Aýa raıy
Astana 31 °S
Almaty 35 °S
valıýta baǵamy
USD 412.55
EUR 468.66
RUB 5.79
CNY 58.80

Elbasynyń Qazaqstannyń konstıtýtsııalyq qurylysyndaǵy róline arnalǵan kitap tanystyryldy

2020 jyldyń 1 shilde 2020 12:39

NUR-SULTAN. QazAqparat – Búgin «Qazaqstan Respýblıkasy Tuńǵysh Prezıdentiniń Táýelsiz Qazaqstannyń konstıtýtsııalyq qurylysyndaǵy róli: Elbasy tájirıbesi» atty kitaptyń onlaın-tanystyrylymy boldy, dep habarlaıdy QazAqparat.

Kitap Tuńǵysh Prezıdenttiń mereıtoıyna oraı daıyndaldy jáne QR Konstıtýtsııasynyń 25 jyldyǵyn ótkizý jónindegi ulttyq is-sharalar josparyn júzege asyrý aıasynda shyǵaryldy. Ol Tuńǵysh Prezıdenttiń Negizgi Zańdy daıyndaý men iske asyrýdaǵy, elimizdiń qazirgi saıası-quqyqtyq júıesin qurýdaǵy basty róli týraly baıandaıdy.

Tanystyrylymdy asha otyryp, Konstıtýtsııalyq Keńestiń tóraǵasy Qaırat Mámı 1995 jyly jańa Konstıtýtsııany ázirleý týraly sheshim qabyldaý elimiz Tuńǵysh Prezıdentiniń batyl qadamdarynyń biri bolǵanyn atap ótti. Keıinnen 30 tamyzda ótken referendýmda Konstıtýtsııanyń maquldanýy oǵan joǵary legıtımdilik berdi.




«Aldymyzda mańyzdy merekeler kele jatyr. Bıyl astana kúni Táýelsiz Qazaqstannyń jáne onyń ásem elordasynyń negizin qalaýshy Tuńǵysh Prezıdent Nursultan Ábishuly Nazarbaevtyń mereıtoıymen sáıkes kelip otyr. Sonymen qatar, bıyl Konstıtýtsııanyń 25 jyldyǵy. Elorda men Ata Zańnyń damýy bir-birimen tyǵyz baılanysty. Konstıtýtsııany jazý, ony júzege asyrý, elordany álemniń kórikti qalalarynyń birine aınaldyrý protsesteri Elbasynyń tikeleı basshylyǵymen júzege asty. Osy oqıǵalarǵa arnap Konstıtýtsııalyq Keńes QR Tuńǵysh Prezıdentiniń Táýelsiz Qazaqstannyń konstıtýtsııalyq qurylysyndaǵy rólin jan-jaqty sıpattaıtyn kitapty daıyndaǵan edi. Búgin sol kitaptyń tanystyrylymy ótedi», - dedi Qaırat Mámı.

Onyń sózine qaraǵanda, Elbasy strategııasy jáne Qazaqstan halqynyń erik-jigeri úndestik tapty. Osy ótken shırek ǵasyr Qazaqstan Respýblıkasy Konstıtýtsııasynyń tıimdiligi men progressıvtiligin kórsetti. Táýelsiz Qazaqstannyń barlyq tabystary elimiz azamattarynyń múddesine jaýap beretin Ata Zańnyń joǵary sapasyna, onda jarııalanǵan qundylyqtardyń myzǵymastyǵyna baılanysty.

Onlaın-tanystyrylymǵa avtorlyq ujymnyń ókilderi qatysty.

QR Tuńǵysh Prezıdenti - Elbasy qory atqarýshy dırektorynyń orynbasary Igor Rogov elimizdegi konstıtýtsııalyq qurylystyń tarıhy qazirgi Qazaqstannyń jáne onyń saıası-quqyqtyq júıesiniń negizin qalaýshysy Nursultan Nazarbaevtyń atymen tyǵyz baılanysty ekenin atap ótti.

Tanystyrylymǵa Konstıtýtsııalyq Keńestiń quramy, Qazaqstannyń memlekettik qurylymdarynyń basshylary, sondaı-aq belgili otandyq jáne sheteldik qoǵam qaıratkerleri men ǵalymdar qatysty. Kitap elimizdiń kitaphanalarynda qoljetimdi bolady.


Joǵary qaraı