Aýa raıy
Astana 12 °S
Almaty 12 °S
valıýta baǵamy
USD 421.58
EUR 496.83
RUB 5.53
CNY 62.20

Eldegi epıdemıologııalyq ahýal jaqsardy – osy úrdisti saqtap qala alamyz ba

2020 jyldyń 28 shilde 2020 13:00

NUR-SULTAN. QazAqparat – Elimizde qatań shekteý sharalarynyń alynýyna bir aptadan az ýaqyt qaldy. ıAǵnı qatań karantınniń sońǵy aptasy ótip jatyr. Jalpy bul karantınnen sabaq aldyq pa? Tamyzda qaýipti indet taǵy órship ketpeı me? Bul suraq búgingi kúni halyqty da, úkimetti de alańdatyp otyr.

Aýrý emes, salaýatty ádetter «juqpaly» bolýy tıis

Búgingi Úkimet otyrysynda Densaýlyq saqtaý mınıstri Alekseı Tsoı eldegi epıdemıologııalyq ahýaldy baıan etti. Onyń aıtýynsha, 5 shildeden bastap úsh aptanyń ishinde elde KVI juqtyrýdyń 35 951 jaǵdaıy tirkelgen. Jalpy qatań shekteý sharalaryn engizgen sátten keıin tirkelgen jaǵdaılardyń 29 paıyzǵa azaıǵany baıqalady. Qazirgi ýaqytta COVID-19 vırýsyn juqtyrý boıynsha jaǵdaı kúnine ortasha eseppen 1600 adam deńgeıinde turaqtalǵan. Sonymen qatar, tósek oryndar 43 paıyzǵa, jansaqtaý bólimindegi tósek oryndar 27 paıyzǵa bosap, juqtyrǵandardyń ishinde saýyqqandardyń úlesi 63 paıyzǵa artqan.

«Osylaısha densaýlyq saqtaý júıesine túsken júktemeniń negizgi kórsetkishterin tómendetýge qol jetkizildi», - dedi ol.

Alekseı Tsoı ınfektsııanyń taralýynda qol gıgıenasy erekshe ról atqaratynyn eske saldy. Osyǵan baılanysty barlyq qoǵamdyq oryndarda qoldy tazartyp turý úshin sanıtaızerler ornatylýy tıis. Odsn bólek barlyq aqparat arnalary boıynsha halyqpen aqparattyq-túsindirý jumystaryn júrgizý kerek.

«Sondaı-aq áleýmettik qashyqtyq qaǵıdaty saqtalýy tıis: keńselerdiń qashyqtan jumys isteýi (20/80 qatynasynda) jáne oqýshylar men stýdentterdi qashyqtyqtan oqytý; Maska taǵý rejımi men áleýmettik qashyqtyqty saqtaý múmkin bolmaǵandyqtan, buqaralyq is-sharalardyń barlyq túrine tyıym salý; Bıznestiń jaýapkershiligin arttyrý – baqylaýdy kúsheıtip, nysandardy bólikterge bólý jáne adamdardyń tolyp ketpeýin qadaǵalaý kerek. Bul sharalar barlyq aqparattyq arnalar boıynsha nasıhattalýy qajet», - dedi Alekseı Tsoı.

3 tamyzdan bastap qandaı nysandar jumysyn bastaıdy

Densaýlyq saqtaý mınıstri sondaı-aq Qazaqstanda 3 tamyzdan bastap jumys bastaýyna ruqsat beriletin nysandardy atady. Ol úshin tómendegi nysandarda sanıtarlyq-dezınfektsııalyq rejım saqtalyp, maska taǵý men áleýmettik qashyqtyqty saqtaý talaptary oryndalýy kerek. Bul nysandar jumysyn bastaý úshin apta ishinde ınfektsııanyń taralý deńgeıi turaqtalyp, tósek oryndar 70 paıyzǵa bosaýy tıis.

«Atap aıtqanda osyndaı sharttar oryndalǵan jaǵdaıda oıyn-saýyq ortalyqtary, saýda úıleri, ýaqyty men kúni shekteýli tártipte saýda jelileri, jabyq azyq-túlik nysandary men azyq-túlik satpaıtyn bazarlar ashylady. Sondaı-aq, balalardyń korrektsııa kabıneti, bilim berý ortalyqtary, balalardy damytý ortalyqtary, toptyq úıirmeler (bes baladan aspaýy kerek) jumys bastaıdy. Balalardyń mektepke deıingi mekemelerine de kezekshi top rejıminde jumys isteýge ruqsat. Sán-salondary, shashtarazdar, kosmetıkalyq qyzmet kórsetetin ortalyqtar men salondar, manıkıýr men pedıkıýrlar (aldyn ala jazylý boıynsha) da ashylady», - dedi ol.

Alekseı Tsoıdyń aıtýynsha, memlekettik qyzmetshiler men keńse qyzmetkerleriniń 80 paıyzy qashyqtan jumys isteý tártibi saqtalýy tıis.

Mınıstr sondaı-aq turǵyndardyń kóshede qandaı talaptardy saqtaýy qajettigin túsindirdi.

«Sportpen aınalysý formatyna qatysty, áleýmettik qashyqtyqty saqtaı otyryp, ashyq aýada jeke jáne toptyq jattyǵýlarǵa ruqsat etiledi. Sondaı-aq, ulttyq quramalar úshin 30 adamnan aspaıtyn sport jattyǵýlaryna ruqsat beriledi. Kóshege, saıabaqtarǵa, skverlerge jáne jaǵalaýǵa barǵanda 3 adamnan artyq toptasýǵa bolmaıdy. Qoǵamdyq kóliktiń jumysy ýaqyt pen jolaýshylar sanyn 50% shekteı otyryp, maska taǵý, sanıtarlyq-dezınfektsııalyq rejımdi saqtaýdy jáne kondýktorlardyń bolýyn mindetteý arqyly qaıta jandanady», - dedi Alekseı Tsoı.

Áıtse de qatań karantın sharalary kúshin joıǵanymen shekteý talaptary ishinara kúshinde qalatyn boldy. Atap aıtqanda, 3 tamyzdan keıin myna tyıym kúshinde qalýy kerek: jappaı jınalatyn buqaralyq sharalardy ótkizýge, kóńil kóteretin mekemelerge, kınoteatrlar men fýdkorttarǵa, banket zaldarynyń jumys isteýine ruqsat joq. Meıramhanalar men barlar, túngi jáne oıyn klýbtary da ázirge jumys bastamaıdy. Mádenıet nysandarynyń, mýzeılerdiń jumysy jandanbaıdy. Konferentsııalar men kórmeler, forýmdar ótkizilmeıdi. Sport zaldardyń, fıtnes-ortalyqtardyń, basseınder men akvapark jaǵajaılarynyń, dinı nysandardyń jumysy bastalmaıdy. Qala mańyna qatynaıtyn jolaýshylar poıyzy («elektrıchkalar», jumys poıyzdaryn eseptemegende) men qala arasyndaǵy avtobýstardyń qozǵalysy jandanbaıdy.

Óńirlerde jaǵdaı túzelip keledi

Úkimet otyrysynda Alekseı Tsoıdan keıin óńir ákimderi sóz aldy. Ákimderdiń sózine sensek jaǵdaı edáýir túzelip qalǵan. Máselen Nur-Sultan qalasynyń ákimi Altaı Kólginov elordadaǵy densaýlyq saqtaý uıymdaryna túsken salmaq edáýir azaıǵanyn málim etti. Onyń aıtýynsha karantın engizilgen sátten bastap KVI boıynsha jaǵdaıdyń naqty turaqtanýy baıqalady. Altaı Kólginov densaýlyq saqtaý uıymdaryna túsken salmaq edáýir azaıǵanyn atap ótti. Atap aıtqanda jedel járdemge júginý sany táýligine 4300-den 1600-ge deıin, ıaǵnı 3 esege tómendep, KVI boıynsha jedel járdemge júginý 500-den 89-ǵa deıin, ıaǵnı 6 esege azaıǵan. Jalpy shaqyrýlar sany táýligine 3 myńnan 1000-ǵa deıin, nemese 3 esege tómendep, pnevmonııamen jatqan azamattar sany 2 esege azaıǵan, statsıonarlardyń júktemesi 99%-ten 38%-ke deıin tómendegen.

«Taǵy bir statsıonardan keshe sońǵy patsıent jazylyp shyqty. Jaqyn kúnderi ortalyq óz patsıentterin josparly túrde qabyldaıdy. 3 tamyzdan bastap barlyq kalalyq emhanalar josparly medıtsınalyq kómek kórsetýdi bastaıdy», - dedi Altaı Kólginov.

Al Almatyda koronavırýs pandemııasynyń ekinshi tolqynyna daıyndyq sheńberinde birneshe gospıtal ashylǵaly jatyr. Almaty qalasynyń ákimi Baqytjan Saǵyntaevtyń aıtýynsha, búgingi kúni kovıdpen kúreske 27 medıtsına uıymy tartylǵan. Jalpy tósek qory 6096 oryndy quraıdy.

«Búgingi málimet boıynsha bul kórsetkish 42%-ǵa tómendedi. Pandemııanyń ekinshi tolqynyna daıyndyq sheńberinde jaǵdaıy aýyr naýqastarǵa arnalǵan birinshi eshelon statsıonarlaryndaǵy ınfektsııalyq tósek oryndaryn 1015 orynǵa kóbeıtemiz. Sondaı-aq tamyz aıynyń sońyna deıin 500 orynǵa arnalǵan jańa gospıtal paıdalanýǵa beriledi. Al qyrkúıektiń ortasyna deıin 300 tósek-orynǵa arnalǵan tez salynatyn taǵy bir modýldik ınfektsııalyq gospıtaldy iske qosamyz. Kelesi aptanyń basynda qurylys alańyna shyǵamyz. 1 qazanǵa deıin eki qonaq úıdiń bazasynda jeke ınvestıtsııalar esebinen 215 tósek-oryndyq tolyqqandy kovıdtik emhanalar qurylatyn bolady. Tamyzdyń sońyna deıin patologoanatomııalyq bıýro iske qosylady», - dedi Baqytjan Saǵyntaev.

Shymkent qalasynyń ákimi Murat Áıtenov te qalada epıdemıologııalyq jaǵdaıdyń jaqsarǵanyn málim etti. Onyń aıtýynsha, ınfektsııalyq jáne provızorlyq statsıonarlarda der kezinde qosymsha 3 050 tósek orny uıymdastyrylyp, oryn sany 3 860-qa jetkizilgen. Onyń ishinde reanımatsııalyq tósek ornynyń sany 30 orynnan 151 orynǵa deıin ulǵaıtylǵan. Qosymsha 58 tynys alý apparaty, 250 «Bobrov» tynys alý apparaty jáne 26 reanımatsııalyq monıtor alynǵan.

«Atqarylǵan jumystar qalada epıdemıologııalyq jaǵdaıdyń jaqsarýyna óz áserin tıgizdi. Atap aıtqanda, jedel járdem kómegin shaqyrtýlar sany kúnine 2 320-dan 1321 deıin, ıaǵnı 43 paıyzǵa azaıdy. Statsıonarlarda em alýshylardyń sany aǵymdaǵy jylǵy shilde aıynyń birinshi onkúndiginde 2 882 adamǵa ósken bolsa, búgingi kúnde 1240 adamǵa deıin, ıaǵnı 56,9 paıyzǵa tómendedi. Statsıonarlardaǵy tósek orynnyń júktemesi osy aıdyn basynda 78,7 paıyzdy qurasa, búgingi tańda 33 paıyzǵa deıin kemidi», - dedi ol.

Sonymen qatar Qostanaı oblysynyń ákimi Arhımed Muhambetov óńirde jeke qorǵanys quraldarynyń eki aılyq qory daıyn ekenin málimdedi. Ákimniń aıtýynsha, emhanalar janynda úıinde emdelýshilerge medıtsınalyq kómek kórsetetin 160 mobıldi ámbebap brıgada qurylǵan. Bıýdjetten tys qarajat esebinen Qostanaı qalasynyń emhanalary janyndaǵy mobıldi brıgadalardyń qyzmetkerleri 12 taksı avtomobılimen qamtamasyz etilgen.

«Qazirgi ýaqytta jeke qorǵanysh quraldarynyń qaldyǵy 64 myń bir rettik kostıýmdi, 4 myń kóp rettik kostıýmdi, 80 myń maskany, 200 myń qolǵapty quraıdy. Bul 2 aıdan astam merzimge jeke qorǵanys quraldarynyń qoryn qamtamasyz etedi. 2021 jyldyń aqpanyna deıin oblystyq bıýdjet qarajaty esebinen jeke qorǵanys quraldaryn qosymsha satyp alý josparlanýda», - dedi ol.

Mańǵystaý oblysynyń ákimi Serikbaı Trumov Mańǵystaýda oblys ákimi apparatyna qarasty 30 jeńil avtokólik mobıldi brıgadalar qyzmetine kómek retinde bólingenin jetkizdi. Búginde aýmaqta koronavırýs aýrýynyń respıratorlyq belgileri bar naýqastarǵa kómek kórsetý úshin 126 mobıldi brıgada qyzmet etip jatyr. Oǵan oblys ákimshiligi óz tarapynan apparatqa qarasty 30 qyzmettik kólik bólip bergen.

«Al «BRK-Lızıng» AQ arqyly óńirge 52 arnaıy jedel-járdem avokóligin alý úshin Respýblıkalyq bıýdjetten 227 mln teńge qarajat bólinýde. Sonymen qatar aýyldyq emhana, bastapqy medıtsınalyq kómek kórsetý ortalyqtaryna jáne dárigerlik ambýlotorııalarǵa 50 medıtsınalyq ÝAZ avtokólikterin alý úshin oblystyq rezervten 300 mln teńge qarastyryldy», - dedi ol.

Úkimet basshysy: Qazaqstanda epıdemıologııalyq jaǵdaı turaqtandy

«Karantındik sharalardyń merzimi 2 tamyzda aıaqtalady. Jalpy, osy kezeńde epıdemıologııalyq jaǵdaı turaqtandy, medıtsına uıymdarynyń júktemesi birshama azaıdy. Jazylyp ketkenderdiń sany 63 paıyzdan asty. Vırýs juqtyrýdyń táýliktik ósimi 4 paıyzdan 1,7 paıyzǵa deıin azaıdy», - dedi Premer-Mınıstr Úkimettiń búgingi otyrysynda.

Aýrýhanalardaǵy tósek-oryn júktemesi 46 paıyzǵa deıin tómendedi. Aı qorytyndysy boıynsha jedel járdemdi shaqyrý kórsetkishi 38 paıyzǵa túsken.

«Barlyq óńirler dári-dármektiń jetkilikti qorymen qamtamasyz etilgen. Osyǵan oraı, epıdemıologııalyq jaǵdaıdy odan ári jaqsartýymyz qajet. Búgin Densaýlyq saqtaý mınıstrligi Karantındik sharalardy birtindep alý josparyn usynyp otyr. Qazirgi jaǵdaı men osy aıdyń qorytyndysyn eskere otyryp, Memlekettik komıssııanyń otyrysynda bul Jospar qarastyrylyp, tıisti sheshim qabyldanady», - dedi Asqar Mamın.

Osylaısha jazdyń bir aılyq karantıni de shegine jetti. Densaýlyq saqtaý mınıstri Alekseı Tsoı endigi kezekte halyq úshin maska taǵý men áleýmettik qashyqtyqty saqtaý – kólikte qaýipsizdik beldigin taǵý shartymen birdeı bolýy kerektigin eskertti. ıAǵnı eldegi epıdemıologııalyq ahýaldyń odan ary jaqsarýy – aınalyp kelgende árbirimizdiń tártibimizge baılanysty bolyp otyr.


Joǵary qaraı