Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Ekinshi respýblıkaǵa kóshý jaqyn arada oryn alady - Erlan Qarın

2022 jyldyń 14 sáýir 2022 19:00

NUR-SULTAN. QazAqparat- Elordada «AMANAT» partııasynyń Qoǵamdyq saıasat ınstıtýty janynan iske qosylǵan «TALQYLAU» dıalog alańynyń ekinshi otyrysy ótti, dep habarlaıdy QazAqparat.

Instıtýttyń telegram arnasynda daýys berý qorytyndysy boıynsha anyqtalǵan talqylaý taqyryby Memleket basshysy aıtqan memleketti transformatsııalaý jónindegi ıdeologema – «Ekinshi Respýblıka» boldy.

Áleýmettik jelilerde tikeleı efırde taratý arqyly ótken ashyq pikirtalas barysynda sarapshylar, qoǵam qaıratkerleri, Májilis depýtattary el Prezıdenti usynǵan reformalarǵa qatysty óz pikirlerin ortaǵa saldy.

Otyrysqa qatysqan QR Memlekettik hatshysy Erlan Qarın bul termın bılik ınstıtýttary arasynda neǵurlym tıimdi teńgerim jasaıtyn memlekettik basqarý modeliniń ózgerýin beıneleıtinin atap ótti.

«Jańa Qazaqstan» – bul mańyzdy qoǵamdyq transformatsııany júzege asyratyn keń aýqymdy ıdeologema bolsa, «Ekinshi Respýblıka» – bul memlekettik modeldi ózgertý. ıAǵnı, birinshi jaǵdaıda qundylyqtar deńgeıinde, al ekinshi jaǵdaıda – bul ınstıtýtsıonaldyq, quqyqtyq deńgeıde júzege asatyn ózgerister.16 naýryzdaǵy Joldaýda Prezıdent naqty jańa saıası bastamalardy jarııa etkenin jáne olardy júzege asyrý is júzinde bastalyp ketkenin eskersek, «Ekinshi respýblıkaǵa» kóshý jaqyn arada oryn alady dep aıtýǵa bolady», - dedi Erlan Qarın.




Memlekettik hatshy Prezıdenttiń jańa bastamalary búkil saıası júıeni jańǵyrtyp, qaıta bastaýdy bildiretinin atap ótti. Jańa zańdar qabyldanyp, Konstıtýtsııaǵa ózgerister engizilgennen keıin is júzinde osy jyldyń ózinde Qazaqstanda memlekettik basqarýdyń jańa modeline kóshý júzege asyrylady. Ol tejemelik ári tepe-teńdik júıesin ınstıtýtsıonaldyq turǵydan kúsheıtip, jańa saıası mádenıettiń qalyptasýyna yqpal etedi.

Óz kezeginde «AMANAT» partııasynyń Atqarýshy hatshysy Ashat Oralov elimizde saıası júıeni transformatsııalaý partııany jańǵyrtýdan bastalǵanyn atap ótti.

«Zańnamany lıberalızatsııalaýdy, jańa partııalardy tirkeý resimderiniń jeńildetilýin eskersek, elimizdiń partııalyq-saıası alańyna jańa uıymdardyń keletinin túsiný qıyn emes. Bul jaǵdaı – bizdiń partııamyz úshin óziniń uzaq merzimdi, jaýapty kóshbasshylyqqa jáne básekelestikke daıyn ekenin dáleldeý múmkindigi. Osy alańdaǵy kezdesý «AMANAT» syndarly dıalog aıasynda Qazaqstandy damytý boıynsha naqty ıdeıalar men usynystar ázirlenetin saıası mádenıetti arttyrýǵa barynsha yqpal etetinin kórsetedi», - dep atap ótti Ashat Oralov.







«Alternatıva» ózekti zertteýler ortalyǵynyń dırektory Andreı Chebotarevtiń aıtýynsha, «respýblıka» árkez saılaý jolymen qalyptasatyn memlekettik bılik júıesin aıqyndap keldi.

«Biz Qasym-Jomart Toqaevtyń prezıdenttik kezeńinde saılaý júıesi qanshalyqty qarqyndy reformalanyp jatqanyn kórip otyrmyz. Aldymen aýyl ákimderin saılaý ınstıtýty engizildi. Keıin aýdan ákimderi saılanady. Saılaý protsesine majorıtarlyq júıeniń elementterin qaıtarý jumysy júrip jatyr. Bul da jańashyldyqtyń, jaqsylyqtyń nyshany. Bul tek ıdeologııanyń nemese uǵymdardyń ózgerýi ǵana emes, anyǵynda bul alǵa jyljýdyń, damýdyń aıǵaǵy», - dep tolyqtyrdy Andreı Chebotarev.




Májilis depýtaty Aıdos Sarymnyń pikirinshe, búginde qazaqstandyqtar Konstıtýtsııa ǵana emes, memlekettik basqarý júıesi de ózgerip jatqan tarıhı kezeńde ómir súrip jatyr.

«Biz memlekettiliktiń burynǵy formatynan bas tartpaımyz. Alaıda oǵan qaıtyp oralmaıtynymyzdy da túsingen jón. Jasyratyny joq, el azamattarynyń basym kópshiligi ózge memleketterdiń, qaısybir ýtopııalardyń sezimimen ómir súredi. Qazir óz keńistigimizge oralyp, óz kún tártibimizben ómir súrýdi úırený mańyzdy», dedi depýtat.




Kezdesý barysynda Eýrazııalyq ıntegratsııa ınstıtýtynyń dırektory Orazǵalı Selteev , Eýropalyq quqyq jáne adam quqyqtary ınstıtýtynyń dırektory, professor Marat Báshimov óz pikirlerimen bólisti. Zaldaǵy qatysýshylar ǵana emes, onlaın-kórermender de suraqtaryn qoıdy.







Aıta ketsek «TALQYLAU» dıalog alańyn qurý bastamasy «AMANAT» partııasynyń 1 naýryzda ótken kezekten tys Sezinde partııalyq transformatsııa baǵdarlamasy tarmaqtarynyń biri retinde kóterilgen bolatyn.





Eske salsaq, Erlan Qarın buǵan deıin Jańa Qazaqstan jáne Ekinshi respýblıka uǵymdaryn túsindirdi.



Joǵary qaraı