Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Damý áleýeti bar 3561 aýyl jańǵyrtylmaq

2021 jyldyń 12 qazan 2021 10:23

NUR-SULTAN. QazAqparat – Búgin Úkimet otyrysynda QR Ulttyq ekonomıka mınıstri Áset Erǵalıev «Qýatty óńirler – el damýynyń draıveri» ulttyq jobasy qandaı nátıje beretinin aıtty, dep habarlaıdy QazAqparat tilshisi.

«Qýatty óńirler – el damýynyń draıveri» ulttyq jobasy bazalyq qyzmetterge teń qoljetimdilikti jáne elimizdiń kóliktik baılanysyn qamtamasyz etýge baǵyttalǵan. Bul óńirler arasyndaǵy qatynasty jáne óńirler ishindegi eldi mekenderdiń bir-birimen baılanysyn qamtamasyz etedi.

Osy baǵyttardy iske asyrý aıasynda 4 mindet, 20 kórsetkish jáne 94 is-shara kózdelgen. Ulttyq jobany qarjylandyrýdyń jalpy kólemi shamamen 7,6 trln teńge, onyń ishinde respýblıkalyq bıýdjette 4 trln teńgeden astam, al jergilikti bıýdjetterde 786 mlrd teńge qarajat qarastyrylǵan. Bul qarajat shamamen 2,8 trln teńge jeke ınvestıtsııalar tartýǵa múmkindik beredi», - dedi Á. Erǵalıev.

«Qýatty óńirler – el damýynyń draıveri» ulttyq jobasynyń negizgi sharalarynda 13,5 trln teńge turǵyn úı qurylysyna ınvestıtsııa tartylady, 16 myń shaqyrym sýmen jabdyqtaý jáne sý burý jelileri salynady. Ekinshi joldardy salý jáne «Dostyq-Moıynty» ýchaskesin elektrlendirý esebinen «Qytaı-Eýropa-Qytaı» qatynasynyń ótkizý qabiletin 5 esege ulǵaıtý josparlanýda. «Túrkistan-Shymkent-Tashkent» joǵary jyldamdyqty magıstraliniń qurylysy qamtamasyz etiledi.

Ulttyq jobany iske asyrý qorytyndylary boıynsha mynadaı kórsetkishterine qol jetkiziletin bolady:

- Qalalar men aýyldarda sýmen jabdyqtaý jáne sý burý qyzmetterine 100% qoljetimdilik qamtamasyz etiledi.

- 2025 jyldyń sońyna deıin damý áleýeti bar 3561 aýyldy jańǵyrtý josparlanýda.

- 103 mln sharshy metr turǵyn úı paıdalanýǵa beriletin bolady.

- Respýblıkalyq avtojoldardyń barlyǵy jáne jergilikti deńgeıdegi avtojoldardyń 95% jaqsy jaǵdaıǵa jetkizý kózdelip otyr.

- Avtomobıl joldarynyń sapasyn arttyrý tranzıttik júk aǵyny kólemin 2025 jylǵa qaraı 30 mıllıon tonnaǵa deıin ulǵaıtýǵa múmkindik beredi.

«Jalpy, joǵaryda atalǵan úsh Ulttyq jobany tıimdi iske asyrý turaqty ekonomıkalyq ósýdi 5% joǵary deńgeıde qamtamasyz etýge, halyqtyń tabysyn 27% arttyrýǵa jáne 450 myń turaqty jumys ornyn qurýǵa múmkindik beredi.

Sonymen qatar, Dúnıejúzilik ekonomıkalyq forýmnyń básekege qabilettilik reıtınginde ınfraqurylym sapasy boıynsha Qazaqstannyń pozıtsııasyn qyrqynshy orynǵa deıin jaqsartý kózdelýde», - dedi mınıstr.

Budan buryn habarlanǵandaı, mınıstr Úkimette úsh ulttyq jobany tanystyrdy.

Qazaqstan Respýblıkasy Prezıdenti janyndaǵy Reformalar jónindegi joǵary keńestiń tapsyrmasyn oryndaý maqsatynda, Ulttyq ekonomıka mınıstrligi múddeli memlekettik organdarmen birlesip úsh Ulttyq jobany ázirledi. Olar «Qazaqstandyqtardyń ál-aýqatyn arttyrýǵa baǵyttalǵan turaqty ekonomıkalyq ósý» jáne «Kásipkerlikti damytý», sonymen birge «Qýatty óńirler – el damýynyń draıveri» atty ulttyq jobalar.


Joǵary qaraı