Aýa raıy
Astana 23 °S
Almaty 22 °S
valıýta baǵamy
USD 386.71
EUR 429.17
RUB 6.02
CNY 54.66

Dımash Qudaıbergenniń sahnalyq kostıými aýktsıonda 600 myń teńgege satyldy

2019 jyldyń 25 tamyz 2019 16:57

BÝRABAI. QazAqparat –«Burabike Fest-2019» sportty-mýzykalyq festıvali aıasynda ótken qaıyrymdylyq aýktsıonynda álemge tanymal otandyq ánshi Dımash Qudaıbergenniń sahnalyq kostıými 600 myń teńgege satyldy, dep habarlaıdy QazAqparat tilshisi.

Jyl saıyn ótetin «Burabike Fest-2019» sportty-mýzykalyq festıvali eki bólimnen turady. Alǵashqy bóliminde kásibı jáne áýesqoı veloshabandozdar ózara jaryssa, ekinshi kezeńde qaıyrymdylyq aýktsıony uıymdastyrylady.

Bıylǵy aýktsıonda jas ánshi Dımash Qudaıbergenniń 17 jasynda úlken sahnaǵa kıip shyqqan kostıými satylymǵa qoıyldy. Kostıýmniń alǵashqy baǵasy 200 myń teńgeden bastalyp, nátıjesinde 600 myń teńgege satyldy.

Sondaı-aq, aýktsıonda qazaqstandyq kásibı boksshy Gennadıı Golovkınniń qoltańbasy qoıylǵan boks qolǵaby 1 mln 200 myń teńgege, taǵy bir boksshymyz Qanat Islamnyń qoltańbasy qoıylǵan bylǵary qolǵaby 50 myń teńgege jáne Olımpıada chempıony Bahtııar Artaevtyń qoltańbasy qoıylǵan qolǵaby 60 myń teńgege satyldy. Odan bólek, sýda júzýshi Dmıtrıı Balandınniń júzý telpegi 40 myń teńgege satyldy.

Buǵan deıin habarlaǵanymyzdaı Býrabaıda «Burabike Fest-2019» sportty-mýzykalyq festıvali ótip jatyr.

Atalǵan sharanyń basty ereksheligi sol odan túsken barlyq qarajat qaıyrymdylyqqa jumsalady.

Joǵary qaraı