırýs indetine baılanysty keıinge shegerildi. Týrnırdiń 1/8 fınalyndaǵy tórt oıyn bolyp, qalǵan tórteýi ótkizilmeı qalǵan edi. Shırek fınalǵa naýryz aıynda «Leıptsıg» (Germanııa), «Atletıko Madrıd» (Ispanııa), «Atalanta» (Italııa) jáne «Parı Sen-Jermen» (Frantsııa) komandalary joldama alǵan bolatyn. Keshe olardyń qataryna «Manchester Sıtı» (Anglııa) jáne «Lıon» (Frantsııa) komandalary qosyldy.

Shırek fınalda «Leıptsıg» (Germanııa) pen «Atletıko Madrıd» (Ispanııa), «Atalanta» (Italııa) jáne «Parı Sen-Jermen» (Frantsııa), «Manchester Sıtı» men «Lıon», «Barselona» men «Bavarııa» komandalary kezdesedi. Oıyndar 12-15 tamyz aralyǵynda ótkiziledi.


Avtor Ádiljan Úmbet
Basty sózder: Sport, Qoǵam,
Joǵary qaraı