Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Densaýlyq saqtaý ulttyq ortalyǵy Spýtnık V-men vaktsınalaý kestesiniń ózgerýin túsindirdi

2021 jyldyń 3 mamyr 2021 16:53

NUR-SULTAN. QazAqparat – Qazaqstanda Sputnik V vaktsınasyn saldyrý kestesine ózgerister engizýge qatysty QR DSM Qoǵamdyq densaýlyq saqtaý ulttyq ortalyǵy túsinik berdi, dep habarlaıdy QazAqparat.

Jaqynda QR Bas memlekettik sanıtarlyq dárigeriniń 2021 jylǵy 30 sáýirdegi N17 qaýlysyna sáıkes Sputnik V –men vaktsınalaý kestesine ózgerister engizildi.

Bul jaǵdaıda osy vaktsınanyń birinshi jáne ekinshi komponentterin engizý aralyǵy 45 kún bolýy kerek. Eger 45-shi kúni ekinshi komponentti vaktsınalaý múmkin bolmasa (demalys, mereke kúnderine sáıkes kelý, basqa eldi mekenge ketý jáne t.b.) 90 kún ishinde vaktsınalaýǵa ruqsat etiledi.

Vaktsınatsııa kestesine qatysty bul ustanym professor, RǴA akademıgi, Gamaleı atyndaǵy epıdemıologııa jáne mıkrobıologııa ulttyq zertteý ortalyǵynyń dırektory A. Gıntsbýrgtyń 2021 jylǵy 22 sáýirdegi resmı málimdemesine negizdelgen.

«Vaktsınologııa prıntsıpteri kóp dozaly alǵashqy vaktsınalaý serııasyndaǵy dozalar arasyndaǵy alty aptalyq aralyqty qoldaıdy. Sonymen qatar, negizgi jáne qosymsha doza arasyndaǵy uzaq alshaqtyq V-jasýshasynyń jadysynyń jetilýine múmkindik beredi, nátıjesinde joǵary jáne turaqty reaktsııa paıda bolady. Bir rettik dozadan keıin basqa kóp dozaly vaktsınalardy paıdalaný tájirıbesi jasóspirimder men eresekterde qorǵanys alty aıǵa nemese odan da uzaqqa sozylýy múmkin ekenin kórsetedi (mysaly, A gepatıti jáne adamnyń papılloma vırýsyna qarsy vaktsınalary). Munymen qosa, koronavırýs ınfektsııasyna qarsy vaktsınalar boıynsha ǵylymı zertteýler jalǵasýda. Tıimdilik boıynsha dáleldi bazasy alynǵan jaǵdaıda, qosymsha usynystar jasalatyn bolady», - delingen Qoǵamdyq densaýlyq saqtaý ulttyq ortalyǵy baspasóz qyzmeti málimetinde.

Sonymen, 2021 jyly 6 naýryzda The Lancet ǵylymı basylymynda AstraZeneca COVID-19 vaktsınasynyń Ulybrıtanııa, Brazılııa jáne Ońtústik Afrıka júrgizilgen úsh qarapaıym randomızatsııalanǵan baqylanbaly zertteýlerdiń nátıjeleri negizinde dozalar arasyndaǵy aralyqty arttyrǵan jaǵdaıda tıimdiligi týraly aqparat jarııalandy.

Zertteý nátıjelerine sáıkes, eger ekinshi ekpe 12 aptadan nemese odan keıin jasalsa, onyń tıimdiligi 81,3 paıyzdy quraıdy. Al eki dozanyń arasyndaǵy aralyq tek 14 kún bolsa, onda tıimdilik deńgeıi 66,7 paıyz shamasynda baıqaldy.

«Álemde koronavırýs ınfektsııasyna qarsy jappaı vaktsınalaý júrgizgennen bastap, bul tájirıbe kóptegen elderde indetke qarsy basqa vaktsınalarǵa da qoldanylyp otyr. Qazirgi kezde alynǵan ǵylymı málimetterine súıene otyryp, Ulybrıtanııa vaktsınalarǵa arnalǵan ekpe egý josparyn ózgertti. Eger buryn vaktsınanyń ekinshi dozasyn birinshisinen 21 kún ótken soń salý josparlanǵan bolsa, qazir aralyq merzimi úsh aıǵa deıin sozyldy», - dep atalyp ótken ortalyq derekterinde.

2021 jyldyń 14 sáýirinen bastap Frantsııada mRNQ vaktsınasynyń ekpeleri arasyndaǵy (BioNTech / Pfizer jáne Moderna kompanııasy) ınterval 4 aptanyń ornyna 6 aptaǵa deıin ulǵaıtyldy.

Resmı derekterge sáıkes Irlandııanyń densaýlyq saqtaý mınıstri jaqyn kúnderi Covid-19 vaktsınasynyń birinshi jáne ekinshi dozalary arasyndaǵy aralyqty tórt aptadan 12 aptaǵa deıin uzartýdy josparlap otyr.

Koronavırýs ınfektsııasyna qarsy vaktsınalaýdy osy jyldyń 25 aqpanynda bastaǵan Ýkraınanyń Densaýlyq saqtaý mınıstrligi de tıisti ózgeris engizdi. Osy oraıda Ulttyq tehnıkalyq sarapshylar toptarynyń usynystary boıynsha CoviShield vaktsınasynyń eki ekpesiniń aralyǵyn 28 kúnnen 90 kúnge deıin artty. Bul óz kezeginde 4-12 aptadan keıin ekinshi dozany engizýdi kózdeıtin óndirýshiniń nusqaýlaryna qaıshy kelmeıdi.

«Sonymen, koronavırýs ınfektsııasyna qarsy vaktsınalardyń tıimdiligin zerdeleý boıynsha alynǵan ǵylymı zertteý derekteri men búkil álemniń indetke qarsy vaktsınalaý tájirıbesi eki dozaly vaktsınanyń alǵashqy dozasy KVI men aýrýhanaǵa jatqyzý oqıǵalarynyń tómendeýine oń áser etetindigin rastaıdy», - delingen QR DSM Qoǵamdyq densaýlyq saqtaý ulttyq ortalyǵy málimetinde.


Joǵary qaraı