Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Darıǵa Nazarbaeva BUU ókilderimen kezdesti

2021 jyldyń 14 qazan 2021 14:42

NUR-SULTAN. QazAqparat - QR Parlamenti Májilisiniń depýtaty Darıǵa Nazarbaeva BUU Bas hatshysynyń arnaýly ókili, BUU-nyń Ortalyq Azııadaǵy preventıvti dıplomatııa jónindegi óńirlik ortalyǵynyń jetekshisi Natalıa Germanmen jáne BUU Bas hatshysynyń kómekshisi, BUUDB ákimshisiniń kómekshisi jáne BUUDB Eýropa men TMD boıynsha Óńirlik bıýrosynyń dırektory Mırıana Spolıarıch Eggermen kezdesti, dep habarlaıdy QazAqparat.

Kezdesý barysynda Darıǵa Nazarbaeva men Natalıa German Qazaqstan men BUU-nyń bilim berýdi damytý, ekologııa, áıelder men jastar bastamasyn qoldaý salasyndaǵy áriptestik máselesin talqylady.

Darıǵa Nazarbaeva BUU-nyń mańyzdy rólin atap, «BUU halyqaralyq qaýipsizdikti qamtamasyz etý úshin halyqaralyq qoǵamdastyqtyń kúsh-jigerin shoǵyrlandyratyn jahandyq uıym bolyp qala beredi» dedi.

Natalıa German táýelsizdik jyldary Qazaqstannyń qol jetkizgen tabysyn joǵary baǵalap, elimizdiń beıbitshilikti, qaýipsizdikti jáne turaqty damýdy nyǵaıtý salasyndaǵy halyqaralyq bastamalaryn erekshe atady.

Ári BUU Bas hatshysy Antonıý Gýterrıshtiń «Qazaqstan men BUU áriptestigi úlgi-ónege» degen sózin tilge tıek etti.

Taraptar Qazaqstannyń Almaty qalasynda BUU Óńirlik ortalyǵyn qurý týraly bastamasynyń ózektiligine toqtaldy.

Natalıa German BUU-nyń Aýǵanstanǵa járdemdesý jónindegi mıssııasyn Almatyǵa ýaqytsha ornalastyrý máselesin jedel sheshkeni úshin BUU atynan Qazaqstanǵa alǵys bildirdi.

Áıelderdiń ózin-ózi tanytý múmkindikterin keńeıtýge toqtalǵan BUU-nyń arnaýly ókili bul baǵytta Qazaqstanda naqty reformalardyń júzege asyp jatqanyn atap ótti.

Parlamentte jáne jergilikti ókildi organdarda áıelder men jastar úshin 30 paıyzdyq kvota engizilgen edi.

Buǵan qosa, Qazaqstan Eýropalyq odaqpen birlesken bilim berý baǵdarlamasyna Qazaqstan men Ózbekstanda aýǵan áıelderin oqytý týraly bastama kóterdi.

Natalıa German alǵashqy otyrysy 2020 jyly jeltoqsan aıynda ótken kóshbasshy áıelder keńesin qurý jónindegi bastamasy úshin Darıǵa Nazarbaevqa alǵys aıtty. «Nursultan Nazarbaev Qory bilim berý, jastar bastamasyn qoldaý salasyndaǵy jobalardy sátti júzege asyryp keledi. Áriptestik pen tájirıbe almasýǵa bizdiń múmkindigimiz mol dep oılaımyn. Sol sebepti, Darıǵa Nursultanqyzy, sizdi bıyl jeltoqsanda Tashkentte ótetin kóshbasshy áıelder keńesiniń kelesi otyrysyna qatysýǵa shaqyramyn», - dedi Natalıa German.

Májilis depýtaty óz kezeginde qarttardyń jumysqa ornalasýyn, bos ýaqytyn jaqsy ótkizýin, densaýlyǵyn nyǵaıtýǵa arnalǵan baǵdarlamalar jasaýǵa basa mán berýdi usyndy.

Darıǵa Nazarbaevanyń BUUDB Eýropa men TMD boıynsha Óńirlik bıýrosynyń dırektory Mırıana Spolıarıch Eggermen júzdesýi turaqty damý maqsattaryn (TDM) iske asyrý máselesine arnaldy.

Mırıana Spolıarıch Egger Qazaqstanda genderlik máselege baılanysty TDM memleketishilik baǵdarlamalar men strategııalardyń sátti túrde ıntegratsııalanǵanyn erekshe atady.

BUU ókili Qazaqstannyń áıelder quqyǵyn qorǵaý, óńirlik deńgeıde beıbitshilik pen qaýipsizdikti qamtamasyz etý salasyndaǵy bastamalaryn oń baǵalady.


Basty sózder: BUU, Parlament,
Joǵary qaraı