Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Chempıondar lıgasynyń fınaly kezinde polıtsııa 68 adamdy ustap áketti

2022 jyldyń 29 mamyr 2022 15:56

BRıÝSSELЬ. QazAqparat – Senbi kúni Chempıondar lıgasynyń fınaly kezinde jáne odan keıin Parıj polıtsııasy Frantsııa astanasynyń Sen-Denı mańyndaǵy «Stad de Frans» stadıonynda bolǵan tártipsizdik kezinde ártúrli tártip buzǵany úshin 68 adamdy qamaýǵa aldy. Bul týraly L’equipe portaly jazdy, dep habarlaıdy QazAqparat tilshisi.

Jeńil dene jaraqatyn alǵan 238 jankúıerge alǵashqy medıtsınalyq kómek kórsetildi.

ÝEFA men Frantsııa bıliginiń málimetinshe, Chempıondar lıgasynyń fınaly aldyndaǵy beıbereketsizdikke matchty kórgisi kelgen myńdaǵan adamnyń qolynda jalǵan bıletterdiń bolýy sebep bolǵan. Stadıonǵa kireberistegi jankúıerlerdiń kóptiginen Chempıondar lıgasynyń fınaly otyz mınýttan astam ýaqytqa keshiktirilip bastaldy.

«Match bastalýyna az ýaqyt qalǵan kezde «Lıverpýl» jankúıerleri úshin bólingen minberler jaǵynan «Stad de Frans» kireberisindegi týrnıketterdi kireberiste jumys istemeıtin jalǵan bıletterdi satyp alǵan myńdaǵan kórermen jaýyp tastady», - dep túsindirdi fýtbol uıymy.

«Match bastalǵannan keıin stadıon syrtyndaǵy adamdar sany arta bergendikten, Parıj polıtsııasy olardy taratý úshin kózden jas aǵyzatyn gaz qoldanýǵa májbúr boldy», - delingen bılik málimdemesinde.

Eske sala keteıik, Chempıondar lıgasy fınalynda brıtandyq «Lıverpýl» men Ispanııanyń «Real Madrıd» komandasy oınaǵan bolatyn.

1:0 esebimen madrıdtik klýb jeńiske jetti.


Basty sózder: Ashyq, Sport, Fýtbol, Oqıǵa, Eýropa,
Joǵary qaraı