Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Depýtat zeınetaqy jınaǵynyń eń tómengi jetkiliktik shegin qaıta qaraý kezindegi kemshilikterdi aıtty

2021 jyldyń 15 jeltoqsan 2021 13:29

NUR-SULTAN. QazAqparat – Zeınetaqy jınaqtarynyń eń tómengi jetkiliktik shekterin qaıta qaraý zeınetaqy zańnamasyna sáıkes kelmeıdi. Bul týraly Parlament Májilisiniń depýtaty Amanjan Jamalov málim etti, dep habarlaıdy QazAqparat tilshisi.

«Qazirgi kezde 600 myń adam jalpy somasy 2 trln teńgege turǵyn úı jaǵdaıyn jaqsartý men emdelýge ózderiniń zeınetaqy jınaqtaryn paıdalandy. Bıylǵy 3 jeltoqsanda BJZQ óziniń saıtynda 2022 jylǵa arnalǵan zeınetaqy jınaqtarynyń jetkiliktik shegin jarııalady. Nátıjesinde, jańadan jarııalanǵan joǵary mólsher boıynsha ózderiniń zeınetaqy jınaqtaryn paıdalaný múmkindigi bar salymshylar sany 600 myńnan 150 myń adamǵa deıin, ıaǵnı 4 ese qysqarady», - dedi depýtat Úkimet basshysy Asqar Mamınniń atyna joldaǵan saýalynda.

Osy oraıda jetkiliktik shegin kóterý qoǵamda keńinen talqyǵa túskenin atap ótti.

«Osy oraıda bul máseleniń sheshimine Memleket basshysynyń ózi aralasýǵa týra keldi. Prezıdent Úkimetke 2022 jyldyń 1 sáýirine deıin burynǵy jetkiliktik mólsherine qatysty merzimdi uzartýǵa tapsyrdy. «Nur Otan» partııasynyń fraktsııasy bul merzim Eńbek mınıstrligi men BJZQ qatelikterin joıý turǵysynda júıeli jumys júrgizý úshin jumsalýy kerek dep sanaıdy», - dedi A. Jamalov.

Onyń paıymynsha, 2021 jylǵy 6 qańtardaǵy ózgerister men tolyqtyrýlar eskerilgen zeınetaqy jınaqtarynyń tómengi jetkiliktik shegin aıqyndaý ádisnamasy «Zeınetaqymen qamsyzdandyrý týraly» Zańy normalaryna saı kelmeıdi.

Osy oraıda ol ádisnamada metodologııalyq qatelik jiberilgenin, ıaǵnı onda shekti mán eń tómengi zeınetaqy kórsetkishiniń ornyna eń tómengi jalaqy mólsherimen baılanystyrylǵanyn aıtty. Bul óz kezeginde eń tómengi jetkiliktik shektiń ortasha eseppen 64 paıyzdan 83 paıyzǵa deıin artýyna alyp keldi.

Depýtattyń sózine qaraǵanda, zańnamaǵa sáıkes esepteýlerde eń tómengi zeınetaqy kórsetkishin paıdalanǵan kezde, jetkiliktilik shektiń deńgeıi 2021 jylmen salystyrǵanda tek 9 paıyzǵa óser edi.

Sonymen qatar A. Jamalov zeınetaqy jınaqtaryn paıdalaný merziminiń ó zgerýin synǵa aldy.

«Taǵy da «tosyn syısyz» bolmady. Eshbir naqty sebepsiz maqsat boıynsha zeınetaqy jınaqtaryn paıdalaný merzimi eki ese qysqardy, 45-ten 20 jumys kúnine deıin», - dedi depýtat.

Osy oraıda ol tıisti usynystardy jarııalady:

1) Jetkiliktik shekterin esepteý kezinde eń tómengi jalaqy kórsetkishin paıdalanýdan bas tartý;

2) Zańnamaǵa sáıkes eń tómengi zeınetaqy mólsherin paıdalana otyryp, 2022 jylǵa arnalǵan tómengi jetkiliktik shekti qaıta esepteý;

3) Ókiletti organ retinde Eńbek jáne halyqty áleýmettik qorǵaý mınıstrligine jetkiliktik shekterdi esepteý quzyretin bekitý;

4) Jyl sońyna deıin zeınetaqy jınaqtaryn «Otbasy bankke depozıtke aýdarý múkindigi týraly Prezıdent tapsyrmasyn oryndaý, sondaı-aq zeınetaqy jınaqtaryn paıdalaný merzimin 45-ten 20 kúnge deıin qysqarýy sebebine túsinik berý;

5) Qyzmetttik tekserý júrgizip, zeınetaqy jınaqtarynyń eń tómengi jetkiliktik shekterin aıqyndaý ádisnamasyn ázirlegeni úshin jaýaptylardy jazalaý.


Joǵary qaraı