Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Dinmuhamed Kóshkinbaev Bıbigúl Tólegenovanyń vokalıster baıqaýynyń bas júldesin jeńip aldy

2021 jyldyń 12 qazan 2021 02:31

NUR-SULTAN. QazAqparat – Elordada Bıbigúl Tólegenova atyndaǵy XI Halyqaralyq vokalıster baıqaýynyń jeńimpazdary anyqtaldy, dep habarlaıdy QazAqparat tilshisi.

Marapattaý rásimi Nur-Sultandaǵy «Astana Opera» opera jáne balet teatrynda ótti.

Saltanatty keshte QR Mádenıet jáne sport vıtse-mınıstri Nurqısa Oralov, elorda ákiminiń orynbasary Ashat Oralov jáne Halyqaralyq vokalıster baıqaýynyń qazylar alqasynyń músheleri Bıbigúl Tólegenova qatysty. Baıqaýdy ótkizýge «Samruk kazyna», «Samruk-kazyna trust» kompanııalary qoldaý kórsetti.




Baıqaý qorytyndysy boıynsha, úshinshi oryn ıegerleri men laýreattary – elordalyq Darıǵa Musaeva, almatylyq Oraz Muhamedııarov jáne Altynbek Ábilda boldy. Ekinshi oryndy tashkenttik Ulpan Áýbákirova men Ázıza Muhamedova jáne Almaty qalasynan kelgen Ásel Áýbákirova ıelendi. Al birinshi oryndy – Máskeýden kelgen De-Rel Gabrıel, Tashkentten kelgen Otabek Nazarov jáne nursultandyq Álıhan Zeınolla jeńip aldy.
















Baıqaýdyń bas júldesin Almatydan kelgen 24 jastaǵy Dinmuhamed Kóshkinbaev enshiledi. Jýrnalıstermen suhbatta D. Kóshkinbaev án baıqaýyna qalaı qatysqanyn aıtty.

«Men Almaty qalasynan keldim. Eki jyl buryn bul baıqaý Almatyda ótken edi. Sol baıqaýda birinshi kezeńnen ótpeı qaldym. Sodan keıin taǵy da daıyndalyp, bıylǵy irikteýge qatystym. Meniń oqytýshym – Tanagúl Beknazarova. Birinshi kezeńde tórt shyǵarmany oryndaý kerek boldy. Al ekinshi kezeńde – eki shyǵarma. Halyq ánderinen Uly Abaıdyń «Jarq etpes qara kóńilim» sózine Sydyq Muhamedjanovtyń romansyn jáne «Sursha qyzdy» oryndadym. Qazylar alqasynyń baǵalaýy boıynsha Bas júlde ıegeri atandym», - dedi opera ánshisi.




Óz kezeginde Bıbigúl Tólegenova Dinmuhamed Kóshkinbaevtyń talantyn joǵary baǵalady.

«Qudaı Kóshkinbaevqa tamasha daýys bergen. Onyń joǵary, ortańǵy jáne tómengi regıstri óte tegis boldy. Bálkim ol mýzykalyq turǵyda jetilmegen shyǵar, biraq, ol alǵashqy tyńdaýdan beri bárinen joǵary keldi. Qazylar alqasynyń barlyq músheleri oǵan jaqsy baǵa berdi. Ol bul baǵaǵa laıyq dep sanaımyn», - dedi Bıbigúl Tólegenova.

Sondaı-aq, «Astana Opera» opera jáne balet teatry dırektorynyń atynan Ǵalym Ahmedıarov kásibıligin arttyrý úshin Ásel Áýbákirova men Dinmuhamed Kóshkinbaevqa arnaıy sertıfıkattar tabys etti.





Avtor Aıjan Serikjanqyzy
Basty sózder: Óner, Mádenıet, Nur-Sultan,
Joǵary qaraı