Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Depýtattar mektepterdegi ınternet sapasy men qashyqtan oqytý máselesin kóterdi

2022 jyldyń 12 qańtar 2022 11:42

NUR-SULTAN. QazAqparat – Parlament Májilisiniń jalpy otyrysynda depýtattar aýyl mektepterindegi ınternet jyldamdyǵy máselesin kóterip, Bilim jáne ǵylym mınıstri Ashat Aımaǵambetovtyń atyna saýal joldady, dep habarlaıdy QazAqparat tilshisi.

«Elde oryn alǵan jaǵdaıǵa baılanysty, dıstantsıondy bilim máselesi taǵy da ózekti. Depýtattyq saýal «Biryńǵaı bilim berýdiń onlaın platformasynyń» jumysyna arnalady. Bul «Nur Otan» partııasynyń Saılaýaldy baǵdarlamasynyń Jol kartasynda qarastyrylǵan. Bilim jáne ǵylym mınıstrliginiń aqparatyna sáıkes, biryńǵaı bilim berý platformasyn engizý úshin 5 negizgi bilim berý aqparattyq júıesi anyqtalǵan («Kúndelik» AAJ, «OnlineMektep» AJ, «Mektep.edu» AJ, «Bilimal» AJ, «Daryn Online» AJ). Biryńǵaı bilim berý onlaın-platformasy 8 myńǵa jýyq mektepte, 3 mln-nan astam oqýshyǵa jáne 300 myń muǵalimge bir ýaqytta oqý protsesiniń qaltqysyz jumysyn qamtamasyz etýi qajet. Alaıda, sapaly ınterneti joq aýyl mektepteri úshin bul platforma qol jetimsiz», - dedi depýtat Juldyz Súleımenova.

Onyń aıtýynsha, búgingi tańda 7550 mekteptiń 58-inde múlde ınternet qosylmaǵan.192 mektepte ınternet jyldamdyǵynyń tómendigi sonsha, qarapaıym saıtty iske qosyp, ınteraktıvti servısti júkteý múmkin emes.

«Budan bólek, atap ótetin basty másele, aýyl jáne qala mektepterindegi ınternet sapasyna baılanysty bastapqy josparlaý kezeńindegi mınıstrliktiń normatıvti qujattarynda ártúrli parametrler belgilengen. Nazar aýdarǵymyz keletindigi, aýyl mektepteri úshin ınternet jyldamdyǵy qala mektepterine qarǵanda birneshe ese tómen», - dedi depýtat.

Osy rette, kelesi usynystar engizildi:

1) Biryńǵaı bilim berý onlaın-platformasyna sapaly bilim berý kontentin ıntegratsııalaýdy jáne ádisnamalyq súıemeldeý jumystary jalǵastyrylsyn;

2) Aýyl mektepteri jáne shaǵyn jınaqty mektepter úshin ınternet sapasyna qoıylatyn talaptar qaıta qarastyrylsyn;

3) Tsıfrlyq damý mınıstrligi jáne baılanys operatorlarymen birlesip, jańa baǵdarlamalyq ónimderdiń talaptaryn eskere otyryp, baılanys arnalary men qolda bar jabdyqtardyń múmkindikterin baǵalaý qaıta qarastyrylsyn.

4) Pedagogtar men oqýshylardyń bilim berý ortasynda tsıfrlyq teńsizdikti tómendetýge baılanysty vedomstvoaralyq keshendi is-jospar ázirlensin.


Joǵary qaraı