Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Eldegi kásipkerlerdiń aryz-shaǵymy boıynsha Shyǵys Qazaqstan kósh basynda tur

2022 jyldyń 27 mamyr 2022 12:36

ÓSKEMEN. QazAqparat – Qazaqstan kásipkerleriniń quqyǵyn qorǵaý jónindegi ýákil Rýstam Júrsinov búgin Shyǵys Qazaqstan oblysynyń kásipkerlerimen kezdesip, birqatar máselelerdi talqyǵa saldy. Onyń aıtýynsha, bul óńir kásipkerlerdiń aryz-shaǵymy boıynsha respýblıkada aldyńǵy orynda tur, dep habarlaıdy QazAqparat tilshisi.

Óskemendegi D.Serikbaev atyndaǵy ShQÝ ǵımaratynda ótken jıynǵa jergilikti kásip ıelerinen bólek, oblystyq kásipkerler palatasynyń, memlekettik mekemelerdiń, quqyq qorǵaý organdarynyń ókilderi qatysty. Talqyǵa salynǵan basty taqyryp – kásipker quqyǵynyń buzylýyn boldyrmaý, olarǵa óz isterin ilgeriletýge barynsha jaǵdaı jasalý.

«Elimizdiń túkpir-túkpirindegi kásipkerlermen kezdesip, olardy tolǵandyrǵan ózekti máselelerdi tyńdap kelemiz. Jalpy, bizge jyl saıyn bıznes ókilderinen túrli aryz-shaǵymdar túsip jatady. Onyń ishinde statıstıka kórsetkendeı, Shyǵys Qazaqstannyń kásipkerleri jıi shaǵymdanady. Máselen, sońǵy jyly 400-ge jýyq aryz túsken. Onyń 86 paıyzyna oń sheshim qabyldanýyna yqpal etildi», – dedi Rýstam Júrsinov.

Onyń aıtýynsha, kásipkerlerge qoıylatyn talaptar jyl saıyn kúrdelenip, qıyndap barady. Al kásip ıelerine bul talaptarǵa ilesip otyrý ońaı emes.

Sharaǵa qatysqan bıznes ókilderi sanalýan máselelerdi sóz etti. Qurylys salasynda ter tógip júrgenderiniń biri qurylys jumystaryna qatysty talaptardyń tym jıi ózgeretindigin synady.

«Biz bir nysannyń qurylysyn bastaǵan kezde zańǵa qaraımyz. Onda jazylǵan mindettemelerge sáıkes qurylys jumystaryn qolǵa alamyz. Al nysandy salyp bitkende zań múlde ózgerip ketedi de, nysanymyz talapqa saı bolmaı shyǵady. Jańa talapqa qaıta ıkemdelý edáýir shyǵyndy qajet etedi. Sol úshin qurylysty bastaǵan kezde qandaı talaptar boldy, nysan aıaqtalǵan kezde sol boıynsha tapsyrylýy qajet», – dedi ol.

Bul máseleden habardar ekendigin aıtqan kásipker quqyǵyn qorǵaý jónindegi ýákil onyń sheshimin tabý Úkimet deńgeıinde qarastyrylyp jatqandyǵyn jetkizdi.

«Ras. Basqa óńirlerde de osy jaıly aıtatyndar kezdesedi. Zańnyń qaıta-qaıta ózgerýi kásipkerlerge qıyndyq týdyrady. Sondyqtan osy máseleniń oń sheshim tabýyn baqylaýda ustaıtyn bolamyz», – dedi Rýstam Júrsinov.


Joǵary qaraı