Aýa raıy
Astana -18 °S
Almaty -5 °S
valıýta baǵamy
USD 421.58
EUR 496.83
RUB 5.53
CNY 62.20

COVID-19-ǵa qarsy jappaı vaktsınatsııalaý qashan bastalýy múmkin - sarapshy pikiri

2020 jyldyń 22 qarasha 2020 15:08

NUR-SULTAN. QazAqparat - Búginde álem jurtshylyǵyn koronavırýsqa qarsy vaktsınanyń ázirlenýi men halyqty jappaı vaktsınatsııalaý máselesi tolǵandyryp otyr. Bul rette álemdik deńgeıdegi birneshe kompanııanyń vaktsına jasap jatqany jáne preparattyń taıaý ýaqytta shyǵarylatyndyǵy da belgili. Vaktsına jasaý isimen aınalysyp jatqan elderdiń qatarynda Qazaqstan da bar. Buǵan qosa, elimiz Reseımen birlesip, COVID-19-ǵa qarsy vaktsına shyǵaratyn óndiristi jolǵa qoıý máselesin de pysyqtaýda. Osy oraıda QazAqparat tilshisine suhbat bergen Qazaqstannyń reprodýktıvti medıtsına qaýymdastyǵynyń prezıdenti, professor Vıacheslav Lokshın koronavırýsqa qarsy vaktsınanyń qashan shyǵýy múmkindigine qatysty oıymen bólisti.

«Vaktsınanyń daıyn bolǵany jaıynda jaqsy habar bar. Alaıda, onyń Qazaqstanǵa jetýine ne bolmasa ózimizdiń ǵalymdar ázirlep jatqan vaktsınanyń qabyldanýyna áli de bolsa jarty jyl, tipti 1 jyl ýaqyt kerek», - dedi Vıacheslav Lokshın.

Sonymen qatar ǵalym Qazaqstan men Reseıdiń COVID-19-ǵa qarsy vaktsınany birlese shyǵarý máselesine qatysty oıyn bildirip ótti.

«Ókinishke oraı, áli kúnge deıin Reseıde qaýipsizdigi naqty dáleldengen vaktsına joq. Degenmen, Chýmakov atyndaǵy ınstıtýt ázirlep jatqan úshinshi vaktsınaǵa úlken úmit artyp otyrmyn. Ol óziniń óndirisi bar klassıkalyq ınstıtýty sanalady. Menińshe, eger olar klınıkalyq synaqty - úshinshi fazany ótkizetin bolsa, onda vaktsınanyń ázirlengendigine úlken úmitimiz bolady», - dedi professor.

Alaıda, Qazaqstannyń reprodýktıvti medıtsına qaýymdastyǵynyń prezıdenti el azamattaryn erkinsýge jol bermeýge jáne sanıtarlyq normalardy qatań saqtaýǵa shaqyrdy.

«Jaǵdaıdyń munan ary qalaı órbıtindigin áli bilmeımiz. Qazirgi ýaqytta amerıkalyq, eýropalyq vaktsınalardy bilip otyrmyz. Bul óte jaqsy. Biraq, olar qoldanysqa engizilgenge deıin ómir súrýimiz qajet. Vaktsınalar jappaı paıdalanýǵa engizilgenge deıingi 3-4 aıdyń ishinde saqtyq sharalaryn saqtamaıtyn bolsaq, onda kóptegen adamnyń ómirin vırýs jalmaýy múmkin», - dedi ol.

Aıta keterligi, taıaýda Qazaqstan Prezıdenti Qasym-Jomart Toqaev pen Reseı Prezıdenti Vladımır Pýtın telefon arqyly sóılesip, onda taraptar áńgimelesý barysynda koronavırýs pandemııasymen kúres, onyń ishinde Qazaqstan aýmaǵynda birlesken vaktsına óndirisin uıymdastyrý josparyn talqylaǵan edi. Al Ortalyq kommýnıkatsııalar qyzmetindegi baspasóz máslıhaty barysynda QR Densaýlyq saqtaý vıtse-mınıstr - Bas memlekettik sanıtar dáriger Erlan Qııasov osy máselege túsinikteme bergen bolatyn.

«Keshe Memleket basshylary telefon arqyly áńgimelesý barysynda bul máseleni kóterdi. Búgingi kúni bul másele pysyqtalýda. Bul ıdeıa bir kún buryn ǵana týǵan edi. Sondyqtan dál qazir naqty eshteńe aıta almaımyn», - degen edi Erlan Qııasov.

Sonymen qatar ol elimiz koronavırýspen kúres úshin satyp alýy múmkin 3 vaktsınany ataǵan bolatyn.

«Búgingi kúni álemde belgili ári naqtylanǵan 198 vaktsına-kandıdat ázirlenip jatyr. 42 vaktsına adamdarǵa klınıkalyq synaqtan ótýde. Qazirgi ýaqytta keleshegi bar dep 3 vaktsınany bóle qarastyryp otyrmyz. Olar Oksvord vaktsınasy, Reseıde ázirlenip jatqan «Spýtnık-5» jáne qazaqstandyq vaktsına. Munan bólek, qazaqstandyq ǵalymdar ázirlep jatqan vaktsınaǵa da úlken úmit artyp otyrmyz. Bul vaktsınanyń alǵashqy synaǵy ótkizilip, qazirgi ýaqytta ekinshi kezeńi júzege asyrylyp jatyr. Kelesi jyldyń basynda osy vaktsınany beıimdeýdiń úshinshi satysyna kirisemiz degen úmit bar. Al vaktsınatsııalaýǵa jatatyn adamdar sanyna qatysty jumys júrgizilýde. Aldyn ala boljamdy san 2 mln-nan astam adam bolatyn. Qazirgi ýaqytta qosymsha kontıngent anyqtalyp otyr. Sondyqtan bul sandy ulǵaıta túsemiz. Al vaktsınany tańdaý synaqtyń úshinshi kezeńi ótkizilip, ony tirkeýdiń barlyq zańdy protsedýralary júrgizilgennen keıin ǵana anyqtalady», - dedi vıtse-mınıstr.

Qazan aıynyń ortasynda elimizdiń Densaýlyq saqtaý mınıstri Alekseı Tsoı Dúnıejúzilik densaýlyq saqtaý uıymy qazaqstandyq vaktsınany klınıkalyq zertteýlerden ótkizýge kelisim bergenin málimdegen bolatyn.

«Dúnıejúzilik densaýlyq saqtaý uıymy qazaqstandyq vaktsınany klınıkalyq zertteýlerden ótkizýge resmı túrde ruqsat berdi. Vaktsınanyń qaýipsizdigi men tıimdiligin baǵalaý maqsatynda 2020 jylǵy 17 qyrkúıekte Ulttyq ftızıopýlmonologııa ǵylymı ortalyǵynyń bazasynda qazaqstandyq vaktsınany klınıkalyq zertteýdiń I kezeńin júrgizýge ruqsat berildi. 17 qarashada II kezeńniń klınıkalyq zertteýleri jáne 2021 jyldyń 24 sáýirinde III kezeń aıaqtalady», - degen edi mınıstr.

Sonymen qatar ol Qazaqstanda vaktsına óndiretin zaýyt salynyp jatqanyn aıtqan edi.

«Ol zaýyttyń qazaqstandyqtardyń qajettilikterin óteýge kúshi jetedi. Óz vaktsınamyz synaqtyń barlyq satysynan ótken jaǵdaıda osy zaýyttan shyǵarylatyn bolady. Klınıkalyq synaqtan ótkenge deıin vaktsınanyń baǵasy qansha bolatyny naqty belgili emes, biraq 2-3 dollar kóleminde bolady dep oılaımyz», - deıdi ol.

Aıta keterligi, búgin ǵana Úlken jıyrmalyqqa (G20) kiretin el basshylary koronavırýsqa qarsy vaktsınalar men dári-dármekterdiń, sondaı-aq kedeı elder de kómek alýy úshin koronavırýs ınfektsııasyna testilerdiń teń dárejede bólinýin qarjylandyrý mindettemesin qabyldaýǵa nıetti ekendikterin bildirgen bolatyn. Sonymen qatar bıyl «jıyrmalyq» memleketteri pandemııanyń saldaryna qarsy turý úshin birqatar shara qabyldady. Atap aıtqanda, koronavırýs vaktsınasyn óndirýdi jáne taratýdy qoldaý maqsatynda álemdik densaýlyq saqtaý júıesine 21 mıllıard dollar salý týraly sheshim qabyldandy. G20 elderi, sondaı-aq, álemdik ekonomıkany qalpyna keltirýge 11 trln dollar bóldi.


Joǵary qaraı