Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Elimizde otbasylyq zorlyq-zombylyqqa qarsy 6 granttyq joba júzege asyp jatyr

2021 jyldyń 25 qarasha 2021 13:50

NUR-SULTAN. QazAqparat – Qazaqstanda otbasylyq zorlyq-zombylyqqa qarsy birneshe joba iske asyp jatyr. Bul týraly QR Aqparat jáne qoǵamdyq damý vıtse-mınıstri Asqar Ýmarov málim etti, dep habarlaıdy QazAqparat tilshisi.

«Otbasylyq qundylyqtardy nyǵaıtý men otbasy ınstıtýtyn damytý maqsatynda bıyldan bastap bizdiń mınıstrlik 6 granttyq jobany iske asyrýda. Sonyń birinshisi, jastar arasynda otbasylyq qundylyqtardy nyǵaıtý jónindegi sharalardy ınstıtýttaý. Ekinshi, jastar arasynda reprodýktıvti densaýlyqty saqtaý máselesi boıynsha konsýltatsııalyq qyzmet kórsetý. Úshinshi, otbasylyq-turmystyq zorlyq-zombylyqtyń aldyn alýda daǵdarys ortalyqtarynyń qyzmetin jetildirý. Tórtinshi joba erekshe talapty qajet etetin balalary bar otbasylardy qoldaý jónindegi sharalar keshenin ázirlep, iske asyrý. Besinshi genderlik qajettilikter men qajettilikter kartasyn ázirleý baǵytynda. Jáne altynshy, otbasylyq qarjylyq saýattylyqqa arnalǵan joba. Ol onlaın formatta ótti»,- dedi Asqar Ýmarov elordada ótip jatqan «Qazaqstandaǵy otbasy jáne otbasylyq saıasat ınstıtýty: máseleleri, úrdisteri men keleshegi» atty taqyrybyndaǵy halyqaralyq konferentsııada.

Onyń aıtýynsha, otbasyn qorǵaý ınstıtýtyn nyǵaıtý jáne genderlik teńdikti ilgeriletý maqsatynda 2016 jyly QR Prezıdentiniń Jarlyǵymen 2030 jylǵa deıingi QR otbasylyq-genderlik saıasat tujyrymdamasy qabyldandy.

«Memleket basshysy bıylǵy Joldaýynda bizdiń mınıstrlikke osy tujyrymdamany ózektendirýdi tapsyrdy. Osy tapsyrmany iske asyrý úshin arnaıy jumys toby quryldy. Onyń quramyna Parlament depýtattary, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń músheleri, sarapshylar, úkimettik emes jáne halyqaralyq uıymdar men múddeli memlekettik organ ókilderi kirdi», – deıdi ol.





Joǵary qaraı