Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Elimizdiń batysyndaǵy 4 oblysty damytýdyń keshendi jospary qabyldandy

2022 jyldyń 25 qańtar 2022 09:57

NUR-SULTAN. QazAqparat – Búgin Úkimet otyrysynda elimizdiń batysyndaǵy 4 oblysty damytýdyń keshendi jospary qabyldandy, dep habarlaıdy QazAqparat tilshisi.

«Batys óńirlerdiń erekshelikteri men olardyń el ekonomıkasynyń damýyna qosyp otyrǵan úlesin eskeretin bolsaq, atalǵan oblystardy áleýmettik-ekonomıkalyq jaǵynan ári qaraı damytý jáne turǵyndardyń ál-aýqatyn jaqsartý óte ózekti másele bolyp tabylady. Mańǵystaý jáne Atyraý oblystary boıynsha keshendi josparlar ótken jyly qabyldanǵan bolatyn. Olardy taǵy da bir pysyqtap, qosymsha qarjylandyrý qajet boldy. Al Aqtóbe jáne Batys Qazaqstan oblystaryna keletin bolsaq, óńir josparlary búgin birinshi ret bekitýge usynylyp otyr»,- dedi QR Premer-Mınıstri Álıhan Smaıylov.

Onyń atap ótýinshe, keshendi josparlar ekonomıkanyń jekelegen salalaryn damytýǵa ǵana emes, sondaı-aq sapaly sýmen qamtamasyz etý, bilim berý men densaýlyq saqtaýdyń qoljetimdi bolýy, jańa jumys oryndaryn qurý sııaqty mańyzdy máselelerdi sheshýge baǵyttalýy tıis.

«Máselen, Aqtóbe oblysynda ónerkásip kólemin 2025-shi jylǵa qaraı 2,8 trln teńgege deıin arttyrý jáne qosymsha 39 myńnan astam jumys ornyn qurý josparlanyp otyr. Batys Qazaqstan oblysy boıynsha 2 myń shaqyrymnan astam elektr jelileri jańǵyrtylady, bul jelilerdiń tozýyn aıtarlyqtaı azaıtatyn bolady. 38 myńnan astam jańa jumys orny qurylady. Shamamen 2,1 trln teńge jeke ınvestıtsııa tartý josparlanyp otyr. Atyraý oblysy boıynsha elektr jelilerinde jıilep ketken apattardy odan ári boldyrmaý úshin tıisti sharalar qabyldanady. 40 myńnan astam jańa jumys orny qurylady. Shamamen 8,3 trln teńge jeke ınvestıtsııa tartý josparlanyp otyr»,- dedi ol.

Úkimet basshysynyń aıtýynsha, Mańǵystaý oblysynda sý tapshylyǵyn eskere otyryp, sý tuytatyn 9 zaýyt pen qondyrǵyny salý jáne keńeıtý kózdelip otyr. Sondaı-aq 55 myńnan astam jumys ornyn qurý josparlanýda.

«Qujattarda negizinen bıýdjetten tys qarajatty tartýǵa basymdyq berilip otyr jáne bul óte quptarlyq jaıt ekenin atap ótkim keledi. Eń bastysy óńir halqy oń ózgeristerdi barynsha sezinýleri kerek. Bolashaqqa senimmen qarap, jumys istep, tabys taýyp, ózderiniń bıznesterin damytyp, jaqsy emdelip, sapaly bilim alýy tıis. Halyqtyń turmys sapasyn aıtarlyqtaı jaqsartý úshin barlyq múmkindikterdi paıdalaný qajet. Qujattardy jalpy maquldaımyz. Ulttyq ekonomıka mınıstrligine, ákimdikterge, múddeli memlekettik organdar men uıymdarǵa keshendi josparlardaǵy is-sharalardy ýaqytynda jáne sapaly iske asyrýdy qamtamasyz etýdi tapsyramyn», - dedi Álıhan Smaıylov.


Joǵary qaraı