Aýa raıy
Astana 11 °S
Almaty 15 °S
valıýta baǵamy
USD 421.58
EUR 496.83
RUB 5.53
CNY 62.20

COVlD-19-ǵa qarsy qazaqstandyq vaktsınany eriktilerge synaý qyrkúıekte bastalady

2020 jyldyń 4 tamyz 2020 17:40

NUR-SULTAN. QazAqparat - Qazaqstandyq 5 ázirleýshi COVlD-19-ǵa qarsy vaktsınany ózderine synady. Bul týraly Bıologııalyq qaýipsizdik problemalary ǵylymı-zertteý ınstıtýtynan málim etti, dep habarlaıdy QazAqparat tilshisi.

«Dúnıejúzilik densaýlyq saqtaý uıymynyń talabyna sáıkes, 2020 jyldyń 13 tamyzynda makak-rezýstan antıdeneniń keminde 7 log bolýy tıis sońǵy tıtrin anyqtaý josparlanyp otyr. Bul joǵary ımmýnogendik kórsetkish sanalady. 2020 jyldyń 26 shildesinde vaktsınanyń 5 ázirleýshisi tiri vırýspen jumys isteý barysynda qaýipsizdikterin qamtamasyz etý úshin erikti túrde vaktsınany ózderine synady. Birneshe táýlik ótkennen keıin olardyń ózderin sezinýi jaqsy, dene qyzýy men allergııalary joq. Klınıkaǵa deıingi synaq 2020 jyldyń 20 tamyzynda aıaqtalyp, nátıjesi QR Densaýlyq saqtaý mınıstrligine beriledi. QR Densaýlyq saqtaý mınıstrliginen ruqsat alynǵannan keıin 2020 jyldyń 20 qyrkúıeginde Almaty qalasyndaǵy klınıkanyń bazasynda COVID-19-ǵa antıdenesi joq 44 eriktige klınıkalyq synaq (І faza) bastalýy tıis», - dep atap ótedi ınstıtýttan.

COVID-19-ǵa qarsy QazCovid-in vaktsınasyn ınstıtýttyń bas dırektory K.Zakarıa jáne ǵylymı qyzmetkerler: L.Qutymbetov, B.Haırýllın, M.Orynbaev, Q.Sultanqulov, E.Ábdiraıymov, S.Nurabaev ózderine synaǵan.

«Vaktsına COVID-19-ǵa qarsy birinshi otandyq vaktsınany daıyndaý jáne saqtaý tehnologııasyn ázirleý boıynshaǵa ǵylymı-zertteý jumystaryn tikeleı oryndaıtyn ınstıtýttyń ǵylymı qyzmetkerlerin tolyqtaı epıdemologııalyq qorǵaý úshin qajet boldy. Atalǵan ǵylymı qyzmetkerler COVID-19-ǵa shaldyǵyp qalǵan jaǵdaıda ınstıtýt otandyq vaktsına ázirleýge baǵyttalǵan mańyzdy memlekettik mindetti oryndaıtyn eń qundy mamandarynan uzaq ýaqytqa aıyrylyp qalar edi. Ózi daıyndaǵan vaktsınany vaktsınatsııalaý medıtsınalyq jáne ımmýnobıologııalyq preparattardy ázirleýshilerdiń jarııa emes ǵylymı standarty sanalady. Ázirleýshi eń aldymen óziniń ázirlemesiniń qaýipsizdigi men ımmýnogendigin ózine synaýy tıis. Ekinshiden, óziniń zertteýiniń nátıjesi men sapasy úshin tolyqtaı jaýapkershilik alady. Osylaısha, klınıkalyq synaqqa qatysatyn eriktilerdiń qaýipsizdigine kepildik beredi», - dedi ınstıtýt dırektory Kúnsulý Zakarıa.

Instıtýt málimetinshe, 2020 jyldyń qazan aıynyń ortasynda Dúnıejúzilik densaýlyq saqtaý uıymynyń talaptaryna saı keletin 200 eriktige klınıkalyq synaq ótkizýdiń ІІ fazasyna shyǵý josparlanǵan. Klınıkalyq synaqtyń ІІ fazasy 2020 jyldyń jeltoqsan aıynda aıaqtalýy tıis.

Kóptegen eldiń (Qytaı, AQSh, Reseı) tájirıbesin jáne halyqty vaktsınamen qamtamasyz etý qajettigin qaperge ala otyryp, klınıkalyq synaq fazasynyń sanyn 4-ten 2-ge deıin qysqartý qarastyrylyp jatyr. Bul DDSU talaptaryna qaıshy bolmaıdy.

Kandıdattyq vaktsınanyń klınıkalyq synaq nátıjelerin DDSU rastaǵan jaǵdaıda Bıologııalyq qaýipsizdik problemalary ǵylymı-zertteý ınstıtýty janyndaǵy salynyp jatqan Immýnobıologııalyq preparattar óndirisi zaýyty vaktsına shyǵarýǵa daıyn. Zaýyttyń jobalyq qýaty jylyna 60 mln dozany quraıdy. Qurylys jumysy 2020 jyldyń jeltoqsanynda aıaqtalady.

Este bolsa, 2020 jyldyń 23 naýryzynda COVlD-19-ǵa shaldyqqan alǵashqy patsıentten patologııalyq materıal alynyp, bir aptadan keıin ınstıtýt ǵalymdary SARS-CoV-2 vırýsyn bólip shyǵardy. 2020 jyldyń 9 mamyrynda COVlD-19-ǵa qarsy kandıtatty ınaktıvtelgen vaktsına ázirleý boıynsha jumysty aıaqtap, onyń hattamasy Dúnıejúzilik densaýlyq saqtaý uıymyna jiberildi. 15 mamyrda DDSU aldyn ala tekserýden keıin ony klınıkaǵa deıingi synaqqa jiberilgen kandıdatty vaktsınalar tizimine qosyp, vaktsına jáne ázirleýshi týraly aqparatty resmı saıtynda (www.who.int) ornalastyrdy. Sol kúni zerthanalyq tyshqan, sırııalyq atjalman, teńiz shoshqasy, kúzen jáne úı qoıanyna kandıdatty vaktsınany klınıkaǵa deıingi synaqty bastady. Klınıkaǵa deıingi synaq vaktsınanyń DDSU reglamenttegen barlyq parametrler, atap aıtqanda ýyttylyǵy, dert týyndatýshylyǵy, allergendiligi, ımmýnogendigi boıynsha DDSU talaptaryna jáne Qazaqstan Respýblıkasynyń memlekettik farmakopııasyna saı keletindigin kórsetti.

2020 jyldyń 6 shildesinde vaktsına QR DSM Ulttyq dárilik zattardy saraptaý ortalyǵyna berildi. Ortalyq buǵan deıin Bıologııalyq qaýipsizdik problemalary ǵylymı-zertteý ınstıtýty alǵan vaktsınany klınıkaǵa deıingi synaq nátıjeleriniń jańǵyrtylatyndyǵyn qýattady.

2020 jyldyń 10 shildesinde Bıologııalyq qaýipsizdik problemalary ǵylymı-zertteý ınstıtýty vaktsınany maımylǵa (makaka-rezýs) synaqtan ótkizýdi bastady. lg M, lg G antıdene tıtri jetinshi kúnde 3,5 10Q (joǵary kórsetkish) bolǵan edi.

Aıta ketken jón, Bıologııalyq qaýipsizdik problemalary ǵylymı-zertteý ınstıtýty ázirlegen Covid-19 qarsy ekinshi vaktsına Dúnıejúzilik densaýlyq saqtaý uıymynyń saıtyna tirkelgen bolatyn.

Buǵan deıin Densaýlyq saqtaý mınıstrligi vaktsınalaý - ınfektsııalyq aýrýlardan qorǵanýdyń tıimdi ádisi ekenin málimdegen edi.

Qazaqstandyq ǵalymdar 7 vaktsına daıyndaý tehnologııasyn jasady.

Jalpy elimizde koronavırýsqa qarsy vaktsınanyń bes prototıpi boıynsha jumys júrgizilip jatyr. COVID-19 vaktsınasyn jasaý boıynsha jumystardyń barysyna qyzyǵýshylyq tanytqan azamattar DDSU veb-saıtynda vaktsınaǵa úmitkerler týraly jalpy sholýdy oqı alady.

Aldyn ala boljamǵa sáıkes, Qazaqstanda koronavırýsqa qarsy vaktsına 65 jastan asqan, júrek-qan tamyry aýrýy, qant dıabeti jáne sozylmaly ókpe aýrýlary bar táýekel tobyna kiretin adamdarǵa jáne medıtsına qyzmetkerlerine salynatyn bolady. Vaktsına alatyndardyń boljamdy sany 2 347 000 adamdy quraıdy.


Joǵary qaraı